Read Xitsonga Galatians 1 Bible Online

Galatians 1 - Xitsonga bible

Galatians 1

¹Pawulo, muapostola, ku nga ri hi vanhu, hambi ku ri hi munhu ni un'we, kambe ku ri ha Yesu Kriste, ni Xikwembu, Tatana, la n'wi pfuxeke eku feni;

²Ni vamakwerhu hinkwavo lava nga na mina; Eka tikereke ta le Galatiya:

³Tintswalo ni ku rhula a swi ve na n'wina, swi huma eka Xikwembu Tatana, ni ka Hosi ya hina Yesu Kriste,

⁴la tinyiketeke hikwalaho ka ku dyoha ka hina, a ta hi simula emisaveni ya sweswi, leyo biha, hi ku rhandza ka Xikwembu la nga Tata wa hina;

⁵eka yena a ku ve ku kwetsima hilaha ku nga heriki. Amen!

⁶Ndza hlamala hikuva mi tshikile la mi vitaneke etintswalweni ta Kriste, mi hatlise ku hundzela eEvhangelini yin'wana,

⁷swi nga ri leswaku yin'wana yi kona, kambe vanhu va kona lava mi pfilunganyaka, lava rhandzaka ku soholota Evhangeli ya Kriste.

⁸Kasi loko a ri kona loyi a mi dyondzisaka Evhangeli yin'wana eka leyi hi nga mi dyondzisa yona, hambi ku nga va hina, hambi yi ri ntsumi ya le tilweni, a yi ve anathema.

⁹Hilaha hi nga rhanga hi mi byela hakona ni sweswi ndza ha vurisa sweswo: Loko un'wana a mi byela Evhangeli yin'wana eka leyi mi yi amukeleke, a a ve anathema!

¹⁰Hikuva ndzi ri, xana ndzi lava ku khensiwa hi vanhu kumbe hi Xikwembu xana? Kumbexana ndzi rhandza ku tsakisa vanhu-ke? Kasi loko a ndza ha rhandza ku tsakisa vanhu, ingi ndzi nga ri nandza wa Kriste.

¹¹Kutani ndza mi tivisa vamakwerhu, leswaku Evhangeli leyi ndzi mi byeleke yona, a yi humi eka vanhu;

¹²hikuva a ndzi yi amukelanga eka munhu, hambi ku ri ku yi dyondzisiwa hi munhu, kambe ndzi hlavuteriwile yona hi Yesu Kriste.

¹³Hikuva mi twile ta mahanyelo ya mina ya khale, loko ndza ha ri eVuyudeni, hilaha ndzi nga xanisa hakona kereke ya Xikwembu hi ku kariha loko nghasi, a ndzi ri karhi ndzi yi hangalasa,

¹⁴kutani a ndzi siyile ekule lavo tala va ntangha ya mina, a ndzi ri emahlweni ka vona etimhakeni ta Vuyuda, etikweni ra hina, hi ku hisekela mikhuva ya vatata wa hina.

¹⁵Kambe siku swi tsakiseke Xikwembu lexi nga ndzi hlawula, ndza ha ri ekhwirini ra manana, xi va xi ndzi vitana hi tintswalo ta xona,

¹⁶ku ndzi pfuletela N'wana wa xona leswaku ndzi ya n'wi vula exikarhi ka vamatiko; a ndzi vutisanga nyama ni loko yi ri ngati;

¹⁷na kona, a ndzi tlhelelanga eYerusalema eka vaapostola lava nga vo rhanga eka mina; kambe ndzi hatlisile ndzi tiyela eArabiya, ndzi vuya ndzi tlhelela eDamaska.

¹⁸Kute eku heleni ka lembe ra vunharhu, ku va kona ndzi tlhandlukelaka eYerusalema, ku ya tivana na Kefasi, kutani ndzi tshame eka yena masiku ya khume na ntlhanu.

¹⁹A ndzi vonanga wumbe wa vaapostola van'wana, loko a nga ri Yakobo, makwavo wa Hosi.

²⁰Timhaka leti ndzi mi tsalelaka tona, ndzi tiyisa emahlweni ka Xikwembu, a ndzi hembi vunwa.

²¹Ku va kona ndzi yaka ematikweni ya Siriya na Kilikiya.

²²Kasi a ndzi nga si tiviwa hi mahlo hi tikereke ta Yudiya leti nga eka Kriste,

²³a ti twile ntsena loko va ku: “Loyi ingi khale a hi xanisa, sweswi u dyondzisa ku pfumela loku khale a a ri karhi a ku hangalasa.”

²⁴Kutani a ti khensa Xikwembu hikwalaho ka mina.