Read Xitsonga Romans 10 Bible Online

Romans 10 - Xitsonga bible

Romans 10

¹Vamakwerhu, ku navela ka mbilu ya mina ni mikhongelo leyi ndzi yi endlelaka Vaisraele eka Xikwembu, hileswaku va ponisiwa.

²Hikuva ndzi mbhoni ya vona, ndzi ri: Va hisekela Xikwembu, kambe ku nga ri hi ku tiva;

³hikuva hi ku ka va nga tivi ku lulama ka Xikwembu, va lavile ku yimisa ku lulama ka vona; hikwalaho a va tivekanga ehansi ka ku lulama ka Xikwembu.

⁴Hikuva ku hela ka nawu i Kriste la nyikaka ku lulama eka mani na mani la pfumelaka eka yena.

⁵Hikuva Muxe u ringanisile ku lulama loku humaka enawini, loko a te: “Munhu la endlaka swilo leswo, u ta hanya ha swona!”

⁶Kambe ku lulama loku humaka eku pfumeleni, ku vula leswaku: U nga tshuki u ku embilwini ya wena: “I mani la nga ta tlhandlukela etilweni?” Ku vula sweswo, i ku xikisa Kriste;

⁷kumbe, “I mani la nga ta rhelela eku enteni?” Ku vula sweswo i ku humesa Kriste evafini.

⁸Kambe ku lulama ku ri yini xana? Ku ri: Rito ri kusuhi na wena, ri le non'wini wa wena, ni le mbilwini ya wena. Hi rona rito ra ku pfumela, leri hi mi byelaka rona.

⁹Hikuva loko u vula hi nomu wa wena leswaku Yesu i Hosi, ni loko u pfumela embilwini ya wena leswaku Xikwembu xi n'wi pfuxile eku feni, u ta ponisiwa.

¹⁰Hikuva munhu u kuma ku lulama hi ku pfumela hi mbilu, kutani u kuma ku ponisiwa hi ku vula hi nomu.

¹¹Hikuva Tsalwa ri te: “Mani na mani la pfumelaka eka yena, a nga ka a nga khomiwi hi tingana.”

¹²Hikuva a ku na ku hambana eka Muyuda ni Mugriki, hikuva hinkwavo va ni Hosi yin'we, leyi fuwelaka hinkwavo lava kombelaka eka yona.

¹³Hikuva “mani na mani la khongelaka hi vito ra Hosi, u ta ponisiwa.”

¹⁴Kambe va ta khongerisa ku yini eka loyi va nga pfumeriki eka yena? Va ta pfumerisa ku yini eka loyi va nga twangiki timhaka ta yena? Va ta ti tivisa ku yini, loko mudyondzisi a nga ri kona?

¹⁵Kutani va ta dyondzisisa ku yini, loko va nga rhumiwi! Hilaha ku tsariweke leswaku: “Milenge ya lava vulaka Evhangeli ya ku rhula yi sasekile swonghasi; milenge ya lava vulaka timhaka leto saseka!”

¹⁶Kambe a hi hinkwavo lava yingiseke Evhangeli, hikuva Esaya u te: “Hosi, i mani la pfumeleke ku dyondzisa ka hina?”

¹⁷Kunene ku pfumela, ku ta hi ku yingisa, kutani ku yingisa ku ta hi rito ra Xikwembu.

¹⁸Kambe ndzi ri: “Xana a va ri twanga xana?” E-e va ri twile: “Mpfumawulo wa vona wu vile emisaveni hinkwayo, ni marito ya vona ma twakale emakun'wini ya misava.”

¹⁹Kambe ndzi ri: “Xana Israele a nga swi tivanga xana?” Muxe u sungurile, a ku: “Ndzi ta mi pfuxela rilondzo hi tiko leri nga riki ra nchumu; ndzi ta mi karihisa hi tiko leri nga riki na ku twisisa.”

²⁰Kutani Esaya a tiyisa ngopfu, a ku: “Ndzi kumiwile hi lava va nga ndzi lavangiki; ndzi tikombisile eka lava ingi ndzi nga vutisiwi hi vona.”

²¹Kambe loko a ringanisa Israele, u te: “Siku hinkwaro ndzi tshambulutile mavoko ya mina eka tiko leri nga yingisiki.”