Read Xitsonga Acts 14 Bible Online

Acts 14 - Xitsonga bible

Acts 14

¹Pawulo na Barnaba, loko va ri eIkoniya, va nghena kun'we esinagogeni ya Vayuda, va dyondzisa kona, kutani ku pfumela vunyingi lebyikulu bya Vayuda ni bya Vagriki.

²Kambe Vayuda lava nga pfumelangiki va pfuxa vamatiko leswaku timbilu ta vona ti ta karihela vamakwavo.

³Hambiswiritano, va xwa kona masiku layo tala, va vulavula va tshembile Hosi; kambe a yi ri karhi yi tiyisa rito ra tintswalo ta yona hi ku endla swikombiso ni masingita hi mavoko ya vona.

⁴Kambe vanhu va muti va hambana: Van'wana va yimela Vayuda, van'wana va yimela vaapostola.

⁵Kakuloko dzolonga ri pfuxiwa hi vamatiko, ni Vayuda, ni tindhuna ta vona ku va endla swo biha, ni ku va khandla,

⁶vona, loko va twa sweswo, va tsutsumela emitini yin'wana ya Likawoniya, yi nga Listra, na Derbe, ni le matikweni ya kona.

⁷Kutani va vula Evhangeli kona.

⁸Kambe munhu a a ri kona eListra ka hari mpfhuka a hume ekhwirini ra mana wa yena a lamele milenge, a nga tivi ku famba.

⁹A a yingisa leswi vuriwaka hi Pawulo. Yena a n'wi honolela, kutani loko a vona leswaku u ni ku pfumela ka ku hanyisiwa,

¹⁰a tlakusa rito, a ku eka yena: “Suka u yima hi milenge ya wena.”

¹¹Kutani a tlula a famba. Vunyingi, loko byi vona leswi endliweke hi Pawulo, byi sungula ku huwelela hi ririmi ra Valikawoniya, va ku: “Swikwembu swi tekile tinghohe ta vanhu, swi xikele eka hina.”

¹²Kutani Barnaba, a va n'wi vula Zewusi; Pawulo, yena, va ku, i Hermesi, hikuva a a ri yena n'wini wa marito.

¹³Na yena muprista wa Zewusi, loyi tempele ya yena a yi ri emahlweni ka muti wa vona, a ta ni tihavi ti rhwele tihari ta swikombiso, a ti yisa enyangweni ya muti, a rhandza ku va tlhavela mhamba a ri ni vunyingi.

¹⁴Kambe vaapostola Barnaba na Pawulo, loko va twa sweswo, va handzula tinguvu ta vona, va tihoxa exikarhi ka vanhu, va huwelela, va ku:

¹⁵“Vavanuna, mi endlisela yini sweswo xana? Kasi na hina hi vanhu lava fanaka na n'wina hi ntumbuluko; kutani ho mi byela leswaku mi tshika timhaka leti ta swahava, ni leswaku mi hundzukela eka Xikwembu lexi hanyaka, lexi nga endla tilo ni misava, ni lwandle, ni swilo hinkwaswo leswi nga eka swona;

¹⁶etinxakeni leti hundzeke, xi tshikile matiko hinkwawo, leswaku ma famba hi tindlela ta wona.

¹⁷Hambiswiritano, a xi tipfumatanga vumbhoni, hi ku endlela vanhu swinene, ni ku hi nyika timpfula ta tilo ni tinguva ta ndzalo, xi hi andzisela ni swakudya, xi tata timbilu ta hina hi ku tsaka.”

¹⁸Kambe, hambi va vula sweswo, va lava ku tsandzeka ku sivela vanhu ku va tlhavela mhamba.

¹⁹Kutani ku fika Vayuda lava pfaka hi le Antiyoka na Ikoniya, va kucetela tiko, va khandla Pawulo hi maribye, kutani va n'wi kokela ehandle ka muti, va anakanya leswaku u file.

²⁰Kambe kuteloko vadyondzisiwa va n'wi rhendzele, a pfuka, a nghena emutini wa vona; kutani hi siku leri tlhandlamaka a tifambela eDerbe a ri na Barnaba.

²¹Kuteloko va vurile Evhangeli emutini lowo, ni ku endla vadyondzisiwa lavo talanyana, va tlhelela eListra na Ikoniya na Antiyoka,

²²va tiyisa timbilu ta vadyondzisiwa, va va khongotela ku tiyisela eku pfumeleni, va ri karhi va va ringanisela leswaku hi fanele ku nghena eku fumeni ka Xikwembu hi maxangu layo tala.

²³Kutani va va vekela vakulukumba ekerekeni yin'wana ni yin'wana, hi ku khongela ni ku titsona swakudya; kutani va va veka eka Hosi leyi va pfumeleke eka yona.

²⁴Kavaloko va tsemakanya ePisidiya, va ya ePamfiliya.

²⁵Kutani va vula rito ePerge, kutani va rhelela eAtaliya.

²⁶Va suka kona va tlhelela eAntiyoka hi byatso, ku nga laha ingi va nyiketiwile etintswalweni ta Xikwembu, ku ya entirhweni lowu va wu heteke.

²⁷Kuteloko va fikile va hlengeleta kereke va vula hinkwaswo leswi Xikwembu xi swi endleke ha vona, ni hilaha xi nga pfulela matiko hakona nyangwa ya ku pfumela.

²⁸Kutani va xwa kona nkarhi lowo leha ni vadyondzisiwa.