Read Xitsonga Galatians 2 Bible Online

Galatians 2 - Xitsonga bible

Galatians 2

¹Malembe ya khume na mune, kuteloko ma herile, ndzi tlhela ndzi tlhandlukela eYerusalema, na Barnaba, ndzi teka na Tito.

²Kambe ndzi tlhandlukerile kona hi ku hlavuteriwa, kutani ndzi va longoloxela Evhangeli leyi ndzi yi dyondzisaka exikarhi ka vamatiko, ngopfu ndzi hlamusela exihundleni eka lava khensiwaka, leswaku ndzi nga tshuki ndzi va loyi a tsutsumaka, hambi loyi a tsutsumeke mahala.

³Na Tito, loyi ingi ndzi ri na yena, hambi a ri Mugriki, a nga sindzisiwanga ku yimba,

⁴ku ri hikwalaho ka vamakwerhu va mavunwa, lava nkhunkhuseleke exikarhi ka hina va nga tsundzukiwi, lava kaseleke exihundleni, va ta wonga ku tshunxeka loku hi nga na kona eka Yesu Kriste, va ta hi nghenisa evukhumbini;

⁵kambe a hi pfumelanga ku tiveka ehansi ka vona ni siku ni rin'we, ntiyiso wa Evhangeli wu ta tshamisa eka n'wina wu tiyile.

⁶Loko va ri lava hlayiwaka leswaku hi lavo rhanga, (hambi va ri lavo yini na yini, a swi na mhaka eka mina, hikuva Xikwembu a xi yi hi nghohe ya vanhu); ndzi ri: Lava ringanisiwaka leswaku hi lavo rhanga, a va ndzi engetelanga nchumu;

⁷kambe, kuteloko va vona leswaku ndzi tshembisiwile Evhangeli, ku dyondzisa lava nga yimbiki tanihi Petro ku dyondzisa lava yimbaka,

⁸(hikuva loyi a nga tirha eka Petro ku n'wi endla muapostola wa lava yimbaka, u tirhe ni le ka mina, ku ndzi endla muapostola wa vamatiko),

⁹ndzi ri: Loko va vonisisile nyiko leyi ndzi yi nyikiweke, Yakobo na Kefasi na Yohane, lava ringanisiwaka leswaku i misinya, va nyike mina na Barnaba mavoko ya vunakulobye, leswaku hina hi ya eka vamatiko, kutani vona va ya eka lava yimbeke,

¹⁰ntsena va hi khongoterile leswaku hi tsundzuka swisiwana, kutani leswo, ndzi swi xiyile ku swi endla.

¹¹Kambe loko Kefasi a tile eAntiyoka, ndzi n'wi yimisile ni ku n'wi sivela, hikuva a a fanekeriwe hi ku tshinyiwa.

¹²Hikuva kakuloko van'wana va hume eka Yakobo, loko va nga si fika, a ya dya ni vamatiko; kambe kuteloko va fikile, a tshinela endzhaku, a tihlawula, hi ku chava lava yimbeke.

¹³Kutani Vayuda van'wana a va endla hi ku fihla swin'we na yena; swi tsandza na Barnaba, a tshama a kokiwa hi ku fihla ka vona.

¹⁴Kambe kuteloko ndzi vonile leswaku a va fambi hi ku lulama entiyisweni wa Evhangeli, ndzi byela Kefasi, hinkwavo va ri kona ndzi ku: “Xana wena u nga Muyuda, loko u hanya hi mukhuva wa vamatiko wu nga ri wa Vayuda, u sindzisela yini vamatiko ku hanya hi mukhuva wa Vayuda-ke?”

¹⁵Loko hi ri hina, hi Vayuda hi rixaka, a hi vadyohi va vamatiko;

¹⁶hambiswiritano, hi ku tiva leswaku munhu a nga hlayiwi la lulameke hi mitirho ya nawu, kambe hi ku pfumela eka Yesu Kriste, na hina hi pfumele ka Yesu Kriste, hi ta hlayiwa lava lulameke hi ku pfumela eka Kriste, ku nga ri hi mitirho ya nawu; hikuva a ku na munhu la nga ta hlayiwa la lulameke hi mitirho ya nawu.

¹⁷Loko hi ri karhi hi lava ku hlayiwa lava lulameke ha Kriste, kasi hi kumiwa leswaku ha ha ri vadyohi, xana hileswaku Kriste u tirhele ku dyoha xana? Niswitsanana!

¹⁸Hikuva kungakuloko ndzi tlhela ndzi pfuxa leswi ndzi swi hahluleke, ndzi tiendla mutluri wa nawu.

¹⁹Hikuva mina, hi nawu, ndzi file tlhelo ra nawu, ndzi ta hanyela Xikwembu.

²⁰Ndzi vambiwile na Kriste, kutani ndzi hanya, ndzi nga ri mina, kambe i Kriste la hanyaka eka mina, kutani sweswi, loko ndza ha hanya enyameni, ndzi hanya eku pfumeleni ka N'wana wa Xikwembu, la ndzi rhandzeke, a vuya a tinyiketela mina.

²¹A ndzi cukumeti tintswalo ta Xikwembu, hikuva loko ku lulama ku huma eka nawu, kunene Kriste u fele mahala.