Read Xitsonga Colossians 1 Bible Online

Colossians 1 - Xitsonga bible

Colossians 1

¹Pawulo, muapostola wa Yesu Kriste hi ku rhandza ka Xikwembu, na Timotiya makwerhu;

²Eka vamakwerhu lava nga eka Yesu Kriste, vakwetsimi ni vapfumeri lava nga eKolosa; Tintswalo ni ku rhula a swi ve na n'wina, swi huma eka Xikwembu Tatana, ni le ka Hosi Yesu Kriste.

³Hi khensa Xikwembu, tata wa Hosi ya hina Yesu Kriste, emikhongelweni leyi hi nga rhuteriki ku mi khongelela ha yona,

⁴hi ri karhi hi byeriwa ku pfumela ka n'wina eka Yesu Kriste, ni rirhandzu ra n'wina eka vakwetsimi hinkwavo,

⁵hikwalaho ka ku tshemba loku mi vekeriweke kona ematilweni, loku mi rhangeke mi ku yingisa hi rito ra ntiyiso ra Evhangeli,

⁶leyi fikeke eka rikwenu kukotisa leswi yi fikeke ematikweni hinkwawo, laha yi vekaka mihandzu kona, kukotisa leswi yi swi endlaka exikarhi ka n'wina, ka hari mpfhuka mi yingisa mi vuya mi twisisa tintswalo ta Xikwembu kunene;

⁷hilaha mi dyondzisiweke hakona hi Epafra, murhandziwa wa mina, ni nakulorhi emitirhweni ni le vulandzeni,

⁸la nga exikarhi ka n'wina, nandza la dzunekaka wa Kriste; hi yena la nga hi tivisa rirhandzu leri nga eka n'wina hi Moya.

⁹Hikwalaho, na hina, mpfhuka hi yingisa sweswo, a hi rhutelangi ku mi khongelela, ni ku mi kombelela leswaku mi tala hi ku tiva ku rhandza ka xona, hi vutlhari hinkwabyo, ni ku anakanya hinkwako ka Moya;

¹⁰leswaku mi famba hi mukhuva lowu fanelaka Hosi, mi n'wi tsakisa hinkwako, mi veka mihandzu emitirhweni leyo saseka hinkwayo, mi va mi kula eku tiveni ka Xikwembu,

¹¹mi ri karhi mi tiyile ematlhelweni hinkwawo hi matimba yo kwetsima ya xona, mi ta va ni ku chivirika hinkwako ni ku yingisela, mi ri ni ku tsaka.

¹²Khensani Tatana la nga mi endla lava lulameleke ku va ni ku averiwa endzhakeni ya vakwetsimi eku vonakaleni;

¹³kutani u hi humesile ematimbeni ya munyama, a hi nghenisa eku fumeni ka N'wana wa yena la rhandziwaka,

¹⁴yeloyi hi nga ni ku kutsuriwa ha yena, ku nga ku rivaleriwa ka swidyoho.

¹⁵Hi yena a nga xifaniso xa Xikwembu lexi nga voniwiki, mativula ya hinkwaswo leswi nga endliwa.

¹⁶Hikuva swilo hinkwaswo swi tumbuluxiwile ha yena, le matilweni ni la emisaveni, leswi voniwaka ni leswi nga voniwiki, ni xiluvelo, ni vuhosi, ni tindhuna, ni vafumi. Hinkwaswo swi tumbuluxiwe hi yena, kambe swi endleriwe yena.

¹⁷Hi yena la nga emahlweni ka swilo hinkwaswo, kutani hinkwaswo swi yimisiwe hi yena.

¹⁸Kambe hi yena nhloko ya miri wa Kereke; hi yena ku sungula ni mativula exikarhi ka vafi, a ta va lowo rhanga ematlhelweni hinkwawo.

¹⁹Hikuva swi tsakisile Xikwembu leswaku ku tala hinkwako ku tshama eka yena;

²⁰ni ku hlanganisi swilo hinkwaswo hi yena, hambi swi ri leswi nga emisaveni, hambi swi ri leswi nga ematilweni hikuva hi yena la endleke ku rhula hi ngati ya xihambano xa yena.

²¹Na n'wina, a mi ri ekule khale, a mi ri valala hi miehleketo ya n'wina ni mitirho leyo biha ya n'wina;

²²kutani u mi hlanganisile hi miri wa yena wa nyama, hi rifu ra yena, a ta mi humesa emahlweni ka yena mi basile, mi nga ri na xivati ni nandzu;

²³loko kunene mi tiya emasungulweni ya ku pfumela, mi nga tsekatseki, mi nga cukumeti ku tshemba ka Evhangeli leyi mi yi tweke, yi nga yona leyi nga vuriwa eka swivumbiwa hinkwaswo swa le hansi ka tilo, yoleyo mina Pawulo ndzi endliweke nandza wa yona.

²⁴Sweswi, ndzi titsakela emaxangwini lama ndzi humelelaka hikwalaho ka n'wina, kutani ndzi hetisa emirini wa mina, leswi seleke swa ku xaniseka ka Kriste, hikwalaho ka miri wa yena yi nga Kereke.

²⁵Ndzi endliwile nandza wa yona hi ku avela loku Xikwembu xi ndzi aveleke kona hikwalaho ka n'wina, ndzi va ndzi mi letela rito hinkwaro ra Xikwembu;

²⁶xi nga xihundla lexi fihliweke emikarhini hinkwayo, ni le tinxakeni hinkwato, kambe sweswi, xi humeseriwe vakwetsimi va xona,

²⁷valavo Xikwembu xi rhandzeke ku va tivisa rifuwo ra ku kwetsima ka xihundla xolexo exikarhi ka vamatiko; xi nga leswaku Kriste u le ka n'wina, yena ku nga ku tshemba ka ku kwetsima.

²⁸Hi yena yeloyi hi n'wi vulaka, hi ri karhi hi pfuxa vanhu hinkwavo, hi dyondzisa vanhu hinkwavo eku tlhariheni hinkwako, hi ta humelerisa vanhu hinkwavo va nga lava hetisekeke eka Kriste.

²⁹Hi leswi ndzi swi tirhelaka, loko ndzi lwa hi matimba ya yena lama tirhaka ngopfu eka mina.