Read Xitsonga 2 Corinthians 12 Bible Online

2 Corinthians 12 - Xitsonga bible

2 Corinthians 12

¹Kunene a ndzi fanelangi ku tidzunisa, hikuva ndzi nga fika ni ka masingita ni ka swikombiso swa Hosi.

²Ndzi tiva munhu eka Kriste, la tshamaka a tekeriwa etilweni ra vunharhu, sweswi ku hundze malembe ya khume na mune, (kambe xana u tekeriwe hi miri, a ndzi swi tivi; kumbe u siye miri, na kona, a ndzi swi tivi, swi tiviwa hi Xikwembu).

³Ndzi tiva munhu loyi (kumbe u fambile hi miri, kumbe u fambile a siye miri, a ndzi swi tivi, swo tiva hi Xikwembu),

⁴u tekeriwe eParadeyisini a ha hanya, a twa timhaka leti nga vulekiki, leti munhu a nga ka a nga ti vuri.

⁵Ndzi nga tidzunisa leswaku hi mina munhu yeloyi; kambe ndzi nga ka ndzi nga tidzunisi loko ku nga ri eku tsaneni ka mina.

⁶Kasi loko ndzi rhandza ku tidzunisa, ndzi nga ka ndzi nga endli hi vuhunguki, hikuva leswi ndzi swi vulaka hi leswi tiyeke; kambe leswo ndza swi tshika leswaku munhu a nga tshuki a ndzi veka vukulukumba lebyi tlurisaka leswi a ndzi voneke ndzi ri na swona, hambi swi ri leswi a ndzi yingiseke ndzi vulaka swona.

⁷Kambe hileswaku ndzi nga tshuki ndzi kukumuxiwa hi vukulukumba bya swikombiso, ndzi nghenisiwile riphantsu enyameni, yi nga ntsumi ya Satana, leswaku yi ndzi phakata, ndzi nga ti tshuka ndzi tikurisa.

⁸Ndzi khongerile Hosi kanharhu, leswaku sweswi, xi suka eka mina.

⁹Kambe Hosi yi te eka mina: “Tintswalo ta mina ti ku ringene; hikuva matimba ya mina ma endlakala eku tsaneni.” Hikwalaho ndzi rhandza ku tidzunisa eku tsaneni ka mina, matimba ya Kriste ma ta tshama eka mina.

¹⁰Hikwalaho ndzi titsakelaka eku tsaneni, ni le xisandzwini, ni le vusiwaneni, ni le ku xanisiweni ni le maxangwini hikwalaho ka Kriste; hikuva siku ndzi tsaneke, hi kona ndzi nga ni matimba.

¹¹Loko ndzi tidzunisa, ndzi endlile hi vuhunguki, kasi hi n'wina mi ndzi susumeteleke kona; hikuva a ndzi fanele ku yimeriwa hi n'wina, hikuva a ndzi tluriwanga ha nchumu hi lava nga vaapostola lavakulu, hambi ndzi nga ri nchumu.

¹²Kunene loko swi ri swikombiso swa vuapostola bya mina, swi humesiwile xikarhi ka n'wina, hi ku yingisela hinkwako, hi swikombiso ni masingita ni mahlori.

¹³Xana mi tshama mi tluriwa ha vini hi tikereke tin'wana? Xana hi leswi ndzi nga mi tikerisangiki xana? Ndzi tsetseleleni eku dyoheni kuloko.

¹⁴Maswivo, ndzi tilunghisele ra vunharhu ku ta eka n'wina; kutani sweswi ndzi nga ka ndzi nga endli hi ku mi tikela, hikuva a ndzi lavi swa n'wina kambe ndzi lava n'wina; hikuva a hi vana lava fanelaka ku hlengeletela vatata wa vona, kambe i vatatana lava fanelaka ku hlengeletela vana va vona.

¹⁵Loko ndzi ri mina, ndzi ta humesa swa mina, na swona ndzi ta tinyika hi xiviri hikwalaho ka mimoya ya n'wina; hambi ndzi rhandziwa kutsongo, ndzi ta mi rhandza ngopfu.

¹⁶Kumbe mi ta ku: A ndzi mi tikelanga; kambe a ndzi ri ni mano, ndzi mi khomile hi vutlhari.

¹⁷Xana ndzi fuwile swa n'wina ha mani, ka lava ndzi va rhumeke ka n'wina xana?

¹⁸Ndzi khongele Tito leswaku a ya eka n'wina, kutani ndzi rhuma makwavo un'wana na yena. Xana Tito u fumile nchumu ha n'wina xana? Xana a hi fambanga na yena hi moya wun'we, ni mitila yin'we ntsena xana?

¹⁹Xana, ni sweswi, mi ri, ha ha ri karhi ha tilandzula eka n'wina xana? E-e; hi vulavula emahlweni ka Xikwembu hi le ka Kriste; kutani hinkwaswo leswo, varhandziwa, hi mi lavela ku akisana ha swona.

²⁰Hikuva ndza chava leswaku, siku ndzi fikaka ndzi ta mi kuma mi nga kotisi leswi ndzi swi rhandzaka, kutani, na mina, mi ta ndzi kuma kukotisa leswi mi nga swi rhandziki; kutani, kumbexana ndzi ta kuma timholovo, ni rilondzo ni ku hambana ni mahlevo, ni ku lumbetana, ni ku dzumadzuma, ni ku tikurisa, ni madzolonga;

²¹kutani kungakuloko ndzi vuyile ka n'wina, kumbe Xikwembu xa mina xi ta ndzi tsongahata ha n'wina, kutani ndzi ta vaviseka hikwalaho ka lavo tala lava dyoheke va nga tisolangiki ethyakeni, ni le vuoswini, ni le swidyohweni leswi va swi endleke.