Read Xitsonga Acts 5 Bible Online

Acts 5 - Xitsonga bible

Acts 5

¹Kambe wanuna la vuriwaka Ananiya, a ri na Safira, nsati wa yena, a xavisa nsimu;

²kuteloko a tipambulele mali ya yona, hi ku pfumelelana ni nsati wa yena; a tisa leswi seleke, a swi veka emilengeni ya vaapostola.

³Kambe Petro a ku eka yena: “Ananiya, Satana u tatise ku yini mbilu ya wena, leswaku u hembela Moya lowo Kwetsima, ni ku tipambulela mali ya nsimu hitlhelo?

⁴A ndzi ku: Nsimu, ni loko u tihlayisele yona, a yi nga ri ya wena-ke? Ni loko yi xavisiwile, nxavo wa yona a wu nga ri wa wena-ke? Mhaka leyi, u yi nghenisise ku yini embilwini ya wena? A ku hembelangi vanhu, kambe u hembele Xikwembu.”

⁵Kakuloko Ananiya a twa marito walawo, a wela ehansi, a hlala. Kutani vayingisi hinkwavo, va khomiwa hi ku chava lokukulu.

⁶Kavaloko majaha ma yima, ma n'wi phutsela, kutani ma n'wi teka ku ya n'wi lahla.

⁷Loko ku hundzile mikarhi leyi lavaka ku va minharhu, nsati wa yena a nghena, a nga tivi leswi humeleleke.

⁸Kutani Petro a n'wi vutisa, a ku: “Ndzi byele, xana nsimu mi yi xavisile hi sweswo xana?” A ku: “E, hi sweswo.”

⁹Petro a ku eka yena: “Mi pfumelelane hi ku yini ku ringa Moya wa Hosi xana? Vona, milenge ya lava nga lahla nuna wa wena hi leyi enyangweni, na wena va ta ku teka.”

¹⁰Kutani hi nomu lowu a wela emilengeni ya yena, a hlala. Kakuloko majaha ma nghenile, ma n'wi kuma a file, kutani va ya n'wi lahla eka nuna wa yena.

¹¹Kutani ku chava lokukulu ku va kona ekerekeni hinkwayo, ni vanhwini hinkwavo lava tweke timhaka leti.

¹²Kambe swikombiso ni masingita leswo tala a swi endliwa exikarhi ka vanhu hi mavoko ya vaapostola. Kutani hinkwavo a va hlengeletana erikupakupeni ra Solomoni, va ri mbilu yin'we.

¹³Exikarhi ka van'wana, a ku nga ri na munhu la tiyisaka mbilu ku hlangana na vona; kambe tiko ri va dzunisa ngopfu.

¹⁴Kutani vunyingi bya lava pfumeleke eka Hosi, a byi ri karhi byi engeteleleka hi vavanuna ni vavasati:

¹⁵va ko va tisa lava vabyaka emitsendzeleni, va vekiwa etinhlakeni nemasangwini, leswaku loko Petro a hundza van'wana va vona va ta funengetiwa hi ndzhuti wa yena.

¹⁶Ni vanhu va miti leyi ya matlhelo, va ta eYerusalema, va tele, va tisa vavabyi ni lava karhatiwaka hi mimoya leya thyaka; kutani a va hanyisiwa hinkwavo.

¹⁷Kutani muprista lonkulu a yima ni hinkwavo lava ngi va ri na yena (a va ri va dyondzo leyo hambuka ya Vasaduki), va tele mona,

¹⁸va khoma vaapostola, va va nghenisa ekhotsweni ra muti.

¹⁹Kambe ntsumi ya Hosi yi pfula tinyangwa ta khotso nivusiku, yi va humesela ehandle, yi ku:

²⁰“Fambani, mi ya humelela etempeleni, mi byela vanhu timhaka hinkwato ta vutomi lebyi.”

²¹Kuteloko va twile sweswo, va nghena etempeleni loko ri xa, kutani va dyondzisa kona.

²²Kambe muprista lonkulu ni lava ngi va ri na yena, loko va fika, va hlengeleta huvo ni vakulukumba hinkwavo va vana va Israele, kutani va rhuma vanhu ekhotsweni ku ya teka vaapostola. Kambe malandza loko ma fika ekhotsweni, ma kuma vaapostola va nga ri kona; kutani va tlhela, va ya amba mahungu, va ku:

²³“Hi kumile khotso ri pfariwile swinene, ni valanguteri va yimile enyangweni ya khotso; kambe loko hi pfula, hi kumile ku nga ri na munhu kona.”

²⁴Hosi ya valanguteri va tempele ni vaprista lavakulu, loko va twa marito walawo, va tshuka ha wona, va ku: “Mhaka leyi, yi ta helela kwihi?”

²⁵Kutani ku fika un'wana, a va byela mahungu, a ku: “Vanhu lava mi va ngheniseke ekhotsweni, hi lavaya, va yimile etempeleni, va dyondzisa vanhu.”

²⁶Kavaloko hosi ya valanguteri va tempele ni malandza ya huvo, va famba va ya va teka, kambe va nga va endli hi matimba, hikuva a va chava ku khandliwa hi maribye hi vanhu.

²⁷Kuteloko va tile na vona, va va yimisa exikarhi ka huvo; kutani muprista lonkulu a va vutisa, a ku:

²⁸“Xana a hi mi lerisanga ngopfungopfu leswaku mi nga tshuki mi dyondzisa hi vito lero xana? Hambiswiritano, mi tatile Yerusalema hi dyondzo ya n'wina, kutani mi rhandza ku tisa ngati ya munhu loyi, henhla ka hina.”

²⁹Kambe Petro ni vaapostola van'wana va hlamula, va ku: “Swa hi fanela ku yingisa Xikwembu, ku tlula vanhu.

³⁰Xikwembu xa vatata wa hina xi pfuxile Yesu, loyi mi nga n'wi dlaya hi ku n'wi hayeka emhandzeni.

³¹Hi yena loyi Xikwembu xi nga n'wi tlakusela evokweni ra xona ra xinene leswaku a va yena Hosi ni Muponisi, a ta nyika Israele ku hundzuka ni ku khomeriwa ka swidyoho.

³²Kutani hina hi timbhoni ta timhaka leti, hina na wona Moya lowo Kwetsima, lowu Xikwembu xi wu nyikeke lava xi yingisaka.”

³³Kakuloko va twa sweswo, va kariha ngopfungopfu, kutani va kanela ku va dlaya.

³⁴Kambe Mufarisi un'wana, lo va nge i Gamaliele, mudyondzisi wa nawu, la dzunisiwaka hi tiko hinkwaro, a yima ehubyeni, kutani a lerisa leswaku vaapostola va humeseriwa ehandle nkarhinyana.

³⁵Kutani a ku eka vona: “Vavanuna va Israele, tivoneleni lexi mi nga ta xi endla eka vanhu lava,

³⁶hikuva khalenyana ku humelele Tudasi, la tivekeke lonkulu, a tatiwa hi vanhu lava laveke ku va mune wa madzana; kambe a dlawa, kutani lava nga yima na yena va hangalasiwa hinkwavo, va hela.

³⁷Endzhaku ka yena ku humelela Yudasi wa Galeliya, enkarhini wa ku tsariwa ka vanhu, kutani a titekela tiko lerikulunyana, kambe, na yena a lova, ni lava n'wi yingiseke va hangalasiwa hinkwavo,

³⁸sweswi ndzi ri eka n'wina, tshikani ku landzelela vanhu lava, mi hambana na vona; hikuva makungu lawa, hambi ntirho lowu, loko wu huma eka vanhu, wu ta hela;

³⁹kambe loko wu huma eka Xikwembu, mi nga ka mi nga wu herisi; kutani mi tivonela leswaku mi nga tshuki mi kumiwa mi lwile ni Xikwembu.”

⁴⁰Kutani va n'wi yingisa. Kakuloko va vitanile vaapostola, va va ba hi mikhavi; kutani va va lerisa leswaku va nga tshuki va dyondzisa hi vito ra Yesu, kutani va va tshunxa.

⁴¹Kutani vaapostola va suka emahlweni ka huvo, va tsakile hikuva a va endliwile lava fanelaka hi ku xanisiwa hikwalaho ka vito ra Yesu.

⁴²Kutani a va rhutelanga hi masiku hinkwawo ku dyondzisa ni ku vula Evhangeli etempeleni, ni le tindlwini va ku: “Yesu i Kriste.”