Read Xitsonga 2 Corinthians 8 Bible Online

2 Corinthians 8 - Xitsonga bible

2 Corinthians 8

¹Vamakwerhu, sweswi, hi mi tivisa tintswalo leti Xikwembu xi ti kombiseke etikerekeni ta Makedoniya,

²hikuva exikarhi ka tinxaka ta maxangu lamakulu, ku tsaka ka vona ku engetelelekile; kutani evusiwaneni lebyikulu bya vona, va humesile rifuwo lerikulu ra ku hanana ka vona.

³Hikuva va endlise sweswo hi ku rhandza ka vona hi mpimo wa matimba ya vona; timhaka leti, ndza ti tiyisa; kambe va tlurisile matimba lawa;

⁴va hi khongotela hi mikhongelo leyo tala leswaku hi amukela ku endla kuloku ka tintswalo, ni ku nyika ka vona enhlengweni lowu humeseriwaka vakwetsimi.

⁵Kutani a va endlanga ntsena hilaha hi nga ehleketa hakona, kambe va rhangile hi ku tinyiketa eka Hosi, kutani va tinyiketa eka hina hi ku rhandza ka Xikwembu.

⁶Hikwalaho, hi khongele Tito, hi ku: Leswi a sunguleke ntirho wolowo wa tintswalo exikarhi ka n'wina, u fanele ku wu heta.

⁷Kambe kukotisa loko mi taleriwile hi leswo tala, hi ku pfumela, hi marito, hi ku tiva, hi ku gingirika ematlhelweni hinkwawo, hi rirhandzu leri mi hi rhandzaka ha rona, kunene mi fanele ni ku andzeriwa hi ku endla loku ka tintswalo.

⁸A ndzi vurisi sweswo hi nawu, kambe hileswaku ndzi ringeta hi ku gingirika ka van'wana, vunene bya rirhandzu ra n'wina.

⁹Hikuva mi tiva tintswalo ta Hosi ya hina Yesu Kriste, hikuva loko a ri karhi a fuwile, u tiendle xisiwana hikwalaho ka n'wina, leswaku mi kuma ku fuwa evusiwaneni bya yena.

¹⁰Kutani emhakeni yoleyo, ndzi mi nyika ku tsundzuxa ka mina, kambe swa mi fanela hikuva, ka hari n'wexemu, mi rhangele hinkwavo hi ku endla ni ku rhandza.

¹¹Sweswi, hetisani ntirho wolowo leswaku kukota leswi ngi mi ri ni ku gingirika ka ku rhandza, mi va ni ku hetisa hi ku ringana leswi mi nga na swona.

¹²Hikuva ku rhandza ka mbilu loko ku ri kona, munhu u ta tsakisa Xikwembu hi leswi a nga na swona, ku nga ri hi leswi a swi pfumalaka.

¹³Hikuva a swi endleki leswaku van'wana va pfuniwa, kutani n'wina mi tikeriwa, kambe ku ringana a ku ve kona, leswaku ndzalo ya n'wina yi pfuna vusiwana bya vona sweswi,

¹⁴kutani ndzalo ya vona yi ta hanyisa vusiwana bya n'wina; ku endliwa ni ku ringana kukota leswi tsariweke va ku:

¹⁵“Loyi a hlengeleteke ngopfu a nga salanga na leswi tlurisaka, kutani loyi a hlengeleteke switsongo a nga pfumalanga.”

¹⁶A hi khenseni Xikwembu lexi ngheniseke ku chivirika ku ri kun'we embilwini ya Tito ni ya mina hikwalaho ka n'wina,

¹⁷kambe u amukerile ku khongotela ka mina swinene, u yile eka n'wina hi ku hatlisa, kambe a a yisiwa hi ku navela ku mi vona.

¹⁸Kutani hi rhumile un'wana na yena, a nga wanuna la twakaleke tikerekeni hinkwato hi timhaka ta Evhangeli;

¹⁹swi nga ri leswi ntsena, kambe i munhu la hlawuriweke hi tikereke, leswaku a famba na hina entirhweni lowa tintswalo, lowu hi wu tirhaka ku dzunisa Xikwembu hi xiviri, ni ku humesa ku chivirika ka n'wina.

²⁰Hi endlise sweswo hi ku chava leswaku hi nga tshuki hi sandziwa hi munhu, emhakeni yoleyo ya mihlengo leyo tala leyi hi yi hlayisaka;

²¹hikuva hi lava lexi sasekeke, ku nga ri emahlweni ka Hosi ntsena, kambe ni le mahlweni ka vanhu.

²²Hi va rhumile kun'we ni makwerhu loyi hi vonaka ku gingirika ka yena ngopfu, loko hi n'wi ringeta eswilweni leswo tala, ni sweswi, wa ha ri ni ku gingirika loku tlurisaka hi ku mi tshemba ngopfu.

²³Loko a ri Tito, i nakulorhi ni loyi a mi tirhelaka na mina; loko va ri van'wana, i varhumiwa va tikereke, ni ku dzunisa ka Kriste.

²⁴Mi nga vonakisa ha vona e rirhandzu ra n'wina emahlweni ka tikereke, ni laha hi nga tidzunisaka hakona ha n'wina.