Read Xitsonga Joshua 20 Bible Online

Joshua 20 - Xitsonga bible

Joshua 20

¹Yehovha a byela Yoxuwa a ku:

²“Byela vana va Israele u ku eka vona: ‘Tivekeleni miti ya vuchavelo leyi ndzi mi byeleke yona hi nomu wa Muxe,

³leswaku mudlayi la dlayeke munhu hi ku hoxa, ku nga ri ha vomu, a ta tiva ku balekela kona: swi ta va swichavelo swa n'wina hikwalaho ka murihiseri wa ngati.

⁴Mudlayi u ta balekela eka wun'wana wa miti leyi, u ta yima enyangweni ya muti, kutani u ta vula timhaka ta yena etindleveni ta vakulukumba va muti lowu. Kavaloko va ta n'wi amukela ekarikwavo emutini, va ta n'wi komba yindlu, kutani u ta tshama na vona.

⁵Kutaku va nga ka va nga nyiketi mudlayi emavokweni ya yena, hikuva u dlayile warikwavo ku nga ri ha vomu, a nga n'wi venganga ni tolo ni tolweni.

⁶U ta tshama emutini lowu a ko a yima eku avanyisiweni, emahlweni ka nhlengeletano, ni ku fika erifuni ra muprista lonkulu wa nkarhi wolowo. Kavaloko mudlayi u ta timukela, a tlhelela emutini wa yena ni le ndlwini ya yena, emutini lowu a sukeke eka wona.’ ”

⁷Kavaloko va hlawula Kedexe wa Galeliya, entshaveni ya Neftali, na Xikeme entshaveni ya Efrayimi, na Kiriyata-Araba; wu nga Hebroni, entshaveni ya Yuda.

⁸Ehase ka Yordani, evuxeni bya Yeriko, va hlawula Beseri, emananga, erivaleni wu ri muti wa nyimba ya Rhuveni, na Ramoto wa Giliyadi, muti wa nyimba ya Gadi, na Golani wa Baxani, wu ri muti wa nyimba ya Manase.

⁹Hi yona miti leyi vekeriweke vana va Israele hinkwavo, ni muluveri la luvelaka exikarhi ka vona, leswaku un'wana ni un'wana la dlayeke munhu, ku nga ri ha vomu, a tiva ku balekela kona. A nga tshuki a dlawa hi voko ra murihiseri wa ngati, a nga si humelela emahlweni ka nhlengeletano.