Read Xitsonga Ephesians 4 Bible Online

Ephesians 4 - Xitsonga bible

Ephesians 4

¹Hikwalaho-ke, mina ndzi nga mubohiwa eHosini ndza mi khongotela, ndzi ri: Fambani hi mukhuva lowu fanelaka ku vitiwa loku mi vitiweke hakona,

²hi ku titsongahata hinkwako ni vunene, ni ku yingisela, mi ri karhi mi yingiselana hi rirhandzu,

³mi chivirika ku hlayisa vun'we bya Moya hi xiboho xa ku rhula.

⁴Ku ni miri wun'we ni Moya wun'we, kukotisa leswi mi vitaneriweke xitshembo xin'we eku vitiweni ka n'wina;

⁵ku ni Hosi yin'we, ni ku pfumela kun'we, ni ku khuvuriwa kun'we;

⁶ni Xikwembu xin'we, Tata wa hinkwavo, la nga ehenhla ka hinkwavo, ni le ka n'wina hinkwenu.

⁷Kambe tintswalo ti nyikiwile un'wana ni un'wana wa hina hi mpimo wa ku nyika ka Kriste,

⁸hilaha va nga te: “Kuteloko a tlhandlukele ehenhla, u byisile vakhomiwa, u nyike vanhu tinyiko.”

⁹Kambe leswi va nge “u tlhandlukile”, hi leswo yini, loko swi nga ri leswaku a rhangile a xikela etindhawini leti nga ehansi ka misava?

¹⁰Loyi ingi a xikile, wa ha ri yena yeloyi a tlhandlukeke ehenhla ka matilo hinkwawo, hileswaku a tata swilo hinkwaswo.

¹¹Kutani wa ha ri yena la nyikeke van'wana va va vaapostola, van'wana vaprofeta van'wana vavuri va Evhangeli, van'wana varisi ni vadyondzisi,

¹²va ta hetisa vakwetsimi, va endla ntirho wa vurisi, va akisa miri wa Kriste,

¹³hi ta kondza hi fika hinkwerhu evun'weni bya vupfumeri ni bya ku tiva N'wana wa Xikwembu; ni le vukulukumbeni bya wanuna la hetisekeke; ni le mpin'weni wa xiyimo lexi hetisekeke xa Kriste,

¹⁴hileswaku hi nga ha ti tshama hi va swihlangi leswi nga ni ku kanakana ni ku tsekatsekisiwa hi mheho yihi ni yihi ya dyondzo, hi ku dyelela ka vanhu, ni mano ya vona yo hambukisa hi mavunwa;

¹⁵kambe a hi endleni leswinene hi rirhandzu, hi ta tiva ku kula ematlhelweni hinkwawo eka loyi a nga nhloko, yena Kriste,

¹⁶yeloyi miri hinkwawo wa yena lowu hlanganeke swinene, ni ku tiyisana swinene hi ku hlangana ka swirho swa wona, wu kuma ku kula hi matimba lama enetaka xirho xin'wana ni xin'wana, leswaku wu akiwa erirhandzwini.

¹⁷Lexi ndzi xi vulaka, ni lexi ndzi xi tiyisaka eHosini, hileswaku mi nga tshuki ma ha famba kukotisa vahedeni lava fambaka hi miehleketo ya hava ya vona,

¹⁸volavo va nga nyamisiwa emiehleketweni ya vona, kutani va le kule ni vutomi bya Xikwembu hi ku ka va nga tivi nchumu hikwalaho ka ku nonon'hwa ka timbilu ta vona.

¹⁹Kutani a va ha twi nchumu, va tinyiketile vuhunguki, ku tirha vumbhisa hinkwabyo, hi ku navela loku nga korwiki.

²⁰Kambe loko mi ri n'wina, a mi dyondzanga sweswo eka Kriste, loko kunene mi n'wi yingisile,

²¹ni loko mi dyondzisiwe eka yena hilaha ntiyiso wu nga eka Yesu hakona,

²²hileswaku, loko ku ri ku famba ka n'wina ka khale, mi tintshunxa eka munhu wa khale, la onhiweke hi ku navela loku dyelelaka,

²³ni leswaku mi hundzuka lavantshwa emoyeni wa miehleketo ya n'wina;

²⁴ni leswaku mi ambala munhu lontshwa, la vumbiweke hi xifaniso xa Xikwembu, eku lulameni ni le ku kwetsimeni ka ntiyiso.

²⁵Hikwalaho-ke, tshikani vunwa, mi vulavula leswi tiyeke, un'wana ni un'wana eka warikwavo, hikuva hi swirho van'wana eka van'wana.

²⁶Kungakuloko mi kariha, mi nga tshuki mi dyoha; dyambu ri nga peleli vukari bya n'wina;

²⁷mi nga muki mi nyika Diyavulosi nkarhi.

²⁸Loyi a nga tshama a yiva, a a nga ha engeti a yiva, kambe a a tikarhate ku tirha leswinene hi mavoko ya yena a ta tiva ku nyika eka loyi a nga evusiwaneni.

²⁹Ku nga tshuki ku huma emilon'wini ya n'wina rito ra tingana, hambi ri ri rin'we, kambe a ku hume rito ro nandziha ra ku akisa hi mfanelo, ri nga rito leri humeselaka lava yingisaka vunene byin'wana.

³⁰Kutani mi nga tshuki mi khomisa Moya lowo Kwetsima wa Xikwembu tingana, wolowu mi funghiweke ha wona siku ra ku kutsuriwa ka n'wina.

³¹Ku vilela hinkwako, ni ku hlundzuka hinkwako, ni ku kariha hinkwako, ni pongo hinkwaro, ni ku hlevana hinkwako, ni mona hinkwawo, a swi susiwe exikarhi ka n'wina,

³²kambe mi yingiselana mi tsetselelana, mi rivalelana, kukotisa leswi Xikwembu, na xona, xi mi rivaleleke ha Kriste.