Read Xitsonga 2 Corinthians 6 Bible Online

2 Corinthians 6 - Xitsonga bible

2 Corinthians 6

¹Sweswi, leswi hi tirhisanaka na Xikwembu, ha mi khongotela leswaku mi nga tshuki mi va lava amukeleke tintswalo ta Xikwembu mi ti endla swahava.

²Hikuva xi te: “Ndzi ku yingisile enkarhini lowu fanekeleke, ndzi ku pfunile enkarhini wa ku hanya.” Sweswi, hi wona nkarhi lowu fanekelaka; sweswi, hi rona siku ra ku hanya.

³A hi khunguvanyisi vanhu ni switsongo, leswaku ntirho wa hina wu nga tshuki wu sandziwa,

⁴kambe hi ri karhi hi tiyimela hinkwako, kukotisa malandza la ma lulameke ya Xikwembu: hi ku tiyisela lokukulu emaxangwini, ni le vusiwaneni,

⁵ni le makhombyeni, ni le timbangeni, ni le ku bohiweni, ni le madzolongeni, ni le ku tirheni, ni le ku hitekeni, ni le ku titsoneni ka swakudya,

⁶ni le ku tengeni, ni le ku tiveni; hi ku yingisela, hi vunene, hi moya lowo saseka, hi rirhandzu leri nga riki na ku xisa, hi rito lerinene, hi matimba ya Xikwembu;

⁷hi tipfuna hi matlhari ya ku lulama, lama tameriwaka hi voko ra xinene ni ra ximatsi;

⁸exikarhi ka xidzumo ni ku sandziwa, exikarhi ka ku lumbetiwa ni ku twala lokunene; ingi ha kanganyisa, kasi hi lamanene; ingi a hi tiviwi, kasi ha tiviwa;

⁹ingi ha fa, kasi ha hanya ingi ha xupuriwa, kasi a hi dlayiwi;

¹⁰ingi hi ni tingana, kasi hi tsakile hi masiku; ingi hi swisiwana, kasi hi fuwisa lavo tala; ingi a hi na nchumu, kasi hi fuwile swilo hinkwaswo.

¹¹Nomu wa hina wu mi ahlamele n'wina Vakorinto, timbilu ta hina ti mi ahlamele;

¹²a mi manyanangi endzeni ka hina, kambe mi manyanisa endzeni ka n'wina;

¹³hi endleleni vunene hakona; ndzi vurisa sweswo hi ku mi endla vana vanga na n'wina, ndzi anamiseleni timbilu ta n'wina.

¹⁴Mi nga rhwaleni mpingu wun'we ni lava nga pfumeriki; hikuva ku hlangana ku kwihi exikarhi ka ku lulama ni ku homboloka? Kumbe ku vonakala ku ni ku hlangana kwihi ni munyama?

¹⁵Kriste u ni ntwanano wihi na Beliyali? Kumbe la pfumelaka u ni ku averiwa kwihi ni la nga pfumeriki?

¹⁶Tempele ya Xikwembu yi ni ku pfumelelana kwihi ni swifaniso leswi khongeriwaka? Hikuva hi n'wina mi nga tempele ya Xikwembu lexi hanyaka, kukotisa leswi Xikwembu xi nga te: “Ndzi ta tiakela exikarhi ka vona, ndzi tifambela kona, ndzi ta va Xikwembu xa vona, kutani vona va ta va tiko ra mina.”

¹⁷Hikwalaho, humani exikarhi ka vona, mi tihlawula, ku vurisa sweswo Hosi; mi nga tshuki mi khumba swa thyaka, kutani ndzi ta mi amukela.

¹⁸Ndzi ta va tata wa n'wina, mi va vana va mina va xinuna ni va xisati, ku vurisa sweswo Hosi ya matimba hinkwawo.