Read Xitsonga Acts 28 Bible Online

Acts 28 - Xitsonga bible

Acts 28

¹Kuteloko va ponisile xisweswo, va tiva leswaku xihlale xi vuriwa Melita.

²Kambe Vabarbara va kona va hi endla hi tintswalo letikulu, hikuva va hi amukela hinkwerhu, va kondza va hi tshivelela ndzilo lowukulu, hikuva mpfula a yi na, ni xirhami a xi ri kona.

³Kuteloko Pawulo a rhotela mahlahla ya mavhinya, a ma hoxa endzilweni, nyoka yi huma kona hi ku kufumela, yi namarhela voko ra yena.

⁴Kutani Vabarbara, loko va vona xivandzana xexo xi lengalenga evokweni ra yena, va byelana, va ku: “Munhu loyi, i mudlayi kunene, hikuva hambi a ponile ematini, ku rihisa ka tilo ku ala leswaku a hanya.”

⁵Kambe Pawulo a phumunhela xivandzana endzilweni, a nga vaviseki ha nchumu.

⁶Kasi a va langutele leswaku a ta pfimba, kumbe a ta wa kan'we ehansi, a fa, kambe kuteloko va langutele ngopfu, kutani va vona leswaku a nga dyiwi hi nchumu, va hundzuka, va ku: “I xikwembu xin'wana.”

⁷Ekusuhi ni xivandla lexi, a ku ri ni tiko ra nkulukumba wa xihlale, loyi va nge i Publio; na yena a hi amukela swinene, a hi rhurhela endlwini ya yena hi masiku manharhu.

⁸Kutani va kuma tata wa Publio a etlele a vabya hi nhloko ni le ndzeni. Pawulo a nghena eka yena, kuteloko a khongele, a n'wi tlhandleka mavoko ehenhla, a n'wi hanyisa.

⁹Loko ku humelela teto, hinkwavo lava nga exihlaleni lava vabyaka, va ta na vona, kutani va hanyisiwa.

¹⁰Kutani va hi fundzha hi xichavo lexikulu; kambe siku hi sukaka, va hi longela leswi hi swi pfumaleke.

¹¹Tin'hweti tinharhu loko ti hundzile hi famba hi ngalava ya Aleksandriya leyi ingi yi pindzukile vusika exihlaleni, yi ri ni xifaniso xa Vadiyoskuro.

¹²Kutani loko hi fikile eSirakusa, hi xwa masiku manharhu kona.

¹³Loko hi huma kona, hi tingatinga hi ko hi fika eRegiyo. Kute nimixo mheho ya dzonga yi pfuka, kutani hi ya fika ePuteyoli hi masiku mambirhi.

¹⁴Kona hi kuma vamakwerhu lava nga hi khongela leswaku hi xwa ntlhanu wa masiku ni masiku mambirhi na vona; kavaloko hi ya eRhoma.

¹⁵Na kona, loko vamakwerhu va twa timhaka ta hina, va ta ta hlangana na hina entsendzeleni wa Apiyo ni Tihotela Tinharhu; kuteloko Pawulo a va vona, a khensa Xikwembu, a tiyisa mbilu.

¹⁶Kutani, siku hi fikaka eRhoma, ndhuna ya dzana yi nyiketa vabohiwa emavokweni ya ndhuna ya valanguteri; Pawulo yena, a pfumeleriwa ku tshama a ri swakwe ni nhenha leyi n'wi langutelaka.

¹⁷Endzhaku ka masiku manharhu, Pawulo a rhamba lava nga vakulukumba exikarhi ka Vayuda, kuteloko va hlengeletene, a ku eka vona: “Vavanuna varikwerhu, hambi ndzi nga endlanga nchumu ku dyohela tiko, hambi yi ri mikhuva ya vatatana, hambiswiritano, ndzi bohiwile eYerusalema, ndzi nyeketiwa emavokweni ya Varhoma.

¹⁸Volavo, kungakuloko va ndzi vutisile va rhandza ku ndzi tshunxa hikuva a ku nga ri na mhaka eka mina leyi fanekelaka hi rifu.

¹⁹Kambe hi leswi Vayuda va nga ala, hilaha ndzi nga tiveka emandleni ya Khezari, swi nga ri leswaku ndzi ni lexi ndzi nga hehlaka tiko ra rikwerhu ha xona.

²⁰Hikwalaho ndzi mi viteke ku ta mi vona ni ku vulavula na n'wina, hikuva ndzi bohiwile hi mpecana leyi, hikwalaho ka ku tshemba ka Israele.”

²¹Va ku eka yena: “A hi si vona mapapila lama pfaka eYudiya lama vulaka timhaka ta wena, hambi va ri vamakwerhu, a ku na un'we la teke ku hi byela, hambi a ri la humeseke mhaka yo biha ehenhla ka wena.

²²Kutani hi fanele ku twa ha wena leswi u swi ehleketaka, hikuva loko yi ri dyondzo leyi, ha yi tiva leswaku yi ariwa hinkwako.”

²³Kuteloko va n'wi vekele siku, va ta eka yena va telenyanile, endlwini leyi a tshameke eka yona. Kutani a va hlamusela ta ku fuma ka Xikwembu, a vula vumbhoni eka vona, a va khorwisa ta Yesu, hi le nawini wa Muxe ni le vaprofeteni, a sungula nimixo ku fikela nimadyambu.

²⁴Kutani van'wana va pfumela hi leswi vuriwaka, kambe van'wana va nga pfumeri.

²⁵Kutani, hikuva a va nga twanani, va hambana loko Pawulo a va byerile mhaka leyi, yi ri yin'we, a te: “Moya lowo Kwetsima wu vurisile hi nomu wa muprofeta Esaya eka vatata wa hina, wu ku:

²⁶‘Famba eka tiko leri, u ku eka rona: Loko ku ri ku yingisa, mi ta yingisa, kambe mi nga ka mi nga twisisi; loko ku ri ku vona, mi ta vona, kambe mi nga ka mi nga vonisisi;

²⁷hikuva mbilu ya tiko leri, yi nonisiwile tindleve ta rona ta nonon'hwa ku yingisa, ri swinyile mahlo leswaku ri nga ti vona hi mahlo, ri nga ti twa hi tindleve, ri nga ti swi twa hi mbilu, ri nga ti hundzuka, kutani ndzi nga ti ri hanyisa.’

²⁸Tivani kwalaho leswaku ku hlayiseka ka Xikwembu ku rhumeriwile vamatiko, kutani vona va ta ku yingisa.”

²⁹Kuteloko a va byerile sweswo, Vayuda va tifambela, ku kanetana ku ri lokukulu exikarhi ka vona.

³⁰Kutani Pawulo a pindzuka malembe mambirhi endlwini leyi a nga yi lomba. Kambe a amukela kona hinkwavo lava taka ka yena,

³¹a vula ku fuma ka Xikwembu, a dyondzisa ni ta Hosi Yesu hi ku tiya hinkwako, a nga siveriwi ha nchumu.