Read Xitsonga John 8 Bible Online

John 8 - Xitsonga bible

John 8

¹Kutani Yesu a ya eNtshaveni ya Mitlhwari.

²Ni mixo, a tlhela a ya etempeleni, kutani vanhu lavo tala va ta eka yena; a tshamisa a va dyondzisa.

³Kavaloko vatsari ni Vafarisi va n'wi tisela wansati la khomiweke a endla vuoswi; kuteloko va n'wi vekile exikarhi,

⁴va ku eka yena: “Mufundhisi, nsati loyi, u khomiwile evuoswini.

⁵Kutani Muxe u hi lerisile enawini ku khandla lavo tano hi maribye; wena-ke, u ri yini?”

⁶Va vurisa sweswo ku n'wi ringa, ni ku kuma leswi va nga ta n'wi hehla ha swona. Kambe Yesu a korhama a tsala ehansi hi ritiho.

⁷Kutani, hikuva va n'wi sindzisa hi ku n'wi vutisa, a ololoka, a ku eka vona: “La nga riki na xidyoho eka n'wina, a a ve yena la sungulaka ku n'wi khandla hi ribye.”

⁸A tlhela a korhama, a tsala ehansi.

⁹Kuteloko va twile ku hlamula ka yena, va tshinyiwa hi mapfalo, kutani va tisukela va longolokile, ku sungula hi lavakulu, ku hetelela hi lave ndzhaku; Yesu a sala a ri swakwe; wansati yena a yime xikarhi.

¹⁰Kutani Yesu a ololoka; kakuloko a nga ha voni munhu, loko a nga ri wansati ntsena, a ku eka yena: “Wansati, vahehli va wena va kwihi-ke? Xana a ku na munhu la ku avanyiseke?”

¹¹A ku: “A nga kona, Hosi.” Kutani Yesu a ku eka yena: “Na mina, a ndzi ku avanyisi; famba, u nga ha tlheli u dyoha.”

¹²Kutani Yesu a tlhela a vulavula na vona, a ku: “Hi mina ku vonakala ka misava; la ndzi landzelaka, a nga ka a nga fambi emunyameni, kambe u ta va ni ku vonakala ka vutomi.”

¹³Hikwalaho Vafarisi va ku eka yena: “U tivulela vumbhoni, kambe vumbhoni bya wena a byi tiyanga.”

¹⁴Yesu a hlamula a ku eka vona: “Hambi ndzi tivulela vumbhoni, vumbhoni bya mina byi tiyile, hikuva ndzi tiva laha ndzi humaka kona, ni laha ndzi yaka kona; kambe n'wina a mi tivi laha ndzi humaka kona, ni laha ndzi yaka kona.

¹⁵N'wina, mi avanyisa hi mukhuva wa nyama; mina, a ndzi avanyisi munhu.

¹⁶Loko ndzi avanyisa, ku avanyisa ka mina hi lokunene; hikuva a ndzi tshami ndzi ri swanga, kambe ndzi na Tatana la ndzi rhumeke.

¹⁷Swi tsandza ni le nawini wa n'wina, ku tsariwile leswaku vumbhoni bya vanhu vambirhi byi tiyile.

¹⁸Ndzi tivulela vumbhoni, kutani Tatana la ndzi rhumeke u ndzi vulela vumbhoni, na yena.”

¹⁹Kwalaho va ku eka yena: “Tata wa wena u kwihi?” Yesu a hlamula, a ku: “A mi ndzi tivi, a mi tivi na Tatana, loko ngi ma ndzi tiva, a mi ta tiva na Tatana.”

²⁰Yesu a vula marito lawa, evuhlayiselweni bya mali, a ri karhi a dyondzisa etempeleni; kambe a ku vanga na munhu la n'wi khomaka, hikuva nkarhi wa yena a wu nga si fika.

²¹A tlhela a ku eka vona: “Ndza famba, kutani mi ta ndzi lava, kambe mi ta fela eku dyoheni ka n'wina; laha ndzi yaka kona, mi nga ka mi nga ti.”

²²Kutani Vayuda va ku: “Xana u ta tidlaya, leswi a nge: ‘Laha ndzi yaka kona, mi nga ka mi nga ti’?”

²³A ku eka vona: “N'wina, mi va la hansi; mina, ndzi wa le henhla; n'wina, mi va misava leyi; mina, a ndzi wa misava leyi.

²⁴Hikwalaho ndzi mi byerile, ndzi ku: Mi ta fela eku dyoheni ka n'wina. Kungakuloko mi nga pfumeri leswaku hi mina loyi, mi ta fela eswidyohweni swa n'wina.”

²⁵Kavaloko va ku eka yena: “Hi wena mani xana?” Yesu a ku eka vona: “Ndzi ni mhaka yihi ni ku vulavula na n'wina xana?

²⁶Ndzi ni timhaka leto tala ku ti vula hi n'wina ni ku avanyisa; kambe la ndzi rhumeke wa tshembeka; kutani timhaka leti ndzi ti tweke eka yena, ndzi ti byela vanhu.”

²⁷A va swi twanga leswaku a a va byela swa Tata wa yena.

²⁸Yesu a ku eka vona: “Kutakuloko mi tlakusile N'wana wa Munhu, hi kona mi nga ta tiva leswaku ndzi mani, ni leswaku a ndzi endli nchumu ndzi ri swanga, kambe ndzi vulavula timhaka teto hilaha Tatana a ndzi dyondziseke hakona.

²⁹La ndzi rhumeke u na mina. Tatana a nga ndzi tshikanga ndzi ri swanga, hikuva ndzi endla hi masiku leswi n'wi tsakisaka.”

³⁰Kakuloko a vula timhaka teto, lavo tala va pfumela eka yena.

³¹Kutani Yesu a ku eka Vayuda lava pfumeleke eka yena: “Kungakuloko mi tiyisela eritweni ra mina, mi ta va vadyondzisiwa va mina kunene;

³²kutani mi ta tiva ntiyiso, kutani ntiyiso wu ta mi tshunxa.”

³³Va n'wi hlamula, va ku: “Hi rixaka ra Abrahama, a hi si fuyiwa hi munhu ni siku ni rin'we; u vurisa ku yini, loko u ku: ‘Mi ta tshunxiwa’?”

³⁴Yesu a va hlamula, a ku: “Ndzi vurisile ndzi ri eka n'wina: Un'wana ni un'wana la dyohaka hi xidyoho, i khumbi ra xidyoho.

³⁵Kutani khumbi ri nga ka ri nga tshami ekaya hi masiku; kambe n'wana u tshama kona hi masiku.

³⁶Hikwalaho loko N'wana a mi kutsula, mi ta va mi kutsuriwile hakunene.

³⁷Ndza swi tiva leswaku mi rixaka ra Abrahama, kambe mi rhandza ku ndzi dlaya, hikuva rito ra mina a ri nghenisisi eka n'wina.

³⁸Loko ndzi ri mina, ndzi mi byela lexi ndzi xi voneke eka Tatana, na n'wina mi endla lexi mi xi voneke eka tata wa n'wina.”

³⁹Va hlamula, va ku eka yena: “Tata wa hina i Abrahama.” Yesu a ku eka vona: “Loko ngi mi ri vana va Abrahama, a mi ta endla mitirho ya Abrahama.

⁴⁰Kasi sweswi, mi rhandza ku ndzi dlaya, mina ndzi nga munhu la mi byeleke leswi tiyeke, leswi ndzi swi tweke eka Xikwembu; Abrahama a nga endlanga sweswo.

⁴¹N'wina, mi endla mitirho ya tata wa n'wina.” Kutani va ku eka yena: “Hina a hi velekiwanga vuoswini, hi na tatana a ri un'we, xi nga Xikwembu.”

⁴²Yesu a ku eka vona: “Loko ngi Xikwembu a ri tata wa n'wina, a mi ta ndzi rhandza, hikuva ndzi huma eka Xikwembu, ndzi pfa ka xona; hikuva a ndzi tanga ha mina, kambe hi xona lexi ndzi rhumeke.

⁴³A mi twi ha yini-ke, ku vulavula ka mina? Hikuva ma tsandzeka ku yingisa rito ra mina.

⁴⁴N'wina mi huma eka tata wa n'wina a nga Diyavulosi, kutani mi rhandza ku endla ku navela ka tata wa n'wina. A a ri mudlayi ni le ku sunguleni, a nga tshamanga entiyisweni, hikuva a ku na ku tshembeka eka yena. Loko a vulavula mavunwa, a tisungulela swa yena, hikuva i muhembi ni tata wa mavunwa.

⁴⁵Kambe mina, hi leswi ndzi vulaka leswi tiyeke, a mi ndzi pfumeri.

⁴⁶I mani eka n'wina la nga ta ndzi khorwisa leswaku ndzi ni xidyoho? Kutani loko ndzi vula leswi tiyeke, a mi ndzi pfumeri ha yini-ke?

⁴⁷Loyi a nga wa Xikwembu u yingisa marito ya Xikwembu; n'wina, a mi yingisi, hikuva a mi va Xikwembu.”

⁴⁸Kutani Vayuda va hlamula va ku eka yena: “Xana a hi vuri swona loko hi ku: U Musamariya, ni leswaku u ni rihuhu xana?”

⁴⁹Yesu a hlamula, a ku: “Mina, a ndzi na rihuhu, kambe ndzi chava Tatana, kutani n'wina ma ndzi sandza.

⁵⁰A ndzi lavi ku dzunisiwa; u kona la ku lavaka ni la avanyisaka.

⁵¹Ndzi vurisile ndzi ri eka n'wina: Kungakuloko munhu a hlayisa rito ra mina, a nga ka a nga voni rifu, ni siku ni rin'we.”

⁵²Kutani Vayuda va ku eka yena: “Sweswi, ha swi tiva leswaku u ni rihuhu; Abrahama u file, na vona vaprofeta; kutani wena u ri: ‘Loko munhu a hlayisa rito ra mina, a nga ka a nga twi rifu ni siku ni rin'we.’

⁵³Xana u nkulukumba eka Abrahama, tata wa hina xana? Yena u file ni vaprofeta va file; wena u tiendla mani xana?”

⁵⁴Yesu a hlamula, a ku: “Loko ndzi tidzunisa, ku tidzunisa ka mina a hi ka nchumu; la ndzi dzunisaka hi Tatana, loyi mi nge i Xikwembu xa n'wina,

⁵⁵kasi a mi n'wi tivanga, kambe mina, ndza n'wi tiva; loko ndzi nga vula ndzi ku: A ndzi n'wi tivi, ndzi nga kotisa n'wina, ndzi va ni vunwa; kambe ndza n'wi tiva, kutani ndzi hlayisa rito ra yena.

⁵⁶Abrahama, tata wa n'wina, u tsakele ku vona siku ra mina, kambe u ri vonile, a vuya a tsaka.”

⁵⁷Kutani Vayuda va ku eka yena: “Malembe ya wena a ma si va ntlhanu wa makume, kutani u ri u vonile Abrahama xana?”

⁵⁸Yesu a ku eka vona: “Ndzi vurisile ndzi ri eka n'wina: Loko Abrahama a nga si va kona, mina a ndzi ri kona.”

⁵⁹Kutani va rhola maribye ku n'wi hoxetela, kambe Yesu a tumbela, kutani a huma etempeleni.