Read Xitsonga Acts 25 Bible Online

Acts 25 - Xitsonga bible

Acts 25

¹Kakuloko Festo a fikile etikweni lero, a tshama eKhezariya masiku manharhu, kutani a tlhandlukela eYerusalema.

²Kavaloko muprista lonkulu ni vakulukumba va Vayuda va ta emahlweni ka yena ku ta hehla Pawulo;

³va n'wi khongela leswaku a va tsakisa hi ku n'wi rhumela eYerusalema; kasi va n'wi lavelele leswaku va ta n'wi dlaya endleleni.

⁴Kambe Festo a va hlamula leswaku Pawulo wa rindziwa eKhezariya; kambe a ku, na yena u ta hatlisa a ngirimelela kona.

⁵A engeta a ku: “Lava swi va fanelaka eka n'wina, a va fambe kun'we na mina; kungakuloko nandzu wun'wana wu ri kona eka wanuna yeloyi, a va n'wi hehle.”

⁶Kuteloko a xwile na vona masiku lama nga tluriki ntlhanu na manharhu kumbe khume, a ngirimelela eKhezariya. Hi siku leri tlhandlamaka, a tshama exitshan'weni xa ku avanyisa, kutani a lerisa leswaku Pawulo a tisiwa.

⁷Loko a fikile, Vayuda lava pfaka eYerusalema, va n'wi rhendzela, kutani va lumbeta Pawulo hi milandzu leyo tala, leyo chavisa, leyi va hlulekeke ku yi kombisa swinene.

⁸Kambe Pawulo a tihlamulela, a ku: “A ndzi dyohelangi nawu, hambi yi ri tempele, ni loko a ri Khezari.”

⁹Kambe, hikuva Festo a a rhandza ku tsakisa Vayuda, a hlamula Pawulo a ku: “Xana u rhandza ku tlhandlukela eYerusalema, ku ya avanyisiwa kona hi timhaka teto emahlweni ka mina xana?”

¹⁰Kavaloko Pawulo a ku: “Ndzi yimile ehubyeni ya Khezari, laha ndzi faneleke ku avanyisiwa kona; loko ku ri ka Vayuda, a ndzi endlanga swo homboloka, hilaha u swi tivaka swinene na wena.

¹¹Loko ndzi endlile swo homboloka eka un'wana, kumbe loko ndzi endlile xin'wana lexi fanelaka rifu, a ndzi ari ku fa, kambe loko swi nga ri tano etimhakeni leti va ndzi hehlaka ha tona, a ku na munhu la nga ndzi nyiketaka vona; ndzi tiveka eka Khezari.”

¹²Kutani Festo, loko a kanerile mhaka leyi ni huvo, a ku eka yena: “U tivekile eka Khezari, u ta ya eka Khezari.”

¹³Kuteloko ku hundzile masiku ma nga ri mangani, hosi Agripa na Berenika va ta eKhezariya ku xeweta Festo.

¹⁴Kuteloko va xwile kona masiku man'wana, Festo a byela hosi timhaka ta Pawulo a ku: “Munhu u kona la, loyi Felikisi a n'wi siyeke a bohiwile.

¹⁵Loko ndzi ri eYerusalema, vaprista lavakulu ni vakulukumba va Vayuda, va n'wi hehlile eka mina, va kombela leswaku a avanyisiwa,

¹⁶kambe ndzi hlamula, ndzi ku: A hi mukhuva wa Varhoma ku nyiketa munhu, hambi a ri mani na mani, la hehliwaka, a nga si nyikiwa nkarhi wa ku tihlamulela eka leti a hehliwaka ha tona.

¹⁷Hikwalaho, kuteloko va fikile halenu, a ndzi hlwelanga, kambe siku leri tlhandlamaka, ndzi hatla ndzi ya tshama ehubyeni, ndzi lerisa leswaku wanuna yeloyi a tisiwa.

¹⁸Kutani loko vahehli va yena va yima, a va humesanga mhaka, hambi yi ri yin'we ya leti ingi ndzi ti langutele,

¹⁹kambe a va ri ni ku kanetana ehenhla ka swo khongela swa vona ntsena, ni le henhla ka un'wana la feke, loyi va nge i Yesu, loyi Pawulo a nga tiyisa leswaku wa hanya.

²⁰Kambe hikuva a ndzi kanakanisiwa hi timhaka teto, ndzi n'wi vutisa leswaku xana a nga ka a nga yi Yerusalema ku ya avanyiseriwa kona timhaka teto;

²¹kambe Pawulo u tivekile eka Awugusto, a ku, mhaka ya yena yi hlayiseriwa ku avanyisiwa hi yena; kutani sweswi, ndzi lerisile leswaku a laveleriwa ku fikela siku ndzi n'wi rhumelaka eka Khezari.”

²²Kavaloko Agripa a ku eka Festo: “Na mina ndzi nga rhandza ku twa munhu yeloyi.” Yena a ku: “Mundzuku, u ta n'wi twa.”

²³Hi siku leri tlhandlamaka, Agripa na Berenika, va ta hi xidzumo lexikulu, kuteloko va nghenile ehubyeni, ni tindhuna letikulu ta nyimpi, ni vakulukumba va muti, Pawulo a tisiwa hi ku lerisa ka Festo.

²⁴Kavaloko Festo a ku: “Hosi Agripa, na n'wina vavanuna lava nga na hina kwala, ma n'wi vona loyi vunyingi bya Vayuda byi teke ku n'wi hehla eka mina, ni le Yerusalema, ni halenu, va ba huwa va ku a nga ha faneli ku hanya.

²⁵Loko ndzi ri mina, loko ndzi kumile leswaku a nga endlangi nchumu lowu fanelaka hi ku fa, na yena leswi a tivekeke eka Awugusto, ndzi avanyisile leswaku a rhumeriwa eka yena.

²⁶Kambe ndzi pfumarile mhaka leyi tiyeke, leyi ndzi nga yi tsalelaka hosi; hikwalaho ndzi n'wi tiseke eka n'wina, ngopfu emahlweni ka wena, hosi Agripa, leswaku loko ku vutisiwile timhaka ta yena, ndzi ta tiva leswi ndzi nga ta swi tsala ehenhla ka yena.

²⁷Hikuva a ndzi ku, a hi mhaka leyinene ku yisa munhu la bohiweke, loko ku nga vuriwi timhaka leti a hehliwaka ha tona.”