Read Xitsonga 1 Corinthians 15 Bible Online

1 Corinthians 15 - Xitsonga bible

1 Corinthians 15

¹Kambe vamakwerhu, ndza mi tsundzuxa Evhangeli leyi ndzi tshamaka ndzi mi byela yona, leyi mi yi amukeleke, leyi mi tiyiseleke eka yona,

²leyi mi ponisiwaka ha yona loko mi yi hlayisa hilaha ndzi mi byeleke hakona; loko ngi a mi pfumelangi eka yona mahala.

³Hikuva emahlweni ka swilo hinkwaswo, ndzi mi nyikile lexi: ndzi xi amukeleke na mina, hileswaku Yesu u fele swidyoho swa hina hilaha Matsalwa ma vulaka hakona,

⁴u lahliwile, kutani a tlhela a pfuka eku feni hi siku ra vunharhu, hilaha Matsalwa ma vulaka hakona,

⁵kutani u voniwile hi Kefasi, endzhaku u voniwile hi lava khume na vambirhi.

⁶A tlhela kambe a voniwa kun'we hi vamakwavo lava tlulaka ntlhanu wa madzana; lavo tala eka vona va ha ri kona, kambe van'wana va file.

⁷Kutani u voniwile hi Yakobo, kutani u voniwile hi vaapostola hinkwavo.

⁸Endzhaku ka hinkwavo, u voniwile hi mina, loyi ndzi kotisaka la holotiweke, hikuva ndzi ri lontsongo eka vaapostola,

⁹kambe a ndzi fanelanga ku vuriwa muapostola, hikuva ndzi xanisile kereke ya Xikwembu.

¹⁰Kambe hi tintswalo ta Xikwembu, ndzi loyi ndzi nga yena; kutani tintswalo ta xona eka mina a ti endliwanga swahava, kambe ndzi va tlulela kule hinkwavo hi ku tirha; ndzi nga ri mina kambe i tintswalo ta Xikwembu eka mina.

¹¹Hambi ndzi ri mina, hambi va ri vona, hi dyondzisa sweswo, kutani mi pfumerile sweswo.

¹²Kungakuloko ku dyondzisiwa leswaku Kriste u pfukile eku feni, xana van'wana exikarhi ka n'wina va vurisa ku yini leswaku ku pfuka ka vafi a ku kona?

¹³Loko ku pfuka ka vafi ku nga ri kona, ingi Kriste, na yena, a nga pfukanga.

¹⁴Kungakuloko Kriste a nga pfukanga, ku dyondzisa ka hina i ka hava, ni ku pfumela ka n'wina i ka hava.

¹⁵Kambe hi nga kumiwa hi ri timbhoni ta vunwa ta Xikwembu; hikuva hi tiyisile hi ku hemba leswaku Xikwembu xi pfuxe Kriste, kasi a xi n'wi pfuxanga loko vafi kunene va nga pfuki.

¹⁶Hikuva loko vafi va nga pfuki, Kriste, na yena, a nga pfukanga.

¹⁷Kutani loko Kriste a nga pfukanga, ku pfumela ka n'wina i ka hava, kutani ma ha ri eswidyohweni swa n'wina.

¹⁸Loko swi ri tano, lava tietleleleke eka Kriste va lovile.

¹⁹Loko hi tshembile Kriste evutomini lebyi, ntsena, hi tlurisa vanhu hinkwavo hi khombo.

²⁰Kambe sweswi, Kriste u pfukile eku feni, kutani u vekiwe xirhangana xa lava etleleke.

²¹Hikuva rifu, leswi ri humeke hi munhu, ku pfuka ka vafi, na kona, ku hume hi munhu.

²²Kukota leswi hinkwavo va faka hikwalaho ka Adamu, hinkwavo va ta tlhela va hanya ha Kriste.

²³Kambe un'wana ni un'wana u ta pfuka exiyin'weni xa yena: Xirhangana i Kriste; endzhaku, valavo va nga Vakriste va ta pfuka eku humeleleni ka yena;

²⁴endzhaku, ku ta fika makumu, siku a tlheriselaka ku fuma eka Xikwembu Tatana, kutani a herisa vuhosi hinkwabyo, ni ku fuma hinkwako, ni matimba hinkwawo.

²⁵Hikuva u fanele ku fuma a kondza a veka valala hinkwavo ehansi ka mikondzo ya yena.

²⁶Nala la nga ta herisiwa eku heteleleni i rifu,

²⁷“hikuva Xikwembu xi vekile hinkwaswo ehansi ka mikondzo ya yena.” Loko kutani “hinkwaswo swi vekiwe ehansi ka yena,” swa twakala leswaku la vekeke hinkwaswo ehansi ka yena, a nga hlayiwi kona.

²⁸Kutakuloko hinkwaswo swi vekiwile ehansi ka yena, hi kona N'wana na yena, a nga ta vekiwa ehansi ka la vekeke swilo hinkwaswo ehansi ka yena, hi leswaku Xikwembu xi va hinkwaswo eka hinkwavo.

²⁹Loko swi ri tano, lava nga khuvuleriwa vafi va ta endla yini loko kunene vafi va nga pfuki? Xana va ha khuvuleriwa yini vafi xana?

³⁰Na hina hi le makhombyeni ha yini hi mikarhi hinkwayo xana?

³¹Ndzi fa hi masiku hinkwawo, ndzi tiyisa sweswo hi ku tidzunisa loku ndzi nga na kona ha n'wina, eka Yesu Kriste, Hosi ya hina.

³²Loko ndzi lwa ni swivandzana le Efesa hikwalaho ka vanhu, ndzi fuwe yini ha kona-ke? Loko kunene vafi va nga pfuki, a hi dyeni, a hi nweni, hikuva mundzuku hi ta fa.

³³Mi nga tshuki mi tixisa; ku tolovela swo biha, swi borisa mikhuva leyinene.

³⁴Pfukani, mi hanya hi ku lulama, mi nga tshuki mi dyoha, hikuva van'wana a va na ku tiva ka Xikwembu; ndzi vula sweswo ku mi khomisa tingana.

³⁵Kambe un'wana a nga ku: “Vafi va ta pfuka hi mukhuva wihi, va ta humelela hi miri lowo yini-ke?”

³⁶Xihunguki ndzina! Lexi u xi byalaka, xi nga ka xi nga hanyi loko xi nga rhangi xi fa.

³⁷Kutani loko u byala, a ku byari miri lowu nga ta humelela, kambe u byala ndzhoho leyi khumuriweke ya lexi u xi byalaka, hambi yi ri ya timbewu tin'wana.

³⁸Xikwembu, hi xona lexi yi nyikaka miri hilaha xi rhandzaka hakona, kutani xi nyika ndzhoho yin'wana ni yin'wana miri wa yona.

³⁹Nyama hinkwayo a hi nyama yin'we, kambe nyama ya vanhu, i yimbe, ni nyama ya swiharhi i yimbe, ni ya tinhlampfi i yimbe, ni ya tinyanyana, i yimbe.

⁴⁰Kutani miri wa le tilweni wu kona, ni wa la emisaveni wu kona; kambe ku vonakala ka miri wa le tilweni, i kun'wana, ni ka wa la emisaveni i kun'wana.

⁴¹Ku vonakala ka dyambu i kun'wana, ni ka n'weti i kun'wana, ni ka tinyeleti i kun'wana; hikuva nyeleti yin'wana yi hambana ni nyeleti yin'wana hi ku vangama ka yona.

⁴²Swi ta va tano eku pfukeni ka vafi: Miri wu byariwa eku boleni, wu ta pfuka lowu nga boriki;

⁴³wu byariwa xi ri xilo lexi nga ni tingana, wu ta pfuka wu kwetsimile; wu byariwa wu ri ni xivavi, wu ta pfuka wu ri ni matimba;

⁴⁴wu byariwa wu ri miri wa nyama, wu ta pfuka wu ri miri wa moya.

⁴⁵Miri wa nyama wu kona, ni miri wa moya wu kona, kukota leswi ku tsariweke va ku: “Munhu wo rhanga, Adamu, u endliwe moya lowu hanyaka,” Adamu wa le ndzhaku, u endliwile moya lowu hanyisaka.

⁴⁶Kambe leswi nga swa moya a hi swona leswo rhanga; leswo rhanga i swa nyama, kutani swi landziwa hi leswi nga swa Moya.

⁴⁷Munhu lowo rhanga a a ri wa misava, u endliwile hi misava; kambe munhu wa vumbirhi, a nga Hosi, u huma etilweni.

⁴⁸Hilaha wa misava a nga vumbiwa hakona na vona va misava va tano; ni laha wa le tilweni a nga vumbiwa hakona, na vona va le tilweni va tano.

⁴⁹Kukota leswi hi nga funengela nghohe ya wa misava, hi ta funengerisa sweswo nghohe ya wa le tilweni.

⁵⁰Sweswi, leswi ndzi swi vulaka, vamakwerhu, hileswaku: Nyama ni ngati swi nga ka swi nga dyi ndzhaka ya ku fuma ka Xikwembu, ni ku bola ku nga ka ku nga dyi ndzhaka ya leswi nga boriki.

⁵¹Maswivo, ndzi mi byela xihundla: Hi nga ka hi nga etleri hinkwerhu, kambe hi ta hundzuka hinkwerhu;

⁵²hi nkarhinyana lowu fanaka ni ku copeta ka tihlo, hi mhalamhala ya makumu; hikuva mhalamhala yi ta biwa, kutani vafi va ta pfuka va ri lava nga ha boriki, na hina hi ta hundzuka.

⁵³Hikuva swa fanela leswaku miri wa ku bola wu funengetiwa hi lowu nga boriki, ni miri wolowo lowu faka, wu funengela leswi nga fiki.

⁵⁴Kutakuloko ku bola ku funengele leswi nga boriki, ni ku fa, na kona ku funengele leswi nga fiki, hi kona marito lama tsariweke ma nga ta hetiseka, lama nga te: “Rifu ri mitiwile hi ku hlula.”

⁵⁵“Wena, rifu! Ndzhombo wa wena wu kwihi-ke? Wena sirha! Ku hlula ka wena ku kwihi-ke?”

⁵⁶Ndzhombo wa rifu i xidyoho; kutani matimba ya xidyoho, i nawu.

⁵⁷A hi khenseni Xikwembu lexi hi nyikeke ku hlula! Hi Hosi ya hina Yesu Kriste.

⁵⁸Hikwalaho, vamakwerhu lava rhandziwaka, tiyani swinene, mi nga tsekatsekeni, mi tirhela Hosi hi masiku, mi ri karhi mi swi tiva leswaku mitirho ya n'wina yi nga ka yi nga hundzuki swahava eHosini.