Read Xitsonga Philippians 2 Bible Online

Philippians 2 - Xitsonga bible

Philippians 2

¹Hikwalaho, kungakuloko ku chavelela ku ri kona ka Kriste, ni loko rirhandzu ri ri kona leri tiyisaka timbilu, ni ku hlangana ka Moya, ni ku tsetselelana, ni tintswalo,

²hetisani ku tsaka ka mina, mi va ni ku twanana lokunene, ni rirhandzu rin'we, ni Moya wun'we, ni ku anakanya kun'we.

³Mi nga endli nchumu hi ku kanetana, hambi ku ri hi ku tidzunisa ka swahava, kambe un'wana ni un'wana hi ku titsongahata ka yena, a a anakanye leswaku van'wana va n'wi tlula hi vunene.

⁴Un'wana ni un'wana a nga tshuki a hlayisa leswi nga swa yena ntsena, kambe a a hlayise ni swa van'wana.

⁵Mi va ni ku anakanya loku ngi ku ri ka Yesu Kriste,

⁶loyi hambi a ri ni xivumbeko xa Xikwembu, a nga anakanyanga ku tiyisa ku fana ka yena na Xikwembu;

⁷kambe u tithangurile hi ku teka xiyimo xa nandza, a tiendla la fanaka ni vanhu;

⁸kutani loko a kumiwe a fana ni munhu, a titsongahata, a va a tiendla la yingisaka ku yisa eku feni, ni le ku feni ka xihambano.

⁹Hikwalaho, Xikwembu xi n'wi tlakusile hi ku tlurisa, xi n'wi nyikile vito leri nga ehenhla ka mavito hinkwawo,

¹⁰leswaku hi vito ra Yesu, matsolo ya hinkwavo lava nga ematilweni ni la emisaveni ni le hansi ka misava, ma n'wi khinsamela,

¹¹kutani tindzimi hinkwato ti vula leswaku Yesu Kriste i Hosi, ku ve ku dzuniseni ka Xikwembu Tatana.

¹²Varhandziwa va nga, kukotisa loko mi yingisile hi masiku, ku nga ri loko ndzi ri eka n'wina ntsena, kambe ngopfungopfu loko ndzi nga ri kona, tirhelani ku hlayiseka ka n'wina hi nchavo ni ku rhurhumela;

¹³hikuva Xikwembu, hi xona lexi tirhaka eka n'wina ku rhandza ni ku endla hi ku tirhandzela ka xona.

¹⁴Endlani hinkwaswo mi nga n'unun'uti ni ku kanetana,

¹⁵leswaku mi pfumala xisandzu ni xivati, mi va vana va Xikwembu lava nga solekiki exikarhi ka rixaka leri onhakeke, lero homboloka, rolero mi nga va ni ku vangama exikarhi ka rona, kukotisa mavoningo emisaveni, mi ri karhi mi tamela rito ra vutomi;

¹⁶ndzi ta tiva ku tidzunisa esikwini ra Kriste leswaku a ndzi tsutsumelanga swahava, ni ku tirhela mahala.

¹⁷Swi nga tsandza ni loko ndzi endliwa mhamba hikwalaho ka ku gandzela ka n'wina, ni ku tirhela ku pfumela ka n'wina, kona ndzi nga tsaka, ndzi va ndzi tsakisisa na n'wina hinkwenu.

¹⁸Na n'wina, tsakani hikwalaho, mi tsakisana na mina.

¹⁹Ndzi tshembile Hosi Yesu leswaku ndzi ta hatla ndzi mi rhumela Timotiya, leswaku na mina ndzi tiyisiwa loko ndzi tiva timhaka ta n'wina.

²⁰Hikuva a ndzi na wumbe yeloyi mbilu ya yena yi kotisaka ya mina, hambi a ri loyi a xiyaka timhaka ta n'wina swinene;

²¹hikuva hinkwavo va tilavela swa vona, swi nga ri swa Yesu Kriste.

²²Kambe ma swi tiva leswaku u ringiwile, hikuva u tirhele Evhangeli swin'we na mina, kukota n'wana loko a tirhela tata wa yena.

²³Kutani sweswi, ndza tshemba leswaku ndzi ta n'wi rhuma eka n'wina, loko ndzi vonile timhaka leti ndzi nga exikarhi ka tona.

²⁴Kambe ndzi tshembe Hosi leswaku na mina ndzi ta hatla ndzi ta eka n'wina.

²⁵Kambe ndzi anakanyile leswaku ndzi fanele ku mi rhumela Epafrodito makwerhu, ni nakulorhi emitirhweni ni le ku lweni; i murhumiwa wa n'wina ni loyi a nga ndzi pfuna evusiwaneni,

²⁶hikuva u naverile ngopfu ku mi vona hinkwenu, kutani a a vaviseka ngopfu hi leswi mi tweke ku vabya ka yena.

²⁷Hikuva kunene u vabyile, a a lavile ni ku fa; kambe Xikwembu xi n'wi tsetselerile, a nga ri yena ntsena, kambe na mina, leswaku ndzi nga tikeriwi hi mahlomulo lama tlhandlamaneke.

²⁸Ndzi hatlisile ndzi n'wi rhuma eka n'wina hikwalaho, leswaku loko mi tlhela mi n'wi vona, mi tsaka, na mina ndzi vevukeriwa enhlomulweni.

²⁹N'wi amukeleni eHosini hi ku tsaka hinkwako, mi va ni xichavo eka vanhu lavo tano,

³⁰hikuva u tshinelele rifu hikwalaho ka ntirho wa Kriste, u tshikile vutomi bya yena, a ta hetisa mitirho leyi mi tsandzekeke ku ndzi endlela yona.