Read Xitsonga Romans 2 Bible Online

Romans 2 - Xitsonga bible

Romans 2

¹Loko swi ri tano, wena munhu, hambi u ri mani na mani la avanyisaka van'wana, a ku na ku tilandzula; hikuva loko u ri karhi u avanyisa van'wana, wa tiavanyisa na wena, hikuva u endla leswi u avanyisaka van'wana ha swona.

²Hikuva ha tiva leswaku ku avanyisa ka Xikwembu ku lulamile eka lava endlaka leswo tano.

³Kutani wena munhu la avanyisaka lava endlaka leswo tano kasi wa swi endla na wena, xana u anakanya leswaku u ta pona eku avanyiseni ka Xikwembu xana?

⁴Kumbe u tsan'wa vunene, ni xivindzi, ni musa wa Xikwembu, u nga tsundzuki leswaku vunene bya xona byi ku byisela eku hundzukeni xana?

⁵Kambe hi ku nonon'hwa ka mbilu ya wena leyi nga riki na ku hundzuka, u tihlengeletela vukari lebyikulu, lebyi nga ta ku fikela hi siku ra vukari, leri ku nga ta humelela ku avanyisa loku lulameke ka Xikwembu ha rona,

⁶loko xi rihisela un'wana ni un'wana hi mitirho ya yena.

⁷Xi ta nyika vutomi lebyi nga heriki eka lava lavaka ku kwetsima, ni ku twala ni vutomi lebyo kala rifu, hi ku tiyisela emitirhweni yo saseka;

⁸kambe lava kanetaka, lava alaka ntiyiso, va yingisela ku homboloka, xi ta va karihela ni ku va holovela:

⁹Khombo ni nhlomulo swi ta va ehenhla ka munhu un'wana ni un'wana la endlaka leswo biha ehenhla ka Muyuda eku sunguleni ku yisa ni le ka Mugriki;

¹⁰kambe ku kwetsima, ni ku twala, ni ku rhula, swi ta va eka munhu un'wana ni un'wana la endlaka leswo saseka, eka Muyuda eku sunguleni, ku yisa ni le ka Mugriki;

¹¹hikuva Xikwembu a xi yi hi nghohe ya vanhu.

¹²Hinkwavo lava dyoheke va nga ri na nawu, va ta lova va nga ri na nawu; kambe hinkwavo lava dyoheke va ri ni nawu, va ta avanyisiwa hi nawu.

¹³Kunene a hi vatwi va nawu lava lulameke emahlweni ka Xikwembu, kambe i vaendli va nawu, hi vona lava nga ta khanisiwa.

¹⁴Hikuva vamatiko lava nga riki na nawu, loko va endla swa nawu hi ntumbuluko, hambi va nga ri na nawu, va ni nawu eka vona.

¹⁵Va kombisa leswaku ntirho wa nawu wu tsariwile etimbilwini ta vona, ripfalo ra vona i mbhoni ya vona: ni miehleketo ya vona ya va tshinya, kumbe yi va yimela;

¹⁶swi ta humelela hi siku leri Xikwembu xi nga ta avanyisa leswi fihliweke swa vanhu ha Yesu Kriste, hilaha Evhangeli ya mina yi vulaka hakona.

¹⁷Wena-ke, la nga ni vito ra Muyuda, u tshembeke nawu, u tidzunisaka hi Xikwembu,

¹⁸u tivaka ku rhandza ka xona, u tivaka ni ku xiya leswi tlulaka hi vunene, hikuva u dyondzisiwile hi nawu;

¹⁹wena u anakanyaka leswaku u mufambisi wa lavo fa mahlo, ni ku vonakala ka lava nga emunyameni,

²⁰ni mutsundzuxi wa lava nga tiviki nchumu, mudyondzisi wa lavo rivala, hikuva enawini u ni dyondzo ya xiviri ya vutivi ni ya ntiyiso.

²¹Wena-ke, la dyondzisaka van'wana, a ku tidyondzisi-ke? Wena la vulaka u ku: “Ku nga tshuki ku yiviwa,” wa yiva.

²²Wena la nge: “Ku nga tshuki ku oswaniwa,” wa oswa-ke! Wena la nyenyaka swifaniso swahava, u yiva leswo kwetsima!

²³Wena la tidzunisaka hi nawu, u xumbadza Xikwembu hi ku tlula nawu!

²⁴Hikuva vito ra Xikwembu ri soriwa hikwalaho ka n'wina exikarhi ka vahedeni hinkwavo, hilaha ku tsariweke hakona.

²⁵Kunene ku yimba ka pfuna loko u hlayisa nawu, kambe loko u ri mutluri wa nawu, ku yimba ka wena ku ta va ku hundzukile vukhuna.

²⁶Kambe loko makhuna ma hlayisa ku lerisa ka nawu, xana vukhuna bya vona byi nga ka byi nga hlayiwi ku yimba xana?

²⁷Kutani loyi a nga khuna hi ku velekiwa ka yena, loko a hlayisa nawu, u ta ku avanyisa, wena la tlulaka nawu, hambi u ri ni tsalwa ra nawu ni ku yimba.

²⁸Hikuva Muyuda a hi yena la nga yena ehandle ntsena; ni ku yimba a hi kona loku endliwaka ehandle, enyameni.

²⁹Kambe Muyuda hi loyi a nga yena embilwini, ni ku yimba, i ka mbilu, loku endliwaka emoyeni, ku nga ri erivaleni; kutani ku dzunisiwa ka yena a ku humi eka vanhu, kambe ku huma eka Xikwembu.