Read Xitsonga Romans 13 Bible Online

Romans 13 - Xitsonga bible

Romans 13

¹Munhu un'wana ni un'wana a a yingise vuhosi; hikuva a ku na vuhosi lebyi nga humiki eka Xikwembu; kutani tihosi leti nga kona, ti vekiwile hi Xikwembu.

²Hikwalaho la alaka vuhosi, u ala nawu wa Xikwembu, kutani lava wu alaka, va tikokela ku avanyisiwa ehenhla ka vona.

³Hikuva lava fumaka a va chaviwi hi lava endlaka swinene, kambe va chaviwa hi lava endlaka swo biha. Xana u rhandza leswaku u nga chavi vuhosi? Endla swinene, u ta khensiwa hi byona,

⁴hikuva hosi i nandza wa Xikwembu ku ku endlela swo saseka; kambe loko u endla swo biha, u fanele ku chava, hikuva hosi a yi tamelanga fumu ntsena; hikuva i nandza wa Xikwembu, ni murisi la vekiweke ku ba lava endlaka swo biha.

⁵Hikwalaho mi fanele ku tiveka ehansi ka vuhosi, ku nga ri hikwalaho ka ku chava ku biwa ntsena, kambe hikwalaho ka ripfalo.

⁶Hikwalaho mi humesaka ndzuvo; hikuva tihosi, i vatirhi va Xikwembu lava tiyiselaka entirhweni wa vona hi mikarhi.

⁷Nyikani vanhu hinkwavo leswi va fanelaka; la fanelaka ku nyikiwa ndzuvo, mi n'wi ha ndzuvo; la fanelaka ku kungiwa, mi n'wi kunga; la fanelaka ku chaviwa, mi n'wi chava; la fanelaka ku fundzhiwa, mi n'wi fundzha.

⁸Mi nga tshuki mi va ni nandzu eka munhu, loko wu nga ri wa ku rhandzana hikuva la rhandzaka van'wana, hi yena la hetiseke nawu.

⁹Hikuva milawu leyi nge: “U nga tshuki u oswa; u nga tshuki u dlaya; u nga tshuki u yiva; u nga tshuki u lumbeta warikwenu; u nga tshuki u navela swilo swa un'wana”; hambi wu ri nawu wihi ni wihi lowu nga kona, wu katsakanyiwa hi rito leri nge: “Rhandza warikwenu kukota loko u tirhandza.”

¹⁰Rirhandzu a ri endli warikwavo swo biha hikwalaho rirhandzu i ku hetiseka ka nawu.

¹¹A hi tiyiseleni kona, hikuva ha tiva mikarhi leswaku hi wona nkarhi wa ku pfuka evurhongweni; hikuva loko ku ri namuntlha, ku hlayiseka ku kusuhi ku tlula siku hi pfumeleke.

¹²Vusiku byi hundzile, dyambu ri tshinele; a hi cukumeteni hakona mitirho ya munyama, kutani hi hakarha matlhari ya ku vonakala.

¹³A hi fambeni hi mukhuva lowu fanelaka, kukota vanhu lava fambaka ninhlekanhi, ku nga ri hi mahlomi ni ku pyopyiwa, ni vuoswi, ni vumbhisa, ni timholovo, ni mona;

¹⁴kambe mi tifunengeta ha Hosi Yesu Kriste, kutani mi nga tsetseleri nyama hi ku yi xurhisa eku naveleni ka yona.