Read Xitsonga Joshua 7 Bible Online

Joshua 7 - Xitsonga bible

Joshua 7

¹Vana va Israele va tilavele nandzu hikwalaho ka anathema (leswo yila); Akani, n'wana Karimi, n'wana Zabidi, n'wana Zera, wa nyimba ya Yuda, a teka leswi yirisiweke kutani Yehovha a karihela vana va Israele.

²Yoxuwa, loko a a ri Yeriko, a rhuma vanhu eka Ayi, ekusuhi na Beta-Avene, evuxeni bya Betele, a ku eka vona: “Khandziyani mi ya kamba tiko. Kutani vanhu lava va khandziya, va ya kamba Ayi.

³Va tlhelela eka Yoxuwa, va ku eka yena: Tiko ri nga tshuki ri tlhandluka hinkwaro, vanhu lava lavaka ku va 2 000, kumbe 3 000, a va khandziye kona, va ta hlula Ayi. U nga karhati tiko hinkwaro hikuva a va talanga.”

⁴Kutani vanhu va tiko lava lavaka ku va 3 000, va khandziya kona, kambe va baleka emahlweni ka vanhu va Ayi.

⁵Vanhu va Ayi va dlaya vanhu va vona lava lavaka ku va 36, kutani va va hlongorisa emahlweni ka nyangwa, ku fika eXebarimi, va va hlula eku rheleleni, kutani mbilu ya tiko yi nyuka yi fana ni mati.

⁶Yoxuwa a handzula tinguvu ta yena, kutani a tiwisa ehansi hi mombo wa yena emahlweni ka areka ya Yehovha ku fika nimadyambu, a ri ni vakulukumba va Israele, kutani va chela ntshuri etinhlokweni ta vona.

⁷Kavaloko Yoxuwa a ku: “Yo! Hosi Yehovha, u perisele yini-ke tiko leri eYordani, ku hi nyiketa emavokweni ya Vaamori, ni ku hi lovisa? Ingi loko hi pfumerile ku tshama ehase ka Yordani!

⁸Ndzi nga vula yini, Hosi, leswi Israele a fularheleke valala va yena?

⁹Vakanana, ni vaaki hinkwavo va tiko va ta swi twa, va ta hi rhendzela, va ta susa vito ra hina emisaveni; kutani u ta endla yini hi vito ra wena lerikulu xana?”

¹⁰Yehovha a ku eka Yoxuwa: “Pfuka, u titlatlalatela yini hi mombo xana?

¹¹Israele u dyohile, u tlurile ntwanano wa mina lowu ndzi va leriseke wona kambe va tekile leswo yila, va swi yivile va va, va swi fihla etinhundzwini ta vona.

¹²Hikwalaho, vana va Israele va nga ka va nga tiyi emahlweni ka valala va vona, va ta fularhela valala va vona hikuva va yila. Ndzi nga ka ndzi nga ha vi na n'wina loko mi nga herisi leswo yila exikarhi ka n'wina.

¹³Pfuka, u hlawula tiko, u ku: ‘Tihlawulelani mundzuku. Hikuva Yehovha, Xikwembu xa Israele, u vula sweswo, a ku: “Ku ni ku yila exikarhi ka wena, Israele! U nga ka u nga ha tiyi emahlweni ka valala va wena, mi ko mi susa leswo yila exikarhi ka n'wina.”

¹⁴Ni mixo mi ta tshinela hi tinyimba, kutani nyimba leyi Yehovha a nga ta yi khoma, vi ta tshinela hi tindlu, kutani yindlu leyi Yehovha a nga ta yi khoma, yi ta tshinela hi mindyangu, kutani ndyangu lowu Yehovha a nga ta wu khoma, wu ta tshinela hi vanhu.

¹⁵Kutani loyi a nga ta kumiwa a ri ni leswo yila, u ta hisiwa ni hinkwaswo leswi nga swa yena, hikuva u tlurile ntwanano wa Yehovha, u endlile leswo biha ngopfu eIsraeleni.’ ”

¹⁶Yoxuwa a pfuka nimixo, kutani a tshineta Israele hi tinyimba, kutani nyimba ya Yuda yi khomiwa.

¹⁷A tshineta tindlu ta Yuda, kutani yindlu ya Zera yi khomiwa, a tshineta yindlu ta Zera hi mindyangu, kutani Zabidi a khomiwa.

¹⁸A tshineta ndyangu wa yena hi vanhu, kutani Akani, n'wana Karimi, n'wana Zabidi, n'wana Zera, wa nyimba ya Yuda, a khomiwa.

¹⁹Yoxuwa a ku eka Akani: “N'wananga dzunisa Yehovha, Xikwembu xa Israele u n'wi vonga, kutani u ndzi byela lexi u xi endleke, u nga ndzi fihleli xona.”

²⁰Kutani Akani a hlamula, a ku eka Yoxuwa: “Hi swona, hi mina loyi ndzi nga dyohela Yehovha, Xikwembu xa Israele ndzi endlile swoleswo:

²¹Ndzi vonile exumeni nguvu leyo saseka, ya Xinara, ni madzana mambirhi ya tixikele ta silivhere, ni nsuku lowu vumbiweke wa tixikele ta 50 ta ku tika, ndzi swi naverile, ndzi va ndzi swi teka; kutani waswivo, swi fihliwile emisaveni entsongeni wa mina, kambe mali yi le hansi ka swona.”

²²Yoxuwa a rhuma tintsumi; ti tsutsuma entsongeni wa yena, kutani maswivo, swilo leswi a swi fihliwile entsongeni, ni mali a yi ri ehansi.

²³Va ya swi teka entsongeni, va swi tisa eka Yoxuwa ni ka vana va Israele kutani va swi veka emahlweni ka Yehovha.

²⁴Kavaloko Yoxuwa ni Vaisraele hinkwavo va khoma Akani, n'wana Zera, ni mali, ni nguvu, ni nsuku, ni vana va yena va xinuna ni va xisati, ni tihomu ta yena, ni timbhongolo ta yena, ni tinyimpfu ta yena, ni ntsonga wa yena, ni hinkwaswo swa yena, va swi yisa enkoveni wa Akora.

²⁵Kutani Yoxuwa a ku: “U hi pfilunganyisele yini-ke? Yehovha u ta ku pfilunganyisa namuntlha!” Kavaloko Vaisraele hinkwavo va n'wi khandla hi maribye, kutani va va hisa, va va dlaya hi maribye.

²⁶Kambe va aka ehenhla ka yena nhulu leyikulu leyi nga kona ni namuntlha. Kutani Yehovha a tlhela evukarini lebyikulu bya yena; hikwalaho va thya, ni namuntlha, ndhawu leyi, nkova wa Akora (ku pfilunganya).