Read Xitsonga Galatians 4 Bible Online

Galatians 4 - Xitsonga bible

Galatians 4

¹Kutani ndzi ri: Loko mudyi wa ndzhaka a ha ri ntsongo, a ku na laha a nga faniki na nandza, hambi a ri yena n'wini wa hinkwaswo;

²kambe wa ha fumiwa hi valanguteri ni varisi ku ko ku fika nkarhi lowu vekiweke hi tata wa yena.

³A swi ri tano na hina, loko ha ha ri vana, a hi ri ku fumiweni hi timhaka to rhanga ta misava.

⁴Kambe loko mikarhi yi herile, Xikwembu xi rhumile N'wana wa xona, la tswariweke hi wansati, a velekiwa a ri hansi ka nawu,

⁵leswaku a kutsula lava nga ehansi ka nawu, ni leswaku hi kuma ku amukeriwa.

⁶Kutani leswi mi nga vana, Xikwembu xi rhumile etimbilwini ta n'wina, Moya wa N'wana wa xona, lowu huwelelaka: “Abba,” hileswaku “Tatana!”

⁷Hikwalaho u nga ha tshami u ri nandza, kambe u n'wana, kutani loko u ri n'wana, u mudyi wa ndzhaka hi ku rhandza ka Xikwembu.

⁸Kambe khale; loko mi nga si tiva Xikwembu, a mi tirhela swikwembu leswi nga riki swona hi xiviri.

⁹Kambe sweswi, leswi mi tivaka Xikwembu, ngopfu ndzi nga ku, leswi mi nga tiviwa hi Xikwembu, xana mi tlhelela yini etimhakeni ta khale leti nga riki na matimba, ta vusiwana, leti mi rhandzaka ku tlhela mi tiboha eka tona?

¹⁰Mi hlaya masiku, ni tin'hweti, ni mikarhi, ni malembe!

¹¹Ndza tshuka hikwalaho ka n'wina hikuva onge ndzi tirhele swahava eka n'wina.

¹²Kotisani mina, hikuva na mina ndzi kotisa n'wina, ndza mi khongela, vamakwerhu. A mi ndzi dyohelanga ha nchumu;

¹³kambe ma swi tiva leswaku loko ndzi sungule ku mi byela Evhangeli, a ndzi ri ku tsaneni enyameni;

¹⁴kutani a mi ndzi solanga, a mi ndzi alelanga hikwalaho ka miringo ya mina leyi nga enyameni ya mina; kambe mi ndzi amukerile kukotisa ntsumi ya Xikwembu, ni kukotisa Yesu Kriste.

¹⁵Ku kateka ka n'wina ka mikarhi yoleyo a ku huma kwihi-ke? Hikuva ndzi nga va mbhoni ya leswaku ingi mi tixokole mahlo ku ndzi nyika wona, loko ngi swi nga va swi endleka.

¹⁶Xana ndzi hundzukile nala wa n'wina hi ku mi byela ntiyiso xana?

¹⁷Valavo va mi chivirikela kambe a va mi chivirikeli swinene kambe va rhandza ku mi tshunxa eka hina, leswaku mi ta chivirikela vona.

¹⁸I swinene ku chivirikela swo saseka hi masiku, ku nga ri siku ndzi nga kona eka n'wina ntsena.

¹⁹Vana vanga, n'wina lava ndzi mi velekaka eku vavisekeni, Kriste a ko a vumbiwa endzeni ka n'wina!

²⁰Ndzi nga swi rhandza ngopfu loko ndzi va na n'wina sweswi, ndzi ta tiva ku vulavula hi mukhuva wun'wana, hikuva ndzi tikeriwa hikwalaho ka n'wina.

²¹Ndzi byeleni, n'wina lava rhandzaka ku va ehansi ka nawu, xana a mi yingisi nawu xana?

²²Kasi ku tsariwile leswaku: Abrahama a a ri ni vana vambirhi; un'wana a a ri wa nsati la nga fuyiwa, un'wana a a ri wa xitekwa.

²³Kambe loyi wa la nga fuyiwa, u velekiwe hi mukhuva wa nyama, kambe lowun'wana, wa la nga fuyiwangiki, u tswariwe hikwalaho ka ku tshembisa.

²⁴Kutani timhaka teto i xifaniso; hikuva i mitwanano mimbirhi; wun'wana i wa ntshava ya Sinayi, lexi velekelaka vukhumbi; lexo i Hagara

²⁵(hikuva Hagara, hi yona Sinayi, ntshava ya Arabiya), u fanisa Yerusalema wa sweswi, la bohiweke ni vana va yena.

²⁶Kambe Yerusalema wa le henhla, a nga bohiwanga, hi yena la nga mana wa hina hinkwerhu.

²⁷Hikuva ku tsariwile va ku: “Titsakele wena mhika loyi u nga velekiki, tlakusa rito u huwelela, wena loyi u nga pfumala mbeleko, hikuva vana va loyi a tshikiweke va ta tlula hi ku tala va loyi a nga ni nuna.”

²⁸Loko hi ri hina vamakwerhu, hi vana va ku tshembisa, ku kotisa Isaka.

²⁹Kutani enkarhini wolowo, kukota loko la velekiweke hi nyama a xanisa loyi a nga tswariwa hi Moya, ni sweswi, swa ha ri tano.

³⁰Kambe Matsalwa ma te yini? “Hlongola mufuyiwa ni n'wanakwe; hikuva n'wana wa la fuyiwaka a nga ka a nga dyi ndzhaka swin'we ni n'wana wa la nga fuyiwiki.”

³¹Hikwalaho vamakwerhu, a hi vana va mufuyiwa, kambe hi va loyi a nga fuyiwiki.