Read Xitsonga Acts 11 Bible Online

Acts 11 - Xitsonga bible

Acts 11

¹Kambe vaapostola ni vamakwavo lava akeke eYudiya va twa leswaku vamatiko na vona, va amukele rito ra Xikwembu.

²Kuteloko Petro a tlhandlukele eYerusalema, vapfumeri lava nga va ku yimba, va n'wi tengisa, va ku:

³“U nghene eka vavanuna lava nga yimbangiki, u va u dya na vona.”

⁴Kutani Petro a sungula ku va byela timhaka hi ku ti longoloxa, a ku:

⁵“A ndzi ri emutini wa Yopa ndzi khongela; kutani ndzi vona mahlori; ndzi vona xilo lexo ngi nguvu leyikulu, leyi nembelelaka hi le tilweni, yi bohiwile etinhleni ta yona ta mune, yi ta fika eka mina.

⁶Kuteloko ndzi yi hlometele, ndzi vona swifuwo swa misava swa mune wa milenge, ni swiharhi, ni leswi kokovaka, ni tinyanyana ta tilo.

⁷Kutani ndzi twa rito leri nge eka mina: ‘Yima, Petro, u tlhava, u dya.’

⁸Kutani ndzi ku: ‘Swi nga tshuki swi va tano, Hosi; hikuva xilo xo yila, hambi xi ri lexi nyameke, a xi si nghena enon'wini wa mina ni siku ni rin'we.’

⁹Rito ri engeta ri huma etilweni, ri ndzi hlamula, ri ku: ‘Xilo lexi basisiweke hi Xikwembu u nga tshuki u ku: “Xa yila.” ’

¹⁰Kutani sweswo swi endliwa kanharhu. Kutani hinkwaswo swi tlhela swi tekeriwa etikweni.

¹¹Ha wona nkarhi wolowo, ndzi tshuka ndzi vona vavanuna vanharhu lava rhumiweke eka mina, va huma eKhezariya, va humelela enyangweni ya yindlu laha ngi ndzi ri kona.

¹²Kutani Moya wu ndzi byela leswaku ndzi famba na vona, ndzi nga tshuki ndzi kanakana; kambe vamakwerhu lava va ntlhanu na un'we va famba na mina; kutani hi nghena eka munhu yeloyi.

¹³Kavaloko a hi byela hilaha a voneke ntsumi endlwini ya yena, yi n'wi humelela, yi ku eka yena: ‘Rhuma vanhu eYopa, va ya vita Simoni, loyi va nge i Petro;

¹⁴hi yena la nga ta ku byela timhaka leti u nga ta ponisiwa ha tona, wena ni va yindlu ya wena hinkwavo.’

¹⁵Kutani, kakuloko ndzi sungula ku vulavula, Moya lowo Kwetsima wu xikela ehenhla ka vona, kukotisa leswi nga endliwa eka hina eku sunguleni.

¹⁶Kutani ndzi anakanya rito ra Hosi leri nge: ‘Kunene Yohane u khuvurile hi mati, kambe n'wina mi ta khuvuriwa hi Moya lowo Kwetsima.’

¹⁷Kutani-ke, Xikwembu loko xi va nyikile nyiko leyi fanaka ni leya hina, lava hi pfumeleke eka Hosi Yesu Kriste, mina a ndzi ri mani ku alela Xikwembu xana?”

¹⁸Kuteloko va twile timhaka teto, va miyela; kutani va dzunisa Xikwembu, va ku: “Kunene, Xikwembu xi nyikile ni vamatiko ku hundzuka leswaku va vona vutomi!”

¹⁹Loko va ri lava ingi va hangalasiwile hi ku xanisiwa loku nga humelela hikwalaho ka Stefano, va hundzela emahlweni ku ya fika eFenikiya, na Kipra, na Antiyoka, va nga byeri munhu rito loko va nga ri Vayuda ntsena.

²⁰Hambiswiritano, van'wana eka vona, va nga vavanuna va Kipra ni va Kirene, kakuloko va nghene eAntiyoka, va hlamulana ni Vagriki, va va byela Evhangeli ya Hosi Yesu.

²¹Kutani voko ra Hosi ri va na vona; vanhu lavo tala va pfumela, va hundzukela eka Hosi.

²²Timhaka teto, kuteloko ti fikile etindleveni ta kereke leyi nge Yerusalema, yi rhuma Barnaba leswaku a endza eAntiyoka.

²³Kuteloko a fikile, a vona tintswalo ta Xikwembu a tsaka; kutani a va khongotela hinkwavo ku tiyisela eka Hosi hi timbilu leti chivirikaka.

²⁴Hikuva a a ri wanuna wa tintswalo, la teleke Moya lowo Kwetsima ni ku pfumela; kutani ntshungu lowukulu wu namarhela Hosi.

²⁵Kambe Barnaba a ya eTarso ku ya teka Sawulo.

²⁶Kuteloko a n'wi kumile, a n'wi yisa eAntiyoka. Va tshamisa kona, va heta lembe rin'we va ri karhi va hlengeletana ni kereke kutani va dyondzisa vunyingi lebyikulu. Hi kona la Antiyoka vadyondzisiwa va nga sungula ku thyiwa Vakriste.

²⁷Emasikwini lawa, vaprofeta va rhelela hi le Yerusalema, va ya Antiyoka.

²⁸Un'wana wa vona, loyi va nge i Agabo, a yima, a profeta hi Moya leswaku ndlala leyikulu yi ta wa emisaveni hinkwayo; kunene yi humelele enkarhini wa Klawudiyo-Khezari.

²⁹Kutani vadyondzisiwa va va ni rito rin'we ku rhumela vamakwavo lava akeke eYudiya leswaku va pfuna hilaha un'wana ni un'wana a nga humesa hakona.

³⁰Kunene va endlisa sweswo, va swi rhumela eka vakulukumba hi mavoko ya Barnaba na Sawulo.