Read Xitsonga 2 Thessalonians 3 Bible Online

2 Thessalonians 3 - Xitsonga bible

2 Thessalonians 3

¹Loko swi ri tano, vamakwerhu, hi khongeleleni, leswaku rito ra Hosi ri tsutsuma, ri dzunisiwa hinkwako kukotisa eka rikwenu;

²ni leswaku hi lamuleriwa eka vanhu lavo homboloka ni lavo biha; hikuva ku pfumela a hi ka vanhu hinkwavo.

³Kambe Hosi ya tshembeka, hi yona leyi nga ta mi tiyisa ni ku mi sirhelela eka lowo biha.

⁴Kutani loko mi ri n'wina, hi ni ku tshemba ka Hosi leswaku mi endla swilo leswi hi mi lerisaka swona, ni leswaku ma ha ta swi endla.

⁵Hosi a yi yise timbilu ta n'wina erirhandzwini ra Xikwembu, ni le ku yimeleni ka Kriste hi ntiyiso.

⁶Ha mi khongotela, vamakwerhu, hi vito ra Yesu Kriste, Hosi ya hina, leswaku mi hambana ni makwenu wihi ni wihi la nga fambiki hi nawu ni ku dyondzisa loku a ku amukeleke eka hina.

⁷Hikuva ma swi tiva na n'wina, hilaha mi faneleke ku hi etisa hakona, hikuva a hi fambanga exikarhi ka n'wina hi mukhuva lowu arisiweke hi nawu;

⁸na swona, a hi dyangi vuswa bya munhu ntsena, kambe a hi tirha nhlekanhi ni vusiku hi ku nonon'hwa ni mikarhalo, leswaku hi nga tshuki hi tikerisa munhu exikarhi ka n'wina.

⁹Swi nga ri leswaku hi pfumarile timfanelo ta ku endlisa sweswo; kambe a ku ri ku mi endlela ntila ha hina, mi ta hi etisa.

¹⁰Hikuva kakuloko ha ha ri karikwenu, hi tshama hi mi byela, hi ku: Loko un'wana a ala ku tirha, ni ku dya, a nga tshuki a dya.

¹¹Kasi hi twile leswaku van'wana va rikwenu va famba hi mikhuva leyi ariwaka hi nawu, va nga tirhi, kambe va nghena etimhakeni leti nga riki ta vona.

¹²Lavo tano hi va kombela, ni ku va khongotela hi Hosi ya hina, Yesu Kriste, leswaku va tirha hi ku rhula, va ta tiva ku dya swakudya leswi nga swa vona.

¹³Loko mi ri n'wina, vamakwerhu mi nga tshuki mi karhala ku endla leswinene.

¹⁴Kungakuloko un'wana a nga yingisi marito ya hina ya epistola yoleyi, n'wi hlawuleni, kutani mi nga hlangani na yena, a ta va ni tingana.

¹⁵Hambiswiritano, mi nga tshuki mi n'wi endla nala, kambe mi n'wi laya kukota makwenu.

¹⁶Sweswi, hosi ya ku rhula, hi xiviri xa yona, a yi mi nyike ku tsaka hi masiku, ematlhelweni hinkwawo. Hosi a yi ve na n'wina hinkwenu.

¹⁷Mina Pawulo, ndza mi xeweta hi voko ra mina; hi xona xikombiso xa mina tiepistoleni ta mina hinkwato ndzi tsarisa sweswo.

¹⁸Tintswalo ta Yesu Kriste, Hosi ya hina, a ti ve na n'wina hinkwenu.