Read Xitsonga Philippians 3 Bible Online

Philippians 3 - Xitsonga bible

Philippians 3

¹Loko swi ri tano, vamakwerhu, titsakeleni eHosini, A ndzi karhali ku mi tsalela timhaka ti ri tin'we, hikuva mi tiyisiwa ha tona.

²Chavani timbyana; chavani vatirhi lavo biha; chavani ngoma ya vunwa.

³Hikuva hi hina hi nga ngoma leyinene, hina lava hi tirhelaka Xikwembu emoyeni, lava hi tidzunisaka ha Yesu Kriste, lava hi nga titshembiki enyameni.

⁴Swi nga ri leswaku a ndzi pfumala swa ku tidzunisa enyameni. Kungakuloko munhu a anakanya leswaku u ni nkarhi wa ku tidzunisa enyameni, ngopfungopfu hi mina yeloyi,

⁵ndzi nga yimbisiwa hi siku ra ntlhanu na manharhu, ndzi wa rixaka ra Israele, wa nyimba ya Benjamini, ndzi Muheveru, ntukulu wa Vaheveru; hitlhelo ra nawu, ndzi Mufarisi;

⁶loko ku ri ku chivirika, hi mina la xaniseke kereke, loko ku ri ku lulameni ka nawu, a ndzi na xisandzu.

⁷Kambe leswi ngi swi ri rifuwo eka mina, ndzi swi endle swahava hikwalaho ka Kriste.

⁸Kunene ndzi ringanisa leswaku hinkwaswo i swahava, loko swi nga fanisiwa ni vukulukumba bya ku tiva Yesu Kriste, Hosi ya mina, yeloyi ndzi cukumeteke hinkwaswo hikwalaho ka yena, ndzi swi ringanisa ni ntshuri leswaku ndzi fuwa Kriste,

⁹kutani ndzi kumiwa eka yena ndzi nga ri na ku lulama ka mina loku humaka eka nawu, kambe ndzi ri ni ku lulama loku humaka eku pfumeleni eka Kriste, ku ri ku lulama loku humaka eka Xikwembu hi ku pfumela;

¹⁰ndzi ta tiva Yesu Kriste, ni matimba ya ku pfuka ka yena, ni ku hlangana na yena emaxangwini ya yena, ndzi ta fana na yena eku feni ka yena,

¹¹leswaku kumbe, na mina, ndzi ta kuma ku pfuka ka vafi.

¹²Swi nga ri leswaku ndzi tekile hakelo, kumbe swi ri leswaku ndzi hetisekile; kambe ndzi ri karhi ndzi tsutsuma leswaku ndzi yi khoma; kutani, hikwalaho ka swona, na mina ndzi khomiwile hi Kriste.

¹³Vamakwerhu, a ndzi tihlambanyisi leswaku ndzi tekile hakelo, kambe ndzi endla mhaka yin'we ntsena;

¹⁴ndzi rivala swa le ndzhaku, kutani ndzi navela swa le mahlweni, ndzi tsutsumela swa le mahlweni, leswaku ndzi kuma ku hakeriwa ka le henhla, loku hi nga vitaneriwa kona hi Xikwembu ha Yesu Kriste.

¹⁵Hikwalaho, hina lava hetisekeke, a hi anakanyeni sweswo; kutani loko mi ri ni ku anakanya kun'wana emhakeni yin'wana, Xikwembu xi ta mi pfuletela na yona.

¹⁶Ntsena loko ku ri laha hi nga fika kona, ndzi ri: Fambani hi nawu wun'we ni ku anakanya kun'we.

¹⁷Vamakwerhu, mi va vaetisi va mina, mi xiya lava fambaka hi mitila leyi mi yi vonaka eka hina.

¹⁸Hikuva lavo tala lava ndzi va vuleke ngopfu eka n'wina, ni sweswi, ndza ha va vula hi ku rila, volavo va famba va ri valala eka xihambano xa Kriste:

¹⁹Makumu ya vona i ku lova; valavo Xikwembu xa vona ri nga khwiri ra vona, va tidzunisa hi swa tingana ta vona, va anakanya swa misava ntsena.

²⁰Kambe muti wa hina wu le matilweni laha hi langutelaka kona Mulondzovoti, a nga Hosi Yesu Kriste,

²¹la nga ta hundzuluxa miri wa hina lowu solekaka, a wu endla xivumbeko xin'we ni miri wa yena lowo kwetsima, hilaha a nga ni matimba ya ku tivekela hinkwaswo ehansi ka yena.