Read Xitsonga Ephesians 2 Bible Online

Ephesians 2 - Xitsonga bible

Ephesians 2

¹Na n'wina, a mi file emilandzwini ya n'wina ni le eku dyoheni ka n'wina,

²leswi khale mi nga famba ka swona, hi maendlelo ya misava leyi, loko ma ha fumiwa hi hosi leyi fumaka matimba ya mimpfhuka, wu nga moya lowu tirhaka sweswi, eka vanhu lava tiarisaka;

³valavo khale, na hina hinkwerhu ingi hi ri ka vona, loko ha ha ri karhi hi tifambelela eku naveleni ka nyama ya hina, hi endla leswi rhandziwaka hi nyama ni miehleketo ya hina; kambe hi ku tumbuluka ka hina a hi ri vana lava holoveriwaka kukotisa van'wana.

⁴Kambe Xikwembu lexi teleke tintswalo, hikwalaho ka rirhandzu lerikulu ra xona, leri xi hi rhandzeke ha rona,

⁵loko hi tifele emilandzwini ya hina, ndzi ri, xi hi hanyisile swin'we na Kriste,

⁶(hikuva mi hlayisekile hi tintswalo) kutani xi hi pfuxe swin'we, xi tlhela xi hi tshamisisa swin'we ematilweni eka Yesu Kriste;

⁷leswaku emikarhini leyi taka, xi ta kombisa rifuwo leri tlurisaka ra tintswalo ta xona hi vunene bya xona, lebyi xi hi endleleke byona eka Yesu Kriste.

⁸Hikuva mi hlayisekile hi tintswalo, hi ku pfumela, kutani leswo a swi humi ka n'wina, i ku nyika ka Xikwembu;

⁹a swi humi emitirhweni, leswaku ku nga tshuki ku va na munhu la tidzunisaka.

¹⁰Hikuva hina hi mitirho ya xona, hikuva eka Yesu Kriste, hi vumberiwile mitirho leyinene, leyi Xikwembu xi yi lunghiseke khale leswaku hi ta famba ka yona.

¹¹Hikwalaho, anakanyani leswaku n'wina valavo khale ingi mi ri vahedeni hi ku velekiwa, a mi vuriwa makhuna hi lava vuriwaka mankwehe, hikwalaho ka ngoma leyi endliwaka enyameni hi mavoko,

¹²emikarhini yeleyo a mi ri ehandle ka Kriste, a mi hambene ni tiko ra Israele, a mi nga ri na ku averiwa emitwananweni yo tshembisa, a mi nga ri na ku tshemba, a mi nga ri na Xikwembu emisaveni.

¹³Kambe sweswi, eka Yesu Kriste, n'wina valavo ingi mi ri ekule khale, mi tshinetiwile hi ngati ya Kriste,

¹⁴hikuva hi yena ku rhula ka hina, wa ha ri yena la endleke matiko mambirhi tiko rin'we, hi ku susa hiko ra ku avana, ku nga ku vengana ka vanhu,

¹⁵hikuva u herisile enyameni ya yena nawu wa ku lerisa lowo yimeke hi mikhuva leswaku vambirhi a va hundzulela eka yena, munhu un'we lontshwa, hi ku phahlelana mariyeta,

¹⁶kutani u vuyisile swin'we eka Xikwembu, hinkwavo havambirhi, ku va endla miri wun'we hi xihambano xa yena, loko a dlayile ku vengana ha xona.

¹⁷Kutani leswi a nga ta, a vula ku rhula eka n'wina valavo ingi mi ri ekule, ni ku rhula eka lava ingi va ri ekusuhi;

¹⁸hikuva eka yena, havambirhi ka hina hi ni ku tshinela eka Tatana hi Moya wu ri wun'we.

¹⁹Kutani sweswi, a ma ha ri vaendzi kumbe vatsendzeleki, kambe mi va muti wun'we ni vakwetsimi; mi va yindlu ya Xikwembu,

²⁰hikuva mi akiwile emasungulweni ya vaapostola ni vaprofeta, Yesu Kriste a nga yena ribye ra masungulo ra kona,

²¹yeloyi, yindlu hinkwayo yi tlhandlameke ehenhla ka yena, a hlanganisa matlhelo hinkwawo, yi ri karhi yi kula, ku endla tempele leyo kwetsima eHosini,

²²na n'wina mi ri karhi mi akiwa swin'we eka yena ku va yindlu ya Xikwembu eMoyeni.