Read Xitsonga James 2 Bible Online

James 2 - Xitsonga bible

James 2

¹Vamakwerhu, ku pfumela loku mi nga na kona eka Hosi ya hina Yesu Kriste, Hosi ya ku kwetsima, ku nga tshuki ku va ni ku hlawula vanhu hi nghohe ya vona;

²hikuva kungakuloko ku nghena enhlengeletanweni ya n'wina wanuna la nga ni xingwavila xa nsuku, a ambele tinguvu to saseka; ku nghena ni xisiwana lexi ambaleke tinguvu to biha;

³loko kutani mi languta eka la ambaleke tinguvu to saseka, mi ku eka yena: “Wena, tshama la eku sasekeni,” kutani mi ku eka xisiwana: “Wena, yima lahaya,” kumbe “tshama la ehansi, evunavelweni bya milenge ya mina,”

⁴a mi hlawulanga etimbilwini ta n'wina xana, mi va vaavanyisi va ku anakanya loko biha?

⁵Yingisani, vamakwerhu lava rhandziwaka: Xana Xikwembu a xi hlawulanga swisiwana swa misava leyi, leswaku va va vafuwi eku pfumeleni, ni vadyandzhaka va ku fuma loku Xikwembu xi ku tshembiseke lava xi rhandzaka xana?

⁶Kasi n'wina mi sola xisiwana! Xana a hi vafuwi lava mi xanisaka; kutani a hi vona lava mi kokelaka etihubyeni xana?

⁷Xana a hi vona lava sandzaka vito lero saseka, leri mi nyikiweke rona!

⁸Hambiswiritano, loko mi heta nawu lowu nga hosi exikarhi ka milawu, hilaha ku tsariweke hakona leswaku: “Rhandza warikwenu kukota loko u tirhandza,” mi endla swinene;

⁹kambe loko mi ya hi nghohe ya vanhu, ma dyoha, mi ri karhi mi tshinyiwa hi nawu hi leswi mi nga vatluri va wona.

¹⁰Hikuva mani na mani la nga ta hlayisa milawu hinkwayo, kambe a khunguvanyeka eka wun'we, u ta va ni nandzu wa hinkwayo.

¹¹Hikuva la nga te: “U nga tshuki u oswa,” u vurile na swona, u te: “U nga tshuki u dlaya,” loko kutani u nga oswi, kambe u dlaya, u mutluri wa milawu.

¹²Vulavulani, mi endla hi mukhuva lowu fanelaka lava nga ta avanyisiwa hi nawu wa ku tshunxeka.

¹³Hikuva ku avanyisa ku nga ka ku nga vi na tintswalo eka loyi a nga endlangiki hi tintswalo; kambe tintswalo ti tidzunisa henhla ka ku avanyisa.

¹⁴Vamakwerhu, swi pfuna yini loko munhu a ku: “Ndzi ni ku pfumela,” a nga ri na mitirho; xana ku pfumela ka yena ku nga n'wi hlayisa xana?

¹⁵Loko makwenu wa wanuna, kumbe wa wansati va swerile va pfumala ni swakudya swa siku rin'wana ni rin'wana, kutani un'wana eka n'wina a ku eka vona:

¹⁶“Fambani hi ku tsaka, mi kufumela, mi xurha,” kasi a mi va nyikanga leswi laviwaka hi miri wa vona, swi pfuna yini xana?

¹⁷Hi mukhuva wolowo, na kona ku pfumela loku nga riki na mitirho ku tiferile.

¹⁸Kambe un'wana a nga ku: “U ni ku pfumela, kasi mina ndzi ni mitirho”; ndzi kombe ku pfumela ka wena loku nga riki na mitirho, kutani mina ndzi ta ku komba ku pfumela ka mina hi mitirho ya mina.

¹⁹U pfumela leswaku Xikwembu xi kona xi ri xin'we, u, endla swona; na wona mademona ma pfumela sweswo, kambe ma rhurhumela.

²⁰Munhu wa swahava, xana u rhandza ku tiva leswaku ku pfumela loku nga riki na mitirho, a ku pfuni nchumu xana?

²¹Xana Abrahama, tata wa hina, a nga hlayiwanga la lulameke hi mitirho, siku a nyiketeke n'wana wa yena, Isaka, egandzelweni xana?

²²Wa swi vona leswaku ku pfumela ka yena a ku tirhisana ni mitirho ya yena, kutani ku pfumela ka yena ku hetisekile hi mitirho.

²³Kutani ku endlakele Tsalwa leri nge: “Abrahama u pfumerile eka Xikwembu, kutani ku pfumela ka yena ku n'wi hundzukele ku lulama,” ku va kona a thyiwaka nakulobye wa Xikwembu.

²⁴Ma swi vona-ke leswaku munhu u hlayiwa la lulameke hi mitirho ya yena, ku nga ri hi ku pfumela ntsena.

²⁵Hi mukhuva wolowo, na yena Rahava, nsati wa vuoswi, a nga vekiwanga la lulameke hi mitirho xana, enkarhini lowo a amukeleke vakamberi, kutani a va tlherisa hi ndlela yin'wana xana?

²⁶Hikuva kukota loko miri lowu nga riki na moya wu file, hi mukhuva wolowo, na kona ku pfumela loku nga riki na mitirho, ku file.