Read Xitsonga 2 Corinthians 4 Bible Online

2 Corinthians 4 - Xitsonga bible

2 Corinthians 4

¹Hikwalaho, leswi hi nga ni ntirho wolowo hi tintswalo leti hi ti nyikiweke, a hi heli mbilu,

²kambe hi lahlile swilo leswi fihliweka, leswa tingana; kutani a hi fambi hi mano, a hi pfanganyeti rito ra Xikwembu; kambe hi ku veka erivaleni ntiyiso, hi tiendlela ku yimeriwa etimpfalweni ta vanhu hinkwavo, emahlweni ka Xikwembu.

³Kambe, kungakuloko Evhangeli ya hina yi fihliwile, yi fihleriwa lava lovaka,

⁴va nga valavo xikwembu xa misava leyi xi va dlayeke mahlo ya ku anakanya, hileswaku va nga pfumeri, va nga ti tshuka va tsuvukeriwa hi ku vonakala ka Evhangeli leyi kwetsimaka ya Kriste, xi nga xifaniso xa Xikwembu.

⁵Hikuva a hi tivulavuleri, kambe hi vula Yesu Kriste leswaku i Hosi kutani loko hi ri hina, hi tivula malandza ya n'wina hikwalaho ka Yesu.

⁶Hikuva Xikwembu lexi nga ku: “Ku vonakala a ku humelele emunyameni,” hi xona lexi tsuvukiseke etimbilwini ta hina ku vonakala, ni ku tiva ka ku kwetsima ka Xikwembu, emahlweni ka Kriste.

⁷Kambe xuma lexi hi nga na xona xi le timbiteni ta vumba, matimba walawo lamakulu ma ve ya Xikwembu, ma nga ri ya hina.

⁸Hi susumetiwa hi matlhelo hinkwawo, kambe a hi heri mbilu hi le ku nonon'hweni lokukulu, kambe a hi tshiki ku tshemba;

⁹ha xanisiwa, kambe a hi cukumetiwi; hi ni gome, kambe a hi lahleki;

¹⁰hi rhwala hinkwako emirini wa hina rifu ra Hosi Yesu, leswaku vutomi bya Yesu na byona, byi ta vonakala emirini wa hina.

¹¹Hikuva hina lava hanyaka, hi nyiketiwa rifu hi masiku hikwalaho ka Yesu, leswaku vutomi bya Yesu byi vonakala emirini wa hina lowu faka;

¹²kutani sweswi, rifu ri tirha eka hina, kambe vutomi byi tirha eka n'wina.

¹³Hikuva hi ni Moya wu ri wun'we wa ku pfumela, kukota leswi ku tsariweke va ku: “Ndzi pfumerile, kutani ndzi vulavurile hakona”; na hina ha pfumela, hikwalaho hi vulavulaka,

¹⁴hi ri karhi hi swi tiva leswaku la pfuxeke Hosi Yesu, u ta hi pfuxa, na hina, ha Yesu kambe u ta hi humelerisa na n'wina.

¹⁵Hikuva hinkwaswo swi endleriwe n'wina hileswaku, tintswalo, loko ti ri karhi ti andza, ti tala hi ku khensa ka lavo tala, eku dzuniseni ka Xikwembu.

¹⁶Hikwalaho a hi heli mbilu, kambe, hambi munhu wa le handle wa hina a ri karhi a onhaka, munhu wa le ndzeni wa karhi wa kula hi siku rin'wana ni rin'wana.

¹⁷Hikuva nhlomulo wo vevuka wa hina i wa nkarhinyana wolowo, wu karhi wa hi tirhela exumeni xa ku kwetsima lexi tlurisaka, lexi nga heriki;

¹⁸hikuva hi langutela swi nga ri leswi voniwaka, kambe swi ri leswi nga voniwiki, hikuva leswi vonakalaka, i swa mikarhi leyi ntsena, kasi leswi nga vonakiki, swi nga ka swi nga vi na makumu.