Read Xitsonga Joshua 14 Bible Online

Joshua 14 - Xitsonga bible

Joshua 14

¹Hi tona tindzhaka leti vana va Israele va ti kumeke etikweni ra Kanana leti Eliyazara, muprista, na Yoxuwa n'wana Nuni, ni tindhuna ta tindlu ta tinyimba ta vana va Israele va ti aveleke vona.

²Ku averiwa ka ndzhaka ku endliwile hi vuhlolotwana hilaha Yehovha a leriseke hakona ha Muxe eka tinyimba ta 9 ni hafu ya nyimba.

³Hikuva Muxe a a nyikile ndzhaka eka tinyimba letimbirhi ni ka hafu ya nyimba ehase ka Yordani; kambe a nga nyikanga Valevhi ndzhaka exikarhi ka vona.

⁴Hikuva vana va Yosefa, Manase na Efrayimi, a ti ri tinyimba timbirhi; kutani a ku nyikiwangi Valevhi ku averiwa etikweni, loko yi nga ri miti ya ku aka eka yona, ni matikwana ya yona lama fanelaka mitlhambi ya vona ni rifuwo ra vona.

⁵Vana va Israele va endla hilaha Yehovha a leriseke Muxe hakona, kutani va avanyisa tiko.

⁶Vana va Yuda va tshinelela Yoxuwa eGiligala, kutani Kalebe n'wana Yefune, Mukenizi, a ku eka yena: “Wa tiva rito leri Yehovha a ri byeleke Muxe, munhu wa Xikwembu, ehenhla ka mina, ni le henhla ka wena loko a ri eKadexe-Bariniya.

⁷A ndzi ri munhu wa malembe ya 40 loko Muxe, nandza wa Yehovha, a ndzi rhuma, loko hi ri eKadexe-Bariniya; ku ya kamba tiko, kutani ndzi n'wi ambele timhaka hilaha ingi ti ri kona embilwini ya mina.

⁸Vamakwerhu lava khandziyeke na mina a va tsema mihlana ya tiko, kambe mina ndzi landzele swinene Yehovha, Xikwembu xa mina.

⁹Kutani Muxe a hlambanya siku lero, a ku: ‘Tiko leri kandziyiweke hi milenge ya wena, yi ta va ndzhaka ya wena ni ya vana va wena hilaha ku nga heriki, hikuva u landzile swinene Yehovha, Xikwembu xa mina!’

¹⁰Sweswi, waswivo, Yehovha u ndzi hanyisile hilaha a nga vula hakona, hi malembe lawa ya 45 lama hundzeke, ku suka enkarhini lowu Yehovha a byeleke Muxe rito lero, loko Israele a ri karhi a famba emananga; kutani sweswi, ndzi munhu wa malembe ya 85.

¹¹Ni namuntlha, ndza ha tiyile kukota siku leri ndzi rhumiweke hi Muxe, matimba ya mina ya sweswi ma fana ni matimba ya khale ku ya eku lweni, ku huma ni ku nghena.

¹²Sweswi, ndzi nyike ntshava leyi Yehovha a nga yi vula siku rolero; hikuva u swi yingisile u ri wena siku rolero, leswaku Vaanaka va kona, ni miti leyikulu leyi biyeriweke. Kumbe Yehovha u ta va na mina, kutani ndzi ta va hlongola, hilaha Yehovha a nga vula hakona.”

¹³Kavaloko Yoxuwa a n'wi katekisa, kutani a nyika Hebroni eka Kalebe n'wana Yefune, Mukenizi,

¹⁴yi va ndzhaka ya yena ku fika ni namuntlha, hikuva a a tiyile: ku landza Yehovha, Xikwembu xa Israele.

¹⁵Khale a va thya Hebroni Kiriyata-Araba; (muti wa Araba): Araba a a ri wanuna lonkulu ngopfu exikarhi ka Vaanaka. Kutani tiko ri etlela, ri nga ri na ku lwa.