Read Xitsonga Hebrews 11 Bible Online

Hebrews 11 - Xitsonga bible

Hebrews 11

¹Kambe ku pfumela i xitshembiso xa xiviri xa swilo leswi languteriwaka ni xikombiso lexi khorwisaka xa leswi nga voniwiki.

²Hikuva hakona, va khale va kumile vumbhoni lebyinene.

³Hi ku pfumela, ha swi tiva leswaku misava ni hinkwaswo swi lunghisiwile hi rito ra Xikwembu, hileswaku leswi voniwaka a swi humanga eka leswi vonekaka.

⁴Hi ku pfumela, Avele u humesele Xikwembu magandzelo lama tlulaka ya Kayini, kutani hakona u kumile vumbhoni leswaku u lulamile, Xikwembu xi ri karhi xi vula vumbhoni bya magandzelo ya yena; kambe hakona wa ha vulavula, hambi a file.

⁵Hi ku pfumela, Enoko u tekeriwile ehenhla leswaku a nga ti vona rifu, kutani a nga ha kumiwanga hikuva Xikwembu a xi n'wi tekile; kambe loko a nga si tekiwa, u vuriwile leswaku a a tsakisile Xikwembu.

⁶Kambe ku pfumela, loko ku nga ri kona, a ku na laha Xikwembu xi nga tsakisiwaka hakona; hikuva la tshinelelaka Xikwembu, u fanele ku pfumela leswaku hi yena muhakeri wa lava xi lavaka.

⁷Hi ku pfumela, Nowa, kuteloko a tivisiwile hi Xikwembu timhaka leti nga siki vonakaka, u chavile, kutani a aka ngalava ku hanyisa va yindlu ya yena; kutani ha yona u avanyisile misava a va a vekiwa mudyandzhaka wa ku lulama loku humaka eku pfumeleni.

⁸Hi ku pfumela, Abrahama, siku a vitaniweke, a yingisa, a rhurhela etikweni leri a nga ta ri nyikiwa hi mukhuva wa ndzhaka; kambe a rhurha a nga tivi laha a yaka kona.

⁹Hi ku pfumela, u tshamile a ri muluveri etikweni leri a ri tshembisiweke, a tshama emitsongeni na Isaka, na Yakobo, lava ingi va ri vadyandzhaka swin'we na yena va ku tshembisa ku ri kun'we.

¹⁰Hikuva a a langutele muti lowu nga ni masungulo, lowu Xikwembu xi nga muaki ni musunguri wa wona.

¹¹Hi ku pfumela, na yena, Sara u nyikiwile matimba ya ku veka mbewu, hambi a khalutele hi nkarhi, hikuva a a ringanisile leswaku la n'wi tshembiseke wa tshembeka.

¹²Hikwalaho ku nga humelela hi munhu a ri un'we, la dyuhaleke na swona, vunyingi lebyi fanaka ni tinyeleti ta tilo, ni sava leri nga riki na ku hlayiwa, leri nga eribuwini ra lwandle.

¹³Volavo hinkwavo va fele eku pfumeleni, va nga si nyikiwa leswi va swi tshembisiweke, kambe va swi vonile va ri ekule va swi tsakela, kutani va tivurile vaendzi ni valuveri emisaveni.

¹⁴Hikuva lava vurisaka sweswo, va kombisa leswaku va lava tiko leri nga ra rikwavo.

¹⁵Kunene loko wongi va anakanyile ekarikwavo laha va sukeke kona, ingi va kumile nkarhi wa ku tlhelela kona.

¹⁶Kambe sweswi, va navela tiko ra rikwavo leri tlurisaka hi ku saseka, eka rikwavo ka le tilweni; hikwalaho Xikwembu xi nga riki na tingana hikwalaho ka vona, ni ku tivula Xikwembu xa vona, hikuva xi va lunghiserile muti.

¹⁷Hi ku pfumela, Abrahama, siku a ringiwaka a humesa Isaka egandzelweni, kutani loyi a nga nyikiwa ku tshembisiwa, a nyiketa la nga tswariwa eka yena a ri swakwe,

¹⁸loyi ku nga vuriwa ehenhla ka yena leswaku: “Hi yena Isaka loyi rixaka ra wena ri nga ta thyiwa ha yena”;

¹⁹a va a ringanisa leswaku Xikwembu xi ni matimba ya ku pfuxa, hambi ku ri eku feni; kwalaho kunene a tlhela a n'wi kuma hi lexi ringanaka ni ku pfuka eku feni.

²⁰Hi ku pfumela, Isaka a katekisa Yakobo na Esawu, a anakanyile leswi nga ta ta.

²¹Hi ku pfumela, Yakobo, siku a faka, a katekisa vana va Yosefa, un'wana ni un'wana, kutani a khongela a tiseketele hi nhonga ya yena.

²²Hi ku pfumela, Yosefa, siku a faka, a vula ku suka ka vana va Israele, kutani a va lerisa hi ta marhambu ya yena.

²³Hi ku pfumela, Muxe, kuteloko a velekiwile, a fihliwa hi vatswari va yena hi tin'hweti tinharhu, hikuva a va n'wi vona leswaku a a ri n'wana lowo saseka, kutani a va chavanga nawu wa hosi.

²⁴Hi ku pfumela, Muxe loko a kurile, u arile ku vuriwa n'wana wa n'wana wa Faro lowa wanhwana,

²⁵a va a tihlawulela ku xaniseka swin'we ni tiko ra Xikwembu, ku nga ri ku tsakela vudyoho nkarhinyana;

²⁶a ringanisa leswaku xisandzu xa Kriste i rifuwo leri tlulaka xuma xa Egipta, hikuva a a langutele hakelo.

²⁷Hi ku pfumela, u sukile eEgipta, a nga chavi ku kariha ka hosi; hikuva a a tiyile kukotisa loko ngi a vona loyi a nga voniwiki.

²⁸Hi ku pfumela, u endlile Paseka ni ku xuva ka ngati, leswaku muherisi wa mativula a nga khumbi ya Vaisraele.

²⁹Hi ku pfumela, va perile Lwandle ro Tshwuka kukotisa loko ku ri esaveni, kutani Vaegipta va ringeta ku endlisa sweswo, va nwela ematini.

³⁰Hi ku pfumela rirhangu ra Yeriko ri wile loko ri rhendzelekiwile hi masiku ya ntlhanu na mambirhi.

³¹Hi ku pfumela, Rahava, wa muoswi, a nga lovanga ni lava nga pfumelangiki hikuva u amukerile vakamberi hi ku tsaka.

³²Kutani ndzi nga engeta ndzi vula tihi-ke? Kasi ndzi nga heleriwa hi nkarhi loko ndzi vula ta Gidiyoni, ni ta Baraka, ni ta Samsoni, ni ta Yefta, ni ta Davhida, ni ta Samiele, ni ta vaprofeta;

³³volavo, hi ku pfumela, va hlurile matiko, va avanyisile hi ku lulama, va kumile leswi va nga tshembisiwa swona, va sivile milomu ya tinghala,

³⁴va timile matimba ya ndzilo, va ponisiwile eku kariheni ka fumu, va hanyisiwile emavabyini ya vona, va endliwile tinhenha enyimpini, va hangalasile mavandla ya valala.

³⁵Vavasati va tlhela va nyikiwa vafi va vona hi ku pfuka; van'wana va xanisiwa hi ku manyiwa miri, va ala ku tshunxiwa, leswaku va ta vona ku pfuka loku tlurisaka hi ku saseka.

³⁶Van'wana va ringiwile hi ku soriwa, ni ku biwa, ni ku bohiwa, ni khotso.

³⁷Va khandliwile hi maribye va sahiwile, va ringiwile, va dlayiwile hi ku kariha ka fumu, va tsendzeleke hinkwako va ambele madzovo ya tinyimpfu ni ya timbuti; va lahlekeriwa hi hinkwaswo, va xanisiwa, va endliwa hi nsele;

³⁸vona misava a yi nga va fanelanga, va tsendzeleka emananga, ni le tintshaveni, ni le mabakweni, ni le miceleni ya misava.

³⁹Kutani valavo hinkwavo, kuteloko va endleriwe vumbhoni hi ku pfumela ka vona, a va nyikiwanga lexi va xi tshembisiweke;

⁴⁰hikuva Xikwembu xi hi lavele xin'wana lexikulu ku tlurisa, leswaku va nga tshuki va hetiseka, hina hi nga ri kona.