Read Xitsonga Romans 14 Bible Online

Romans 14 - Xitsonga bible

Romans 14

¹Loko a ri la tsaneke eku pfumeleni, mi n'wi amukela, mi nga tengisani na yena etimhakeni.

²Hikuva un'wana u ri a nga dya swilo hinkwaswo, kasi un'wana la tsaneke u dya matsavu ntsena:

³La dyaka hinkwaswo a nga tshuki a sola la nga dyiki hinkwaswo, kutani la nga dyiki hinkwaswo, na yena, a nga tshuki a avanyisa la dyaka hinkwaswo, hikuva Xikwembu xi n'wi amukele.

⁴Xana u mani, wena la avanyisaka nandza wa un'wana? Hambi a yima, hambi a khunguvanyeka, swi tiviwa hi n'wini wa yena; kambe u ta yima, hikuva Hosi yi ni matimba ku n'wi yimisa.

⁵Un'wana a pimanisa siku rin'wana leswaku hi lerikulu eka man'wana; kasi un'wana u ri: Masiku hinkwawo ma ringana. Un'wana ni un'wana a a khorwisisiwe embilwini ya yena.

⁶La hlawulaka siku, u ri hlawulela Hosi. La dyaka hinkwaswo, u dya hikwalaho ka Hosi, hikuva u khensa Xikwembu; na yena la nga dyiki hinkwaswo, a nga dyi hikwalaho ka Hosi, kutani a khensa Xikwembu ha swona.

⁷Hikuva a ku na munhu eka hina la tihanyelaka, na swona a ku na munhu la tifelaka.

⁸Hikuva hambi hi hanya, hi hanyela Hosi; hambi hi fa, hi fela Hosi; hikwalaho, hambi hi hanya, hambi hi fa, hi va Hosi.

⁹Hikuva Kriste u file, kambe u tlhele a hanya, leswaku a va yena la fumaka vafi ni lava hanyaka.

¹⁰Kambe wena u avanyisela yini makwenu? Kumbe wena u solela yini makwenu? Kasi hinkwerhu hi ta yima eku avanyisiweni ka Xikwembu.

¹¹Hikuva ku tsariwile leswaku: “Hi wena la hanyaka; ku vula Hosi; matsolo hinkwawo ma ta khinsama emahlweni ka wena, ni tindzimi hinkwato ti ta dzunisa Xikwembu.”

¹²Hi mukhuva wolowo, un'wana ni un'wana wa hina u ta tihlamulela swa yena eka Xikwembu.

¹³Loko swi ri tano, a hi tshikeni ku avanyisana, kambe avanyisani leswaku mi nga vekeri vamakwenu xikhunguvanyiso ni ribye leri wisaka.

¹⁴Ndza swi tiva, ndzi va ndzi kholwa ha Hosi Yesu, leswaku a ku na xilo lexi nyameke hi xiviri xa xona; kambe kungakuloko munhu a anakanya leswaku xilo xin'wana xi nyamile, xi nyamele yena.

¹⁵Kambe loko u khomisa makwenu tingana hi swakudya, kwalaho a ku fambi hi rirhandzu. U nga tshuki u lovisa hi swakudya swa wena loyi Kriste a n'wi feleke.

¹⁶Loko swi ri tano, vusasi bya n'wina byi nga tshuki byi soriwa.

¹⁷Hikuva ku fuma ka Xikwembu a hi ku dya ni ku nwa; kambe i ku lulama, ni ku rhula, ni ku tsaka hi Moya lowo Kwetsima.

¹⁸Hikuva la tirhelaka Kriste eswilweni sweswo, u tsakisa Xikwembu, kambe u yimeriwa hi vanhu.

¹⁹A hi laveni hikwalaho timhaka leti humesaka ku rhula, ni leti hi nga akisanaka kun'we ha tona.

²⁰U nga tshuki u herisa ntirho wa Xikwembu hikwalaho ka swakudya. Kunene swilo hinkwaswo swi tengile; kambe munhu a nga endla ku biha loko a dya, a ri karhi a khunguvanyisa un'wana.

²¹Swi sasekile loko ku nga dyiwi nyama ku nga nwiwi vhinyo, ni loko ku nga endliwi xilo xihi ni xihi lexi nga khunguvanyisaka makwenu, ni ku n'wi wisa, ni ku n'wi tsanisa.

²²Wena, loko u ri ni ku pfumela, u va na kona embilwini ya wena emahlweni ka Xikwembu. Ku katekile munhu loyi ripfalo ra yena ri nga n'wi avanyisiki eswilweni leswi a swi yimelaka!

²³Kambe la dyaka hi ku kanakana, u le ku avanyisiweni, hikuva a nga dyi hi ku pfumela, hikuva xilo xin'wana ni xin'wana lexi nga endliwiki hi ku pfumela, i ku dyoha.