Read Xitsonga Hebrews 10 Bible Online

Hebrews 10 - Xitsonga bible

Hebrews 10

¹Hikuva nawu, leswi wu nga ndzhuti wa leswo saseka leswi nga ta humelela, swi nga riki xifaniso xa xiviri xa timhaka, wu tsandzekile ku hetisisa, ni siku ni rin'we, lava tshinelelaka magandzelo lama humesiwaka hi masiku hi lembe rin'wana ni rin'wana.

²Loko swi nga ri tano, xana ingi va nga tshikanga ku ma humesa, hikuva vagandzeri lava ngi va hlantswiwile kan'we va nga ka va nga ha vi na ripfalo ra swidyoho swa vona.

³Kambe emagandzelweni walowo, ku anakanyiwa vudyoho hi lembe rin'wana ni rin'wana;

⁴hikuva ngati ya tinkunzi ni ya swiphongo yi tsandzeka ku susa xidyoho.

⁵Hikwalaho Kriste, siku a nga ta emisaveni, u te: “A ku rhandzanga magandzelo, hambi yi ri mihlengo, kambe u ndzi lunghisele miri.

⁶A ku tsakelanga magandzelo lama hisiwaka, hambi ma ri lama humesiwaka hikwalaho ka vudyoho.

⁷Hilaha ndzi nge: ‘Vona, Xikwembu, ndza ta ku ta endla ku rhandza ka wena,’ hilaha ku tsariweke ehenhla ka mina ebukwini.”

⁸Leswi a nga te eku sunguleni leswaku: “Loko ma ri magandzelo hambi yi ri mihlengo, ni magandzelo lama hisiwaka, ni magandzelo lama humesiwaka hikwalaho ka vudyoho, a ku ma rhandzanga ni ku ma tsakela”; kasi hi swona leswi humesiwaka hi nawu;

⁹a engeta kambe, a ku: “Vona, Xikwembu, ndza ta ku ta endla ku rhandza ka wena.” U herisa hi sweswo swo sungula, leswaku a ta veka swa vumbirhi.

¹⁰Hi ku rhandza kuloko, hi basisiwa hi magandzelo ya miri wa Yesu Kriste, lama nga endliwa kan'we.

¹¹Loko a ri muprista un'wana ni un'wana, a ri karhi a yima hi masiku hinkwawo, a tirhela Xikwembu, a humesa kanyingi magandzelo ma ri man'we lama nga tiviki, ni siku ni rin'we, ku susa swidyoho;

¹²kambe yena, kuteloko a humesile mhamba yi ri yin'we hikwalaho ka vudyoho, u titshamele evokweni ra xinene ra Xikwembu hilaha ku nga heriki,

¹³a ri karhi a langutela leswi seleke, hileswaku lava nga valala eka yena, va endliwa vunavelo bya mikondzo ya yena.

¹⁴Hikuva hi ku humesa mhamba kan'we, u hetisile hilaha ku nga heriki lava basisiweke.

¹⁵Kutani Moya lowo Kwetsima, na wona, wu hi endlela vumbhoni bya mhaka leyi;

¹⁶hikuva kuteloko wu rhangile hi ku vula leswaku: “Hi wona ntwanano lowu ndzi nga ta wu endla na vona loko ku hundzile masiku walawo, ku vula Hosi, ndzi ta nghenisa milawu ya mina etimbilwini ta vona, ndzi yi tsala eswifuveni swa vona”;

¹⁷a engeta, a ku: “Kutani a ndzi nga ha tsundzuki swidyoho swa vona, ni ku homboloka ka vona.”

¹⁸Kunene laha ku rivaleriwa ka ku dyoha ku nga kona, a ka ha humesiwi mhamba hikwalaho ka swidyoho.

¹⁹Hikwalaho, vamakwerhu, leswi hi pfumeleriwaka ku nghena evukwetsimelweni hi ngati ya Yesu,

²⁰yi nga ndlela leyintshwa leyi hanyaka, leyi Yesu a nga hi boxela yona hi ku boxa xisirhelelo, yi nga nyama ya yena;

²¹kutani leswi hi nga ni muprista lonkulu la vekiweke endlwini ya Xikwembu,

²²a hi tshineleleni hi mbilu leyinene, ni ku pfumela loku hetisekeke, timbilu ta hina ti basisiwile, ti nga ha ri na mapfalo layo biha,

²³ni miri wa hina wu hlantswiwile hi mati lama tengeke. A hi tiyiseleni eku tivuleni ka ku tshemba ka hina, hi nga ri na ku tsekatseka, hikuva la hi tshembiseke wa tshembeka.

²⁴A hi lavelaneni leswaku hi ta fambisana hi ku chivirika erirhandzwini, ni le mitirhweni leyo saseka.

²⁵Hi nga tshuki hi tshika nhlengeletano ya hina hi mukhuva wa van'wana, kambe hi khongotelana, ngopfu leswi mi vonaka siku ri tshinelaka.

²⁶Hikuva kungakuloko hi dyoha ha vomu, leswi hi nga amukela ku tiva ka ntiyiso, a ka ha ri na mhamba ya ku susa vudyoho,

²⁷kambe ku ni ku langutela loku chavisaka ka ku avanyisiwa, ni ku kariha ka ndzilo lowu nga ta hisa valala.

²⁸Loyi ngi a sandza nawu wa Muxe a a dlawa, ku nga ri na tintswalo, hi ku vula ka timbhoni timbirhi kumbe tinharhu;

²⁹xana loko mi ehleketa, a hi ku biwa loku tlurisaka loku a nga ta ringanisiwa hakona, loyi a kandziyeleke N'wana wa Xikwembu, a ringaniseke leswaku ngati ya ntwanano leyi a hlantswiweke ha yona a hi nchumu, a engeta a sandza Moya wa tintswalo xana?

³⁰Hikuva hi tiva la nga te: “Ku rihisa i ka mina; ndzi ta tirihisela ndzi ri mina, ku vula Hosi.” Na kona kambe u te: “Hosi yi ta avanyisa tiko ra yona.”

³¹I mhaka leyi chavisaka ku wela emavokweni ya Xikwembu lexi hanyaka.

³²Kambe anakanyani mikarhi leyo sungula, leyi kungakuloko mi voningiwile, mi nga tiyela ku lwa lokukulu ka ku vaviseka:

³³hambi ku ri loko mi khomiwe hi tingana ni ku xanisiwa emahlweni ka vanhu, hambi ku ri loko mi yimile, mi va vanakulobye va lava toloveleke sweswo.

³⁴Hikuva mi twele vusiwana lava bohiweke, kutani mi pfumerile hi ku tsaka loko swa n'wina swi tekiwa hi ku tiva leswaku mi ni rifuwo leri tlurisaka, leri nga kona hi masiku etilweni.

³⁵Hikwalaho, mi nga tshuki mi lahla ku tshemba ka n'wina loku nga ni hakelo leyikulu.

³⁶Hikuva mi fanele ku va ni ku tiyisela leswaku, kutakuloko mi endle ku rhandza ka Xikwembu, mi kuma leswi mi tshembisiweke swona.

³⁷“Hikuva ku sele kutsongo, kutsongonyana, kutani la taka u ta fika a nga ka a nga hlweri.

³⁸Kambe la lulameke u ta hanya hi ku pfumela, kambe kungakuloko a tlhelela endzhaku, moya wa mina a wa ha n'wi tsakeri.”

³⁹Loko hi ri hina, a hi vanhu va ku tlhelela ku ya eku lahlekeni, kambe hi va ku pfumela, leswaku mimoya ya hina yi hanyisiwa.