Read Xitsonga Acts 20 Bible Online

Acts 20 - Xitsonga bible

Acts 20

¹Kuteloko dzolonga ri miyerile Pawulo a vitana vadyondzisiwa, a va lela, kutani a suka a ya eMakedoniya.

²Kuteloko a tsemakanyile matiko lawa, ni loko a khongoterile vamakwavo hi marito layo tala, a ya etikweni ra Grikiya, a tshama kona tin'hweti tinharhu.

³Kakuloko a suka ku ya eSiriya, a byeriwa ku vuya hi ra Makedoniya, hikuva Vayuda a va n'wi lavelela.

⁴Kutani a heleketiwa ku ya fika eAsiya hi Sopatere, n'wana Piro wa Beriya, na Aristarko, na Sekundo, va nga Vatesalonika, na Gayo wa Derbe, na Timotiya, na Tixiko na Trofimo, lava nga va Asiya.

⁵Volavo va hi rhangela emahlweni, va ya hi yimela eTrowasi.

⁶Loko hi ri hina, masiku ya swinkwa leswo kala comela loko ma hundzile, hi nghena ebyatsweni eFilipiya kutani hi ya va kuma eTrowasi, hi fambile ntlhanu wa masiku kutani hi tshama kona masiku ya ntlhanu na mambirhi.

⁷Hi siku ro rhanga ra vhiki, loko hi hlengeletene ku phema xinkwa, Pawulo a va dyondzisa ku ya fika exikarhi ka vusiku, hikuva a a ta famba nimixo.

⁸Kambe mavoningo a ma tele endlwini ya le henhla, laha hi hlengeletaneke kona.

⁹Pawulo loko a ha vulavula ku ya emahlweni, jaha leri va nge i Yutiko, leri ingi ri tshamile efasitereni, ri khomiwa hi vurhongo lebyikulu; kutani loko a hluriwile hi vurhongo, a wela ehansi, a ri endlwini ya vunharhu ya le henhla; kutani a tlakuriwa a file.

¹⁰Kambe Pawulo a xika, a korhama ehenhla ka yena, a n'wi khumbarheta, a ku: “Rhulani, hikuva moya wa yena wa ha ri ka yena.”

¹¹Kutani a tlhela a khandziya, a phema xinkwa, a dya, a va khongotela byi ko byi xa, kutani a suka.

¹²Kambe va vuya ni jaha leri, ri hanyile, kutani va chaveleriwa ngopfu ha swona.

¹³Loko hi ri hina, hi rhanga hi nghena ebyatsweni, kutani hi wela hi ya Aso, laha ingi hi fanele ku hlangana na Pawulo kona, hilaha ingi a lerisile hakona, hikuva yena a a te u ta famba hi milenge.

¹⁴Kuteloko a kumanile na hina le Aso hi n'wi teka hi ya eMitilena.

¹⁵Hi suka kona hi byatso, kutani loko byi xa, hi ya fika ekusuhi ni le Kiyo. Byi xa, hi hundza le Samosi; kuteloko hi xwile eTrogilio, hi leri tlhandlamaka hi fika eMileta.

¹⁶Hikuva Pawulo a a hisekerile ku hundza le Efesa, leswaku a nga tshuki a hlwela eAsiya, a hatlisela ku ya fika eYerusalema hi siku ra Pentekosta, loko a swi kota.

¹⁷Loko a ri eMileta, a rhumela le Efesa ku ya vitana vakulukumba va kereke.

¹⁸Kuteloko va fikile eka yena, a ku eka vona: “Mi tiva mukhuva lowu ndzi endleke ha wona exikarhi ka n'wina ka hari mpfhuka ndzi fika eAsiya;

¹⁹hilaha ndzi nga tirhela Hosi hakona hi ku titsongahata hinkwako, hi mihloti leyo tala, ni miringo leyi ndzi humeleleke hi ku etlelela eka Vayuda;

²⁰ni hilaha ndzi nga mi fihlelangiki mhaka, hambi yi ri yin'we ya leti mi pfunaka, ndzi nga tshikangi ku mi byela ni ku mi dyondzisa tona erivaleni ni le tindlwini ta n'wina;

²¹ndzi ri karhi ndzi vula eka Vayuda ni ka Vagriki, vumbhoni bya ku hundzukela eka Xikwembu, ni ku pfumela eka Yesu Kriste, Hosi ya hina.

²²“Kutani sweswi vonani, ndzi bohiwile hi Moya ku ya eYerusalema, kambe a ndzi tivi leti nga ta ndzi humelela kona,

²³ntsena loko ndzi ri karhi ndzi ya emutini wun'wana ni wun'wana, Moya lowo Kwetsima wu ndzi tivisa leswaku ku bohiwa ni maxangu swi ndzi langutele.

²⁴Kambe a ndzi vuri nchumu ha swona, ni vutomi bya mina, a ndzi byi cawuki, ndzi ko ndzi heta pfhumba ra vutomi bya mina ni ntirho lowu ndzi nga wu lerisiwa hi Hosi Yesu, ku nga ku vula vumbhoni bya Evhangeli ya tintswalo ta Xikwembu.

²⁵“Kutani maswivo, sweswi ndza swi tiva leswaku loko mi ri n'wina hinkwenu, valavo ndzi fambeke ndzi vula ku fuma ka Xikwembu exikarhi ka n'wina, a ku na un'we la nga ta tlhela a vona mombo wa mina.

²⁶Hikwalaho siku ra namuntlha ndzi tiyisa leswaku a ndzi na nandzu engatini ya n'wina hinkwenu;

²⁷hikuva a ndzi tshikanga ku mi byela makungu hinkwawo ya Xikwembu.

²⁸Sweswi n'wina, tivoneleni, ni ntlhambi hinkwawo lowu Moya lowo Kwetsima wu mi vekeke valanguteri va wona, ku risa kereke ya Hosi, leyi yi nga tifuwela yona hi ngati leyi yi nga ya yona hi xiviri.

²⁹Hikuva ndza swi tiva leswaku loko ndzi sukile, ku ta nghena exikarhi ka n'wina timhisi leto leva, leti nga tiki tsetselela ntlhambi;

³⁰ni leswaku ku ta pfuka exikarhi ka n'wina vanhu lava nga ta vula timhaka leto homboloka, ku tikokela vadyondzisiwa.

³¹Hitekani hikwalaho, mi anakanya leswaku hi malembe manharhu a ndzi rhutelanga, vusiku ni nhlekanhi, ku pfuxa un'wana ni un'wana wa n'wina hi mihloti.

³²“Kutani sweswi, ndzi mi veka eka Xikwembu ni ka rito ra tintswalo ta xona, lexi nga ni matimba ya ku mi akisa, ni ku mi nyika ndzhaka swin'we ni vakwetsimi hinkwavo.

³³A ndzi navelanga macheleni, ni loko ti ri tipondho, hambi yi ri nguvu ya munhu ni un'we.

³⁴Na n'wina ma swi tiva leswaku mavoko lawa, ma tirhile leswi pfumariweke hi mina ni lava ngi ndzi ri na vona.

³⁵Ndzi mi kombisile eswilweni hinkwaswo leswaku hi ku tirhisa sweswo, ku fanekele ku pfuniwa lavo tsana, ni ku anakanya rito ra Hosi Yesu, leri a nga ri vula hi xiviri xa yena, loko a te: ‘Ku nyika, i ku kateka loku tlurisaka ku nyikiwa.’ ”

³⁶Kuteloko a vulavurile timhaka teto, a khinsama hi matsolo a khongela na vona hinkwavo.

³⁷Kavaloko hinkwavo va khomiwa hi ku rila ngopfungopfu, kutani va tiwisela enhan'wini ya Pawulo, va n'wi ntswontswa.

³⁸Ngopfu va tela hi nhlomulo hikwalaho ka mhaka leyi a nga va byela yona, leyi a nga te: Va nga ka va nga ha voni mombo wa yena. Kutani va n'wi heleketa engalaveni.