Read Xitsonga Ephesians 5 Bible Online

Ephesians 5 - Xitsonga bible

Ephesians 5

¹Hikwalaho-ke, mi va vaetisi va Xikwembu, kukotisa vana lava rhandziwaka,

²mi famba erirhandzwini kukotisa loko Kriste, na yena, a mi rhandzile, kutani u tinyiketele hina, a va mhamba ni gandzelo ra ku nun'hwela eka Xikwembu.

³Kambe loko byi ri vuoswi ni vumbhisa hinkwabyo, ni ku navela ka ku fuwa, swi nga tshuki swi vuriwa ni mavito ya swona exikarhi ka n'wina hilaha swi fanelaka vakwetsimi,

⁴hambi yi ri mhaka ya tingana, hambi ti ri ta vuhunguki, hambi ti ri ta mafenya, ti nga timhaka leti nga faneriki; kambe a ku twakale ku khensa,

⁵hikuva ma swi tiva leswaku muoswi, hambi yi ri mbhisa, ni la rhandzaka rifuwo, a nga munhu la tirhelaka swikwembu swahava, a nga ka a nga vi na ku averiwa eku fumeni ka Kriste ni Xikwembu.

⁶Munhu a nga tshuki a mi kanganyisa hi ku vulavula ka swahava, hikuva hikwalaho ka swona leswo, ku kariha ka Xikwembu ku ta ta ehenhla ka vanhu lava nga pfumeriki.

⁷Hikwalaho mi nga tshuki mi va ni mhaka na vona.

⁸Hikuva khale a mi ri vamunyama kambe sweswi, mi va ku vonakala eHosini;

⁹fambani hakona, kukoti swa vana va ku vonakala,

¹⁰(hikuva mihandzu ya ku vonakala, i vunene hinkwabyo, ni ku lulama ni ntiyiso), mi siya leswi tsakisaka Hosi;

¹¹kambe mi nga tshuki mi va ni mhaka emitirhweni ya munyama leyo-ke mihandzu, kambe mi yi sandza:

¹²hikuva swi khomisa tingana loko ku vuriwa ntsena leswi va swi endlaka exihundleni.

¹³Kambe swilo hinkwaswo leswi sandziwaka swi kombisiwa hi ku vonakala; hikuva hinkwaswo leswi kombisiwaka, i ku vonakala.

¹⁴Hikwalaho-ke, va nge: “Pfuka, wena la etlelaka, pfuka exikarhi ka vafi; kutani: Kriste u ta ku voninga.”

¹⁵Loko swi ri tano, tilanguteleni leswaku mi famba hi ku tianakanya, mi nga va tanihi lava nga riki na mano kambe mi va vanhu lava tlhariheke,

¹⁶hatliselani mikarhi hikuva masiku ma bihile.

¹⁷Hikwalaho-ke, mi nga tshuki mi endla hi ku rivala, kambe mi twisisa swinene leswi rhandziwaka hi Hosi.

¹⁸Kutani mi nga tshuki mi pyopyiwa hi vhinyo, hikuva yi ni vuhunguki, kambe mi tala Moya,

¹⁹mi khongotelana hi tipisalema, ni tinsimu, ni ku yimbelela swa Moya, mi yimbelelela Hosi mi vuvutela etimbilwini ta n'wina;

²⁰mi khensa hi masiku Xikwembu Tata wa n'wina, hikwalaho ka hinkwaswo hi vito ra Hosi ya hina, Yesu Kriste.

²¹Titsongahateni, van'wana eka van'wana exichabyeni xa Kriste.

²²N'wina vavasati, yingisani vanuna va n'wina kukotisa loko mi yingisa Hosi;

²³hikuva nuna i nhloko ya wansati, kukotisa leswi Kriste, na yena, a nga nhloko ya Kereke, yena a nga Mukutsuri wa miri;

²⁴kutani kukotisa leswi Kereke yi yingisaka Kriste, vavasati na vona, a va yingise vanuna va vona etimhakeni hinkwato.

²⁵N'wina, vavanuna, rhandzani vasati va n'wina, kukotisa leswi Kriste, na yena, a nga rhandza Kereke, kutani u tinyikete rifu hikwalaho ka yona,

²⁶leswaku a yi kwetsimisa, loko a yi basisile hi ku yi khuvula hi mati hi rito ra yena,

²⁷a ta tiyimisela yona emahlweni ka yena, yi ri Kereke leyo kwetsima, leyi nga riki na xivati ni mikonya, ni loko xi ri xanchumu lexi fanaka na swona; kambe yi ri leyi nga riki na xisandzu.

²⁸Hi mukhuva wolowo, vavanuna va fanele ku rhandza vasati va vona, kukota miri wa vona wa xiviri. La rhandzaka nsati wa yena wa tirhandza.

²⁹Hikuva a ku si va na munhu la nga vengaka nyama ya yena, ni siku ni rin'we, kambe wa yi fihluta, wa yi kufumeta, hilaha Kriste na yena, a endlelaka Kereke hakona,

³⁰hikuva hina hi swirho swa miri wa yena, leswi hi nga nyama ya yena, ni marhambu ya yena.

³¹“Hikwalaho-ke, wanuna u ta sukela tata wa yena ni mana wa yena, a namarhela nsati wa yena, kutani hi vumbirhi bya vona yi ta va nyama yi ri yin'we.”

³²Xihundla lexi xi kurile, kambe ndzi vulavurisa sweswo hi ku ringanisa Kriste ni Kereke.

³³Hi sweswo na n'wina, un'wana ni un'wana a a rhandze nsati wa yena, kukotisa loko a tirhandza; kutani wansati, na yena, a a ve ni xichavo eka nuna wa yena.