Read Xitsonga Acts 16 Bible Online

Acts 16 - Xitsonga bible

Acts 16

¹Kutani a fika eDerbe na Listra. Kambe mudyondzisiwa a a ri kona, vito ra yena a a ri Timotiya; mana wa yena a a ri Muyuda la pfumeleke,

²kambe tata wa yena a a ri Mugriki; a a dzunisiwa hi vamakwavo va Listra ni va Ikoniya.

³Pawulo a a rhandza leswaku a famba na yena, kutani a n'wi teka, a n'wi yimbisa, hikwalaho ka Vayuda lava ngi va ri ematikweni walawo, hikuva hinkwavo a va swi tiva leswaku tata wa yena a a ri Mugriki.

⁴Kutani loko va ri karhi va famba emitini, va lerisa vamakwavo ku hlayisa milawu leyi nga vekiwa hi vaapostola ni vakulukumba va Yerusalema.

⁵Hi mukhuva wolowo tikereke ti tiyisiwa eku pfumeleni, kambe a ti andza siku rin'wana ni rin'wana.

⁶Kutani va tsemakanya Frigiya, ni tiko ra Galatiya, hikuva Moya lowo Kwetsima a wu va alela ku vula rito le Asiya.

⁷Kuteloko va fike eMisiya, va ringeta ku ya eBitiniya, kambe Moya wa Yesu a wu va pfumelelanga.

⁸Kuteloko va tsemakanyile eMisiya, va ngirimela eTrowasi.

⁹Kambe mahlori ma humelelela Pawulo nivusiku: Wanuna wa Makedoniya a yima emahlweni ka yena, a n'wi khongela, a ku: “Pelela eMakedoniya, u ta hi pfuna.”

¹⁰Kakuloko a vonile mahlori walawo, hi tilunghisa kan'we ku ya eMakedoniya, hi ku tiva leswaku Hosi yi hi vitanele kona ku ya va dyondzisa Evhangeli.

¹¹Kuteloko hi sukile eTrowasi hi byatso hi kongoma eSamotraka, ni siku leri tlhandlamaka, eNeyapoli;

¹²loko hi suka kona, hi kongoma eFilipiya, wu nga muti lowukulu etikweni ra Makedoniya, ni koloni. Kutani hi xwa masiku man'wana emutini lowo.

¹³Hi siku ra Savata, hi huma emutini hi ya enambyeni, laha va toloveleke ku khongela kona; kuteloko hi tshamisile, hi vulavula ni vavasati lava hlengeletaneke kona.

¹⁴Kutani wansati un'wana loyi va nge i Lidiya, muxavisi wa xivunguvungu, wa muti wa Tiyatira, la chavaka Xikwembu, a tshama a yingisa; kutani Hosi yi pfula mbilu ya yena leswaku a twisisa timhaka leti Pawulo a ti vulaka.

¹⁵Kutani, kuteloko a khuvuriwile ni va yindlu ya yena, a hi khongela, a ku: “Loko mi ndzi kumile ndzi ri la tshembekeke kunene eka Hosi, mi nga nghena endlwini ya mina, mi tshama kona”; a phikelela leswaku hi ya kona.

¹⁶Kambe, kakuloko hi ya exikhongelweni, ku humelela nandza un'wana wa wansati loyi ngi a ri ni moya wa pitona (wa vungoma), a hlangana na hina; a a fumisa veni va yena hi ku bvumbha.

¹⁷Kutani a landza Pawulo na hina, a huwelela, a ku: “Vavanuna lava, i malandza ya Xikwembu lexi nge henhlahenhla, lava mi byelaka ndlela ya ku hlayiseka.”

¹⁸A engeta a endlisa sweswo hi masiku lama tlhandlamaka; kambe Pawulo a karhatiwa ha swona, kutani a rhendzeleka a ku eka moya: “Ndza ku lerisa hi vito ra Hosi Yesu Kriste leswaku u huma eka yena!” Kutani wu huma hi nomu wolowo.

¹⁹Veni va yena, kuteloko va vonile leswaku va lahlekele hi ku tshemba bindzu ra vona, va khoma Pawulo na Silasi, va va kokela ehubyeni, emahlweni ka tihosi;

²⁰kutani va va yisa eka tindhuna, va ku: “Vanhu lava va nga Vayuda, va endla dzolonga emutini wa hina;

²¹va dyondzisa mikhuva leyi hi nga faneriki ku yi amukela, ni ku yi endla, hina hi nga Varhoma.”

²²Kutani ntshungu wu va pfukela matimba; tindhuna ti va handzulela tinguvu, ti lerisa leswaku va biwa hi mikhavi.

²³Kuteloko va va boxile mipfembeti leyo tala, va va hoxa ekhotsweni, va lerisa mulanguteri wa khotso leswaku a va langutela swinene.

²⁴Yena, kuteloko a lerisiwile sweswo, a va nghenisa ekhotsweni leri nga exikarhi kutani a manya milenge ya vona hi mitsandza.

²⁵Evusikwini lebyikulu, Pawulo na Silasi, a va khongela, va yimbelelela Xikwembu tinsimu; kutani lava nga khotsiwa va va yingisa.

²⁶Kambe hi nomu lowu, ku tsekatseka lokukulu ka misava ku va kona; masungulo ya khotso ma tsekatsekisiwa, tinyangwa hinkwato ti pfuleka, kutani timpecana ta hinkwavo ti tshunxeka.

²⁷Mulanguteri wa khotso a pfuka evurhongweni; kakuloko a vona tinyangwa ta khotso ti pfuriwile, a hlomula ripanga ra yena, a lava ku tidlaya, hikuva a a ehleketa leswaku vabohiwa va balekile.

²⁸Kambe Pawulo a n'wi huwelela hi rito lerikulu, a ku: “U nga tshuki u tivavisa, hikuva ha ha ri kona hinkwerhu.”

²⁹Kuteloko a komberile rivoni, a nghena hi ku tsutsuma, a tiwisela emilengeni ya Pawulo na Silasi, a ri karhi a rhurhumela.

³⁰Kuteloko a va humesele handle, a ku: “N'wina tihosi, ndzi ta endla yini leswaku ndzi ponisiwa?”

³¹Va ku: “Pfumela eka Hosi Yesu Kriste, kutani u ta ponisiwa, wena ni va yindlu ya wena.”

³²Kutani va n'wi byela rito ra Hosi, ni ka hinkwavo lava ngi va ri endlwini ya yena.

³³Kutani a va teka hi nkarhi lowo wa vusiku, a hlantswa mipfembeti ya vona; kutani hi nomu lowu, a khuvuriwa, yena ni va yena hinkwavo.

³⁴Kutani a va yisa endlwini ya yena, a veka swakudya emahlweni ka vona; kutani a tsaka swin'we ni va yindlu ya yena hinkwavo, hikuva a a pfumerile eka Xikwembu.

³⁵Loko byi xa, tihosi ti rhuma lava tamelaka tinhonga ku n'wi byela, va ku: “Tshika vanhu lava, va tifambela.”

³⁶Kutani mulanguteri wa khotso a tivisa Pawulo mhaka leyi, a ku: “Tihosi ti rhumele leswaku mi tshunxiwa, humani sweswi, mi tifambela hi ku rhula.”

³⁷Kambe Pawulo a ku eka vona: “Leswi va nga hi ba emahlweni ka vanhu hi nga si avanyisiwa, hina hi nga Varhoma, va hi hoxa ekhotsweni, xana sweswi, va ta hi humesa exihundleni xana? A hi swona; kambe a ku te vona hi xiviri, va ta hi humesela ehandle.”

³⁸Malandza ma yisa marito walawo eka tihosi; tona, loko ti twa leswaku i Varhoma, ti chava.

³⁹Kutani va ta, va va chavelela; kambe va va humesela ehandle va va khongela leswaku va huma emutini.

⁴⁰Kuteloko va humile ekhotsweni, va ya eka Lidiya; kuteloko va vonile vamakwavo, va va khongotela, kutani va tifambela.