Read Xitsonga Hebrews 13 Bible Online

Hebrews 13 - Xitsonga bible

Hebrews 13

¹A ku tiye ku rhandzana.

²Mi nga rivali ku amukela vaendzi, hikuva hakona van'wana va amukerile tintsumi va nga swi tivi.

³Anakanyani lava bohiweke, kukota loko ngi mi bohiwile na vona; ni lava xanisiwaka, kukotisa leswi mi nga ni miri, na n'wina.

⁴Ku tekana a ku ve loku tengeke ematlhelweni hinkwawo, ni masangu a ma pfumale vuoswi; hikuva Xikwembu xi ta avanyisa timbhisa ni vaoswi.

⁵Mikhuva ya n'wina yi nga tshuki yi va ya ku navela xuma, kambe mi kolwa hi leswi mi nga na swona, hikuva Xikwembu, hi xiviri xa xona, xi te: “Ndzi nga ka ndzi nga ku tshiki ndzi nga ka ndzi nga ku lahli.”

⁶Hikwalaho hi nga vula hi ku tshemba, hi ku: “Hosi i mupfuni wa mina, ndzi nga ka ndzi nga chavi nchumu; munhu a nga ndzi endla yini xana?”

⁷Anakanyi varisi va n'wina lava mi byeleke rito ra Xikwembu; mi etisa ku pfumela ka vona, mi ri karhi mi langutisa ku hetelela ka ku hanya ka vona.

⁸Yesu Kriste i un'we, hambi tolo, hambi namuntlha, ni hilaha ku nga heriki.

⁹Mi nga hambukisiwi hi tidyondzo leti hambaneke ta le handle; hikuva swi sasekile loko mbilu yi tiyisiwa hi tintswalo, ku nga ri hi swakudya leswi nga pfuniki nchumu eka lava swi tshembeke.

¹⁰Hi ni alitari leyi, lava tirhelaka tabernakela va nga pfumeleriwiki ku dyela eka yona.

¹¹Hikuva mitsumbu ya swifuwo leswi ngati ya swona yi yisiwaka evukwetsimelweni hi muprista lonkulu hikwalaho ka ku dyoha, yi hisiwa ehandle ka mixaxa.

¹²Hikwalaho, na yena Yesu, leswaku a kwetsimisa tiko hi ngati ya yena, u fele ehandle ka nyangwa.

¹³A hi humeni hakona, hi ya eka yena ehandle ka mixaxa, hi ri karhi hi rhwala tingana ta yena.

¹⁴Hikuva kwala, a hi na muti lowu tiyeke, kambe hi lava lowu nga ta humelela.

¹⁵Hikwalaho, a hi humeseni hi masiku eka Xikwembu ha Yesu, magandzelo ya ku dzunisa, yi nga mihandzu ya milomu leyi vulaka vito ra yena.

¹⁶Mi nga karhaleni ku endlela vanhu leswinene ni ku hanana, hikuva Xikwembu xi tsakisiwa hi magandzelo layo tano.

¹⁷Yingisani varisi va n'wina, mi tiveka ehansi ka vona; hikuva va hitekela mimoya ya n'wina, hikuva va ta vutisiwa hi yona; va yingiseni leswaku va swi endla hi ku tsaka, ku nga ri hi ku vilela; hikuva sweswo, swi nga ka swi nga mi humeseli vunene.

¹⁸Hi khongeleleni, hikuva ha ehleketa leswaku hi ni ripfalo lerinene, hi ri karhi hi rhandza ku endla swinene ematlhelweni hinkwawo.

¹⁹Ngopfungopfu ndza mi khongotela ku endlisa sweswo leswaku ndzi hatla ndzi tlheriseriwa n'wina.

²⁰Xikwembu xa ku rhula lexi vuyiseke exikarhi ka vafi, Hosi ya hina Yesu, murisi lonkulu wa tinyimpfu, hi ngati ya ntwanano lowu nga heriki;

²¹a swi xi mi lunghise ku tirha ntirho wun'wana ni wun'wana lowo saseka, mi ta endla ku rhandza ka xona, xi ri karhi xi endla eka n'wina, leswi xi tsakisaka ha Yesu Kriste; ku kwetsima a ku ve eka yena hilaha ku nga heriki.

²²Kambe ndza mi khongotela, vamakwerhu, leswaku mi amukela swinene marito lawa ya ku khongotela, hikuva ndzi mi tsalerile hi marito ma nga ri mangani.

²³Ma swi tiva leswaku Timotiya, makwerhu, u tshunxiwile; loyi, kungakuloko a hatlisa ku ta, ndzi ta ta mi vona, ndzi ri na yena.

²⁴Rungulani varisi va n'wina hinkwavo, ni vakwetsimi hinkwavo. Vaitaliya va mi rungula.

²⁵Tintswalo a ti ve na n'wina hinkwenu; Amen!