Read Xitsonga 2 Corinthians 2 Bible Online

2 Corinthians 2 - Xitsonga bible

2 Corinthians 2

¹Kambe ndzi anakanyile leswaku ndzi nga ka ndzi nga vuyeri ka n'wina hi gome;

²hikuva loko ndzi mi khomisa gome, ndzi ta tsakisiwa hi mani, loko a nga ri loyi ndzi n'wi khomiseke gome xana?

³Loko ndzi mi tsalele sweswo, a swi ri leswaku siku ndzi fikaka, ndzi nga tshuki ndzi tsuveriwa hi valavo ndzi fanelaka ku tsakisiwa hi vona; hikwalaho ndzi mi tshembaka hinkwenu, hikuva ku tsaka ka mina, i ka n'wina hinkwenu.

⁴Hikuva ndzi mi tsalerile, ndzi ri karhi ndzi vaviseka ngopfu, hi mbilu leyi kanakanaka ni mihloti leyo tala; kambe a ku nga ri ku mi khomisa gome; a swi ri leswaku mi tiva rirhandzu leri khorwisaka, leri ndzi mi rhandzaka ha rona.

⁵Loko un'wana a humesile swa gome, a nga khomisanga mina gome ndzi ri swanga, kambe hitlhelo rin'wana, u khomisile n'wina hinkwenu; ndzi vurisa sweswo leswaku ndzi nga tshuki ndzi mi tikerisa.

⁶Swi lulamile loko munhu loyi a tshinyiwa sweswo hi lavo tala,

⁷kambe sweswi, mi fanele ku n'wi tsetselela ni ku n'wi chavelela leswaku a nga tshuki a dyiwa hi gome leri tlurisaka.

⁸Ndzi mi khongotela hakona, ndzi ri: N'wi endleni hi rirhandzu.

⁹Ndzi mi tsalerile leswaku ndzi ta mi ringa, ndzi ta tiva leswaku xana eka hinkwaswo ma ndzi yingisa-ke?

¹⁰Yeloyi mi n'wi tsetselelaka, na mina ndza n'wi tsetselela, hikuva na mina, loko ndzi rivalele munhu milandzu, ndzi n'wi rivalele yona hikwalaho ka n'wina, emahlweni ka Kriste,

¹¹leswaku hi nga tshuki hi kamanyetiwa ha nchumu hi Satana, hikuva hi tiva makungu ya yena.

¹²Kambe siku ndzi fikeke eTrowasi ku vula Evhangeli ya Kriste, hambi ndzi pfuleriwile nyangwa kona hi Hosi,

¹³a ndzi tsakanga emoyeni wa mina hikuva a ndzi kumanga Tito, makwerhu; kuteloko ndzi va lerile, ndzi tiyele eMakedoniya.

¹⁴A ku dzunisiwe Xikwembu lexi hi nyikaka ku hlula ha Kriste hi mikarhi hinkwayo, lexi nga eka hina ku nun'hwela ka ku tiva ka xona hinkwako.

¹⁵Hikuva eka Xikwembu hi ri ku nun'hwela loku nandzihaka ka Kriste, exikarhi ka lava hlayisekaka ni ka lava lovaka;

¹⁶eka van'wana, hi ku nun'hwela ka rifu, loku dlayaka; eka van'wana hi ku nun'hwela ka vutomi, loku hanyisaka. Kambe i mani la nga lulamelaka leswo tano?

¹⁷Hikuva a hi fani ni lavo tala lava onhaka rito ra Xikwembu; kambe hi vulavula emahlweni ka Xikwembu hi ri lavanene eka Kriste, hi ri lava rhumiwaka hi Xikwembu.