Read Xitsonga Acts 4 Bible Online

Acts 4 - Xitsonga bible

Acts 4

¹Loko va ha vulavula ni vanhu, ku fika vaprista eka vona, va ri ni ndhuna ya tempele ni Vasaduki;

²va holova etimbilwini, hi leswi Petro na Yohane va dyondzisaka vanhu, ni ku vula ku pfuka ka vafi ha Yesu.

³Kutani va va khoma, va va nghenisa ekhotsweni ri ko ri xa, hikuva a ma ri madyambu.

⁴Hambiswiritano, lavo tala va lava tweke rito, va pfumela: ntsengo wa vavanuna wu lava ku va ntlhanu wa makume ya madzana (5 000).

⁵Kambe siku leri tlhandlamaka, tihosi ta tiko, ni vakulukumba, ni vatsari va hlengeletana eYerusalema,

⁶va ri na Anasi muprista lonkulu, na Kayafasi, na Yohane, na Aleksandro, ni hinkwavo va rixaka ra vaprista lavakulu.

⁷Kuteloko va va yimisile exikarhi ka vona, va va vutisa, va ku: “Mi endlisile sweswo hi matimba wahi xana, kumbe hi vito rihi?”

⁸Kavaloko Petro a vulavula na vona a tele Moya lowo Kwetsima, a ku: “Tihosi ta tiko, na n'wina vakulu va Israele,

⁹leswi hi rhambiweke namuntlha hikwalaho ka mhaka leyinene leyi endliweke eka munhu lowa muvabyi, leswaku ku tiviwa hilaha a hanyisiweke hakona,

¹⁰tivani n'wina hinkwenu, ni hinkwavo va tiko ra Israele, leswaku munhu loyi a yimeke emahlweni ka n'wina, u hanyisiwile hi vito ra Yesu Kriste wa Nazareta la vambiweke hi n'wina, kambe Xikwembu xi n'wi pfuxile eku feni.

¹¹Hi yena ribye leri cukumetiweke hi n'wina vaaki, kambe ri endliwile ribye lero sungula ra yinhla.

¹²Kutani a ku na ku hlayiseka ka un'wana, hikuva a ku na vito rimbe ehansi ka matilo, leri nyikiweke exikarhi ka vanhu, leri hi fanelaka ku hanyisiwa ha rona.”

¹³Kuteloko va vona ku tiya ka Petro na Yohane, kasi a va tiva leswaku i vanhu lava nga dyondzangiki, va ri vanhu ntsena, va hlamala; kambe va va tiva leswaku a va tshamile na Yesu.

¹⁴Kutani loko va vona munhu la hanyisiweke, a yimile na vona, va pfumala lexi va nga xi kanetaka.

¹⁵Kutani, kuteloko va va lerisile ku huma ehubyeni, va vutisana, va ku: “Vanhu lava, hi ta va endla yini?

¹⁶Hikuva i mhaka leyi tiviwaka hi vanhu hinkwavo lava akeke eYerusalema, leswaku mahlori ma endliwile hi vona; swa vonaka swinene, hi nga ka hi nga landzuri.

¹⁷Kambe leswaku timhaka leti, ti nga tshuki ti engeta ti hangalaka exikarhi ka vanhu, a hi va layeni hi ku va chavisa, leswaku va nga ha tshami va dyondzisa munhu, hambi a ri mani na mani, hi vito rero.”

¹⁸Kuteloko va va vitanile va va lerisa ngopfu, leswaku va nga tshuki va vulavula, hambi ku ri ku dyondzisa hi vito ra Yesu.

¹⁹Kambe Petro na Yohane va va hlamula, va ku: “A ku avanyise n'wina: xana swi lulamile emahlweni ka Xikwembu ku yingisa n'wina ku tlula Xikwembu xana?

²⁰Hikuva, loko hi ri hina, hi nga ka hi nga tshiki ku vula leswi hi swi voneke ni leswi hi swi tweke.”

²¹Kutani va va tshunxa va ri karhi va va holovela, va nga voni hilaha va nga va baka hakona hikwalaho ka tiko, hikuva hinkwavo a va dzunisa Xikwembu hikwalaho ka leswi endliweke.

²²Hikuva munhu loyi a nga hanyisiwa hi masingita walawo, a a ri wa malembe lama tlulaka mune wa makume.

²³Kuteloko va tshunxiwile va tlhelela eka varikwavo, kutani va va tivisa hinkwaswo leswi nga vuriwa hi vaprista lavakulu, ni vakulukumba va tiko.

²⁴Volavo, loko va twile sweswo, va tlakusa marito ya vona eka Xikwembu hi mbilu yi ri yin'we va ku: “Hosi, hi wena Xikwembu lexi endleke tilo, ni misava, ni lwandle, ni hinkwaswo leswi nga eka swona; u vurile hi nomu wa Davhida, nandza wa wena u ku:

²⁵‘Xana vamatiko va dzumadzumela yini, ni matiko ma kanelela yini timhaka ta hava?

²⁶Tihosi ta misava ti pfukile, ni tindhuna ti hlangene kun'we ku lwa ni Hosi, na Kriste wa yona.’

²⁷Hikuva kunene Heroda na Pontiyo Pilato, ni vamatiko, ni tinxaka ta Israele va hlangene kun'we emutini lowo, ku lwa na Yesu, nandza wa wena la hlawuriweke, loyi u nga n'wi tota,

²⁸ku endla hinkwaswo leswi voko ra wena ni makungu ya wena ma swi leriseke eku sunguleni leswaku swi ta humelela.

²⁹Kutani sweswi, Hosi, languta ku xungeta ka vona, u nyika malandza ya wena ku vula rito ra wena, va nga chavi nchumu;

³⁰u tshambuluta voko ra wena leswaku ku ta endliwa ku hanyisiwa, ni swikombiso, ni masingita hi vito ra Yesu, nandza wa wena la hlawuriweke.”

³¹Kuteloko va khongerile, xivandla lexi va hlengeletaneke eka xona, xi tsekatseka, kutani hinkwavo va tala Moya lowo Kwetsima, kutani va vula rito ra Xikwembu hi ku tiya.

³²Kambe vunyingi bya lava pfumeleke a yi ri mbilu yin'we ni moya wun'we ntsena; kutani a ku nga ri na munhu la nga vula leswaku swilo leswi a nga na swona, i swa yena swakwe kambe swilo hinkwaswo a va ku i swa vona hinkwavo.

³³Vaapostola a va ri karhi va tiyisa hi matimba lamakulu vumbhoni bya ku pfuka ka Hosi Yesu, kutani ku kateka lokukulu a ku tshama ehenhla ka vona hinkwavo.

³⁴Hikuva a ku nga ri na xisiwana exikarhi ka vona, hikuva hinkwavo lava ngi va ri ni masimu, kumbe tindlu, a va swi xavisa, kutani va tisa mali ya leswi xavisiweke,

³⁵va yi veka emilengeni ya vaapostola, kutani va avela un'wana ni un'wana hilaha a pfumaleke hakona.

³⁶Yena Yose, la nga thyiwa Barnaba hi vaapostola, hileswaku N'wana wa ku Chavelela, loyi ingi a ri Mulevhi la tswariweke eKipra,

³⁷a a ri ni nsimu, kuteloko a yi xavisile, a tisa nxavo wa yona, a wu veka emilengeni ya vaapostola.