Read Xitsonga Romans 16 Bible Online

Romans 16 - Xitsonga bible

Romans 16

¹Febe, makwerhu wa wansati, a nga nandza wa kereke ya Kenikreya, ndza n'wi vula eka n'wina;

²mi n'wi amukela eHosini, kukota leswi vakwetsimi va fanelaka ku amukeriwa kutani mi n'wi pfuna eswilweni hinkwaswo leswi a nga swi lavaka eka n'wina, hikuva, na yena, u pfunile lavo tala, na mina hi xiviri.

³Ndzi runguleleni Prisila na Akwila vatirhikulorhi eka Yesu Kriste,

⁴hikuva va nyikete tinhloko ta vona ku ndzi ponisa; kambe a hi mina ntsena loyi a va khensaka, kambe na tona tikereke hinkwato ta vamatiko.

⁵Ndzi runguleleni ni Kereke leyi nga endlwini ya vona. Ndzi runguleleni na Epayineto, murhandziwa wanga, xi nga xirhangana xa Akaya eka Kriste.

⁶Ndzi runguleleni Mariya la hi tirheleke ngopfu.

⁷Ndzi runguleleni Androniko na Yuniya, maxaka ya mina, lava tshamaka va bohiwa na mina, kambe va twakele exikarhi ka vaapostola, na swona va ndzi rhangele eka Kriste.

⁸Ndzi runguleleni Ampliyato, murhandziwa wanga eHosini.

⁹Ndzi runguleleni Urbano, mutirhi-kulorhi entirhweni wa Kriste, na Stako, murhandziwa wanga.

¹⁰Ndzi runguleleni Apele la dzunisiwaka eka Kriste. Ndzi runguleleni ni va yindlu ya Aristobulo.

¹¹Ndzi runguleleni Herodiyoni, xaka ranga. Ndzi runguleleni va yindlu ya Narkiso, lava nga le Hosini.

¹²Ndzi runguleleni Trifena na Trifosa, vavasati lava tirhelaka Hosi. Ndzi runguleleni Persida, wansati la rhandziwaka; na yena, u tirhile ngopfu entirhweni wa Hosi.

¹³Ndzi runguleleni Rhufasi, muhlawuriwa wa Hosi, ni mana wa yena, loyi a nga manana, ni le ka mina.

¹⁴Ndzi runguleleni Asinkrito na Filego, na Hermesi, na Patroba, na Hermasi ni vamakwavo lava nga na vona.

¹⁵Ndzi runguleleni Filologo, na Yuliya, na Neriya, ni makwavo, na Olimpa ni vakwetsimi hinkwavo lava nga na vona.

¹⁶Rungulanani hi ku ntswontswana loku hlawuriweke. Tikereke hinkwato ta Kriste ta mi rungula.

¹⁷Kutani, vamakwerhu, ndza mi khongotela, ndzi ri: Mi tivonela eka lava pfuxaka ku avana, ni ku khunguvanyisa, va onha dyondzo leyi mi yi dyondzeke; hambanani na vona.

¹⁸Hikuva lavo tano a va tirheli Hosi ya hina, Yesu Kriste, kambe va tirhela makhwiri ya vona ntsena; kutani va hambukisa timbilu ta lavo rivala hi marito lama tsakisaka, ma ku lwandla enon'wini.

¹⁹Kambe hinkwavo va tiva ku yingisa ka n'wina. Ndzi mi tsakela kwalaho; kambe ndzi rhandza leswaku mi valavo tlhariha eku sasekeni, ni lavo tenga eku biheni.

²⁰Xikwembu xa ku rhula, hi xona lexi nga ta hatlisa ku pfotlosa Satana ehansi ka milenge ya n'wina. Tintswalo ta Yesu Kriste, Hosi ya hina, a ti ve na n'wina!

²¹Timotiya nakulorhi entirhweni, wa mi rungula; na Lukiyo, na Yaso, na Sosipatro, maxaka ya mina, va mi rungula.

²²Mina Tertiyo, mutsari wa epistola leyi, ndza mi rungula eHosini.

²³Gayo, loyi ndzi tshamaka eka Yena swin'we ni va Kereke hinkwayo, va mi rungula. Erasto, muhlayisi wa xuma xa muti, na Kwarto, makwerhu, va mi rungula.

²⁴Tintswalo ta Hosi ya hina Yesu Kriste a ti ve na n'wina hinkwenu, Amen!

²⁵Eka loyi a nga ni matimba ya ku mi tiyisa eEvhangelini ya mina, ni le ku dyondziseni ka Yesu Kriste, hi xikombiso xa xihundla lexi ingi xi funengetiwile emikarhini ya vukulukulu,

²⁶kambe sweswi xi humelerisiwile hi matsalwa ya vaprofeta, hi ku lerisa ka Xikwembu lexi nga heriki, xi kombisiwile eka matiko hinkwawo, ma ta tshinela eku yingiseni ka ku pfumela,

²⁷eka xona xi nga Xikwembu xa vutlhari xi ri xoxe, ku ve ku twala, ha Yesu Kriste, hilaha ku nga heriki! Amen!