Read Xitsonga Colossians 3 Bible Online

Colossians 3 - Xitsonga bible

Colossians 3

¹Sweswi, loko mi pfukile na Kriste, lavani leswi nga ehenhla, laha Kriste a tshameke kona evokweni ra xinene ra Xikwembu.

²Anakanyani swilo leswi nga ehenhla, swi nga ri swa misava,

³hikuva mi file, kutani vutomi bya n'wina byi fihliwile na Kriste eka Xikwembu.

⁴Kutani Kriste, loyi byi nga vutomi bya n'wina, siku a vuyaka, na n'wina mi ta humelela na yena eku vonakaleni.

⁵Dlayani hakona swirho swa n'wina swa la emisaveni, hileswaku vuoswi, ni vumbhisa, ni ku tiyingisa ka tingana, ni ku navela leswo biha, ni ku navela rifuwo loku ku nga ku tirhela swikwembu swahava;

⁶hikwalaho ka leswo ku kariha ka Xikwembu ku telaka vanhu lava nga pfumeriki;

⁷kutani hi swona leswi mi nga famba eka swona khale, loko ma ha hanya eka swona.

⁸Kambe sweswi, na n'wina, cukumetani swilo leswo hinkwaswo, ku nga ku kariha, ni ku kanetana, ni mona; ku lumbeta, ni marito ya tingana swi nga tshuki swi huma emilon'wini ya n'wina.

⁹Mi nga tshuki mi hembelana, leswi mi hluvuleke munhu wa khale ni mitirho ya yena,

¹⁰mi va mi funengele munhu lontshwa la dzuvulaka eku tiveni, hi xifaniso xa la n'wi tumbuluxeke.

¹¹Laha a ku na Mugriki, ni loko a ri Muyuda, ni loko ri ri nkwerha, ni loko ri ri khuna, ni loko a ri mubarbari, ni loko a ri Muskita, ni loko a ri hlonga la fuyiweke, ni loko a ri la nga fuyiwangiki, kambe Kriste i hinkwaswo eka hinkwavo.

¹²Funengelani hakona, leswi mi nga vahlawuriwa va Xikwembu, vakwetsimi ni varhandziwa, ku tiyingisa ka tintswalo, ni vunene, ni ku titsongahata, ni ku olova, ni ku yingisela;

¹³yingiselanani mi rivalelana, loko un'wana a ri ni mholovo ni un'wana; kukota Kriste a mi tweleke vusiwana, endlisani sweswo na n'wina.

¹⁴Kutani ehenhla ka sweswo hinkwaswo, mi funengela rirhandzu, ku nga ku boha ka ku hetiseka.

¹⁵Kutani ku rhula ka Kriste loku mi vitaneriweke kona ku endla miri wun'we, a ku fume etimbilwini ta n'wina; kambe mi va ni ku khensa.

¹⁶Rito ra Kriste a ri tshame eka n'wina, ri andza. Dyondzisanani hi vutlhari hinkwabyo, mi khongotelana hi tipisalema, ni ku yimbelela, ni tinsimu ta Moya, mi ri karhi mi yimbelelela Hosi hi timbilu ta n'wina hi ku khensa.

¹⁷Kutani leswi mi swi endlaka, hambi yi ri yini na yini, hi ku vulavula kumbe hi ku tirha, endlani hinkwaswo hi vito ra Hosi Yesu, mi ri karhi mi khensa ha yena eka Xikwembu Tatana.

¹⁸N'wina vavasati, yingisani vanuna va n'wina hilaha swi fanelaka eHosini.

¹⁹N'wina vavanuna, rhandzani vasati va n'wina, mi nga tshuki mi va ni xiviti eka vona.

²⁰Vana, yingisani vatata wa n'wina, ni vamana wa n'wina etimhakeni hinkwato, hikuva hi swona leswi tsakisaka Hosi.

²¹Vatatana, mi nga vi na xiviti eka vana va n'wina, va nga ti hela timbilu.

²²Malandza, yingisani etimhakeni hinkwato lava nga veni va n'wina hi nyama; mi nga tshuki mi va tirhela loko va mi languta ntsena, swo nge mi rhandza ku tsakisa vanhu, kambe tirhani hi mbilu leyo saseka, ni ku chava Xikwembu.

²³Kutani leswi mi swi endlaka, hambi yi ri yini na yini, swi endleni hi timbilu ni ku rhandza, mi endlela Hosi, va nga ri vanhu;

²⁴hikuva ma swi tiva leswaku mi ta nyikiwa hi Hosi hakelo ya ndzhaka; tirhelani Kriste Hosi.

²⁵Kambe la endlaka leswo homboloka, u ta rhwala leswi a swi endleke, hikuva a ku yiwi hi nghohe ya vanhu.