Read Xitsonga Galatians 6 Bible Online

Galatians 6 - Xitsonga bible

Galatians 6

¹Vamakwerhu, kungakuloko munhu a kumiwa enandzwini, n'wina va Moya, n'wi pfuxeni hi moya wa ku olova; kutani wena u tilangutela leswaku u nga ringiwi, na wena.

²Rhwalelanani mirhwalo, mi ta hetisa sweswo nawu wa Kriste.

³Hikuva loko munhu a tianakanya, a ku: Ndzi xilo, kasi a nga ri nchumu, wa tixisa a ri yena;

⁴kambe un'wana ni un'wana a a ringe ntirho lowu nga wa yena, kutani hi kona a nga ta va ni nkarhi wa ku tidzunisa emianakanyweni ya yena, ku nga ri ku tifanisa ni van'wana;

⁵hikuva un'wana ni un'wana u ta rhwala ndzhwalo wakwe.

⁶Loyi a dyondzisiwaka rito a a pambulele la n'wi dyondzisaka mitirho ya yena hinkwayo.

⁷Mi nga tshuki mi tikanganyisa: Xikwembu a xi vungunyiwi; hikuva lexi munhu a xi byalaka, hi xona lexi a nga ta xi tshovela;

⁸la byalelaka nyama ya yena, u ta tshovela enyameni leswo bola; kambe la byalelaka Moya, u ta tshovela eMoyeni vutomi lebyi nga heriki.

⁹Hi nga tshuki hi karhala ku endla leswinene, hikuva hi ta tshovela enkarhini wa kona, loko hi nga lolohi.

¹⁰Hikwalaho, loko ha ha ri ni nkarhi, a hi endleleni hinkwavo leswinene, kambe ngopfungopfu va yindlu ya ku pfumela.

¹¹Vonani maletere lamakulu lawa ndzi mi tsaleleke hi voko ra mina!

¹²Hinkwavo lava rhandzaka ku tidzunisa enyameni, va mi sindzisa ku yimba, ntsena hileswaku va nga tshuki va xaniseriwa xihambano xa Kriste;

¹³hikuva swi tsandza na vona lava yimbeke, a va hlayisi nawu, kambe va rhandza leswaku mi yimba, va ta tidzunisa hi nyama ya n'wina.

¹⁴Kambe loko ndzi ri mina, ku tidzunisa a ku ve kule na mina, loko ku nga ri hi xihambano xa Hosi ya hina, Yesu Kriste, loyi misava yi vamberiweke mina ha yena, na mina ndzi vambiwile eka yona.

¹⁵Hikuva ku yimba, hambi byi ri vukhuna, a swi pfuni nchumu, kambe mhaka leyi nga yona, i ku vumbiwa lokuntshwa.

¹⁶Hinkwavo lava nga ta ya hi nawu wolowo, ku rhula ni ku tsetseleriwa a ku ve ka vona ni ka Israele wa Xikwembu.

¹⁷Ntsena munhu a nga tshuki a ndzi vavisa mbilu, hikuva emirini wa mina, ndzi ni mirosi ya Hosi Yesu.

¹⁸Vamakwerhu, tintswalo ta Hosi ya hina Yesu Kriste a ti ve ni mimoya ya n'wina. Amen!