Read Xitsonga Joshua 16 Bible Online

Joshua 16 - Xitsonga bible

Joshua 16

¹Ku averiwa ka vana va Yosefa loku humeke hi vuhlolotwana, ku ve ku suka eYordani ni le Yeriko, ematini ya Yeriko, evuxeni, emananga lama sukaka eYeriko ku fika entshaveni ya Betele;

²ku suka eBetele, ndzilakana wu ya eLuzi, wu hundza ekusuhi ni ndzilakana wa Vaariki, eAtaroti;

³kutani wu rhelela evupeladyambu ekusuhi ni ndzilakana wa Vayafeleti, wu fika endzilakaneni wa Bet-Horoni wa le hansi, ni ku fika eGezere, kutani wu ya huma elwandle.

⁴Vana va Yosefa, Manase na Efrayimi, va kuma kona ku averiwa ka vona.

⁵Hi wona ndzilakana wa vana va Efrayimi, hi tindlu ta vona: Ndzilakana wa ndzhaka ya vona wu le vuxeni ka Ataroti-Adara ku fika eBet-Horoni wa le henhla,

⁶ndzilakana wu ya evupeladyambu, tlhelo ra Mikimeta, en'walungwini; kutani ndzilakana wu rhendzeleka evuxeni eTaana-Xilo, wu ya emahlweni evuxeni, tlhelo ra Yanowaka;

⁷kutani wu suka eYanowaka, wu rhelela eAtaroti na Naara, wu ya fika eYeriko, kutani wu ya hela eYordani.

⁸Ndzilakana wu suka eTapuwaka, wu ya evupeladyambu, exinambyaneni xa Kana, wu ya hela elwandle. Hi yona ndzhaka ya nyimba ya vana va Efrayimi hi tindlu ta vona.

⁹Vana va Efrayimi a va ri ni miti hitlhelo, exikarhi ka ndzhaka ya vana va Manase; miti hinkwayo leyi yi ri ni swimitana swa yona.

¹⁰Kambe a va hlongolanga Vakanana lava akeke eGezere; sweswo Vakanana va akile exikarhi ka va Efrayimi ku fika ni namuntlha; ntsena va tirhisiwa mitirho.