Read Xitsonga Hebrews 1 Bible Online

Hebrews 1 - Xitsonga bible

Hebrews 1

¹Xikwembu xi vulavurile khale na vatatana hi mikarhi leyo tala ni mikhuva leyo tala xi vulavula hi vaprofeta;

²kambe sweswi, hi masiku walawo ya makumu, xi vulavule na hina hi N'wana wa xona, yeloyi xi n'wi vekeke mudyandzhaka wa swilo hinkwaswo, yeloyi kambe xi endleke ha yena hinkwaswo leswi vumbiweke,

³yena yeloyi a nga ku vonakala ka ku kwetsima ka xona, ni xivumbeko xa xiviri xa xona, la tamelaka swilo hinkwaswo hi rito ra yena ra matimba kuteloko a hlantswile swidyoho swa hina hi xiviri xa yena, u tshamile evokweni ra xinene ra vukulukumba bya le henhla,

⁴a va a tlula ni tintsumi swonghasi, kukotisa leswi a kumeke vito leri ri ti tlulaka.

⁵Hikuva hi yihi exikarhi ka tintsumi Xikwembu xi yi byeleke, ni siku ni rin'we, xi ku: “N'wananga hi wena, ndzi ku velekile namuntlha.” Na kambe: “Ndzi ta va tatana eka yena, kutani yena a va n'wana eka mina.”

⁶Kambe siku xi tisaka N'wana wa xona wa mativula laha emisaveni, xi te: “Tintsumi hinkwato ta Xikwembu a ti n'wi khinsamele!”

⁷Kasi loko xi vula tintsumi, xi te: “Xi endle tintsumi ta xona mimoya, ni malandza ya xona malangavi ya ndzilo”;

⁸kambe loko xi vula N'wana, xi te: “Xikwembu, xiluvelo xa wena xi tiyile hilaha ku nga heriki, kutani nhonga ya vuhosi bya wena i nhonga ya ku lulama.

⁹U rhandzile leswo lulama, u vengile leswo homboloka; hikwalaho, oho Xikwembu, Xikwembu xa wena xi ku cheleke hi mafurha ya ku tsakisisa, xi ku veke ehenhla ka varikwenu hinkwavo.”

¹⁰Kutani xi te: “Hi wena Hosi u nga tiyisa misava ka ha ri eku sunguleni; ni matilo i mitirho ya mavoko ya wena;

¹¹wona ma ta lova, kambe wena u tshama hi masiku, kutani ma ta hlakala hinkwawo kukotisa nguvu.

¹²U ta ma songa kukotisa xifunengelo, kutani ma ta hundzuluka; kambe wena u ta tshama u ri wena, kutani malembe ya wena a ma nga vi na makumu.”

¹³Kambe hi yihi exikarhi ka tintsumi, xi yi byeleke, ni siku ni rin'we, xi ku: “Tshamisa evokweni ra mina lera xinene, ndzi ko ndzi endla lava nga valala ka wena vunavelo bya mikondzo ya wena.”

¹⁴Xana hinkwato a hi mimoya leyi tirhaka xana, leyi rhumiweke entirhweni, yi rhumeriwa lava nga ta fuwa ndzhaka ya ku hlayiseka xana?