Read Xitsonga 2 Timothy 2 Bible Online

2 Timothy 2 - Xitsonga bible

2 Timothy 2

¹Loko u ri wena, n'wananga, tiya matimba etintswalweni leti nga eka Yesu Kriste.

²Kutani timhaka leti u ti tweke eka mina emahlweni ka timbhoni leto tala, u ti veka eka vanhu lavo tshembeka, lava lulamelaka ku dyondzisa van'wana.

³Loko u ri wena, yingisela ku vaviseka kukota nhenha leyinene ya Yesu Kriste.

⁴La yaka enyimpini a nga titsandzekisi hi timhaka ta vutomi lebyi, kambe mhaka ya yena i yin'we, i ya ku tsakisa la n'wi rhambeke.

⁵Kambe munhu, loko a lwa eku tlangeni, a nga ka a nga nyikiwi harhi, loko a nga lwi hi nawu.

⁶La rimaka, u fanela ku tirha eku sunguleni ku va kona a nga ta tshovela swakudya.

⁷Anakanya lexi ndzi xi vulaka, kutani Hosi a yi ku nyike ku tlhariha etimhakeni hinkwato.

⁸Anakanya Yesu Kriste, wa rixaka ra Davhida, la pfukeke eku feni, hilaha Evhangeli ya mina yi vulaka hakona,

⁹yi nga Evhangeli leyi ndzi twaka ku vaviseka hikwalaho ka yona, ndzi ko ndzi bohiwa kukota mudyohi; kambe rito ra Xikwembu a ri bohiwanga.

¹⁰Hikwalaho ka swona, ndzi yingisela hinkwaswo hikwalaho ka lava hlawuriweke, leswaku na vona, va ta kuma ku hanyisiwa loku nga eka Yesu Kriste, swin'we ni ku twarisiwa loku nga heriki.

¹¹Rito leri ri tiyile, leri nge: Loko hi file na yena, na kona hi ta hanya na yena.

¹²Loko hi yingisela na yena, na kona hi ta fuma na yena; loko hi n'wi landzula, na yena u ta hi landzula.

¹³Loko hi nga tshembeki, yena kambe wa tshembeka, hikuva a nga swi koti ku tilandzula.

¹⁴Tsundzuxa vanhu timhaka leti, u va khongotela hi matimba emahlweni ka Hosi, va nga tshuki va lwa hi marito, hikuva a swi pfuni nchumu, loko ku nga ri ku hambukisa lava swi twaka.

¹⁵Tiya matimba ku humelela emahlweni ka Xikwembu u ri la nga amukeriwaka, ni mutirhi la nga riki na tingana, la phamelaka hi ku lulama rito ra ntiyiso.

¹⁶Kambe alela mpfumawulo wa marito ya swahava ni ya ku sandza, hikuva lava ma vulaka va ta ya emahlweni evusandzwini;

¹⁷kutani rito ra vona ra pfundzela kukota xilondza. Exikarhi ka vona ku na Himenayo na Fileto,

¹⁸lava hambukeke eka ntiyiso, va ri ku pfuka ka vafi ku humelele khale, kutani va mbundzuxa ku pfumela ka van'wana.

¹⁹Hambiswiritano, masungulo ya ku tiya ya Xikwembu ma yimile swinene, ma nga ni mfungho wolowo, wu nge: “Hosi yi tiva lava nga va yona,” na kona: “Un'wana ni un'wana la vulaka vito ra Kriste, a a avane ni leswo homboloka.”

²⁰Endyangweni lowukulu a ku na swibya swa nsuku kumbe swa silivhere ntsena, kambe swi kona swo vatliwa ni swa vumba; kutani swin'wana swi ni mitirho ya ku twakala, swin'wana swi ni mitirho leyi nga dzuniwiki.

²¹Loko-ke, munhu a tibasisa eka swilo leswo, xi ta va xibya lexi twarisiwaka, lexi kwetsimisiweke, lexi pfunaka swinene n'wini wa xona, xi lunghiseriwile ntirho wun'wana ni wun'wana lowunene.

²²Kambe chava ku navela loko biha ka lavantshwa; kambe landza ku lulama, ni ku pfumela, ni rirhandzu, ni ku rhula swin'we ni lava khongelaka Hosi hi timbilu leto tenga.

²³Kambe cukumeta timhaka ta vuphukuphuku leti nga riki na dyondzo, u ri karhi u tiva leswaku ti tswala timholovo.

²⁴Kambe loko a ri nandza wa Hosi, a nga tshuki a va na rilwo, kambe u fanele ku va ni musa eka hinkwavo, ni ku tiva ku dyondzisa a leha mbilu,

²⁵a dyondzisa hi ku olova lava tiarisaka, Xikwembu xi ko xi va nyika kumbe ku hundzuka, va ta tiva swa ntiyiso,

²⁶leswaku loko va tlhelele eku tlhariheni, va ta huma entlhan'wini wa Diyavulosi, loyi va phasiweke hi yena ku ya endla ku rhandza ka yena.