Read Xitsonga Romans 3 Bible Online

Romans 3 - Xitsonga bible

Romans 3

¹Loko swi ri tano, lexi Muyuda a tlulaka van'wana ha xona, i xini-ke?

²Kumbe ku yimba ku pfuna yini? Ka pfuna ngopfu hi matlhelo hinkwawo, ngopfungopfu hi leswi marito ya Xikwembu ma vekiweke eka vona.

³Hikuva swi na yini-ke loko van'wana va nga pfumelanga? Xana ku ka va nga pfumelanga ku nga herisa ku tshembeka ka Xikwembu xana?

⁴Niswitsanana! Ntiyiso wu ta kumiwa wu ri wa Xikwembu, vunwa byi ri bya vanhu! Hilaha ku tsariweke hakona leswaku: “U ta kumiwa u lulamile eku vulavuleni ka wena, kutani u va la hlulaka eku avanyisiweni ka wena.”

⁵Kambe loko ku homboloka ka hina ku vonakisa ku lulama ka Xikwembu, hi ta ku yini? Xana hi ta ku: “Xikwembu xi hombolokile loko xi endla hi ku kariha” xana? (Ndzi vula hi mukhuva wa vanhu.)

⁶Swi nga tshuki swi va tano! Hikuva ingi loko swi ri tano, Xikwembu a xi ta avanyisa misava hi mukhuva wihi?

⁷Kutani loko ntiyiso wa Xikwembu wu twarisiwa hi vunwa bya mina, xana ndza ha avanyiseriwa yini kukotisa mudyohi?

⁸Kutani a hi endli ha yini swo biha leswaku ku ta humelela leswo saseka ha swona, hilaha hi lumbetiwaka hakona hi van'wana loko va tiyisa leswaku hi vurisa sweswo; kambe lavo tano, ku avanyisiwa ka vona ku lulamile!

⁹Hi ta ku yini-ke? Xana hi tlula van'wana hi ku lulama xana? E-e, niswitsongo! Hikuva hi kombisiwile eku sunguleni leswaku hinkwavo, hambi va ri Vayuda, hambi va ri Vagriki, va fumiwa hi ku dyoha,

¹⁰kukota leswi tsariweke leswaku: “A ku na la lulameke, hambi a ri un'we.

¹¹A ku na la nga ni ku twisisa, a ku na la lavaka Xikwembu.

¹²Hinkwavo va hambukile, hinkwavo swin'we va hundzukele eka swahava; a ku na la endlaka leswo lulama, hambi a ri un'we.”

¹³“Milomu ya vona i masirha lama ahlameke va xisa hi tindzimi ta vona. Vuxungu bya ti mhiri byi le hansi ka milomu ya vona.”

¹⁴“Milon'wini ya vona ku tele tinhlambha ni ku bava.”

¹⁵“Milenge ya vona yi ni matsambo ku ya halata ngati;

¹⁶ku onhaka ni makhombo swi le tindleleni ta vona;

¹⁷ndlela ya ku rhula a va yi tivi.”

¹⁸“A ku na ku chava Xikwembu emahlweni ka vona.”

¹⁹Kambe ha swi tiva leswaku hinkwaswo leswi vuriwaka hi nawu, swi byeriwa lava nga enawini, leswaku milomu hinkwayo yi siviwa; vanhu hinkwavo va ta kumiwa va ri ni nandzu emahlweni ka Xikwembu.

²⁰Hikwalaho a ku na nyama ni yin'we, leyi nga ta khana emahlweni ka xona hi mitirho ya nawu; hikuva xidyoho xi tiviwa hi nawu.

²¹Kambe sweswi, handle ka nawu, ku lulama ka Xikwembu ku kombisiwa ku nga loku tiyisiwaka hi nawu ni vaprofeta;

²²ku lulama ka Xikwembu i ku pfumela eka Yesu Kriste, loku nga ka hinkwavo, ni le henhla ka hinkwavo lava pfumelaka;

²³a ku na ku hambana kwalaho hikuva hinkwavo va dyohile, kutani a va faneriwi hi ku kwetsima ka Xikwembu,

²⁴kutani va hlayiwa lava lulameke hi tintswalo ta Xikwembu hi ku nyikiwa, hi ku kutsula loku nga ka Yesu Kriste;

²⁵Xikwembu xi n'wi vekile leswaku yi ta va mhamba ya lava pfumelaka eka ngati ya Yena; xi ta kombisa ku lulama ka xona hilaha xi tshikeke swidyoho swo sungula, emikarhini ya ku honisa ka xona;

²⁶a swi ri leswaku xi kombisa ku lulama ka xona emikarhini ya sweswi, leswaku xi va lexi lulameke loko xi ri karhi xi khanisa la nga ni ku pfumela eka Yesu.

²⁷Nkarhi wa ku tidzunisa wu kwihi xana? Ku hava. Hi nawu wihi-ke? Wa mitirho xana? E-e; kambe hi nawu wa ku pfumela.

²⁸Hikwalaho hi heta mhaka hi ku vula leswaku munhu u hlayiwa la lulameke hi ku pfumela, ku nga ri hi mitirho ya nawu.

²⁹Xana Xikwembu i xa Vayuda ntsena xana? Xana a hi xa vamatiko na vona xana? Ina, i xa vamatiko, na vona;

³⁰hikuva Xikwembu i xin'we ntsena, lexi nga ta khanisa lava ku yimba hi ku pfumela ni makhuna hi ku pfumela.

³¹Xana kutani hi herisa nawu hi ku pfumela xana? A swi tano! Kambe hi tiyisa nawu.