Read Xitsonga James 3 Bible Online

James 3 - Xitsonga bible

James 3

¹Vamakwerhu, mi nga tshuki mi va vadyondzisi lavanyingi, mi ri karhi mi tiva leswaku hi ta kuma ku avanyisiwa loku tlurisaka;

²hikuva hinkwerhu ha hoxa eka leswo tala; kungakuloko un'wana a nga hoxi eku vulavuleni, loyi, i munhu la hetisekeke, la tivaka ku tifuma miri hinkwawo.

³Vonani, hi nghenisa matomu emilon'wini ya tihanci, leswaku ti ta hi yingisa, kutani hi fambisa miri hinkwawo wa tona.

⁴Vonani tingalava na tona, hambi ti ri letikulu swonghasi, hambi na swona ti susumetiwa hi mimoya ya matimba, ti fambisiwa hi xihendzulo lexitsongo, hinkwako laha muhendzuri a rhandzaka kona.

⁵Hi mukhuva wolowo, na rona ririmi, i xirho lexitsongo, kambe ri tidzunisa ngopfu. Vonani ndzilo lowutsongo, wu nga hisa tihunyi leto tala swonghasi!

⁶Ririmi, na rona, i ndzilo, i tiko ra ku homboloka; ririmi ri vekiwile eswirhweni swa hina ri nyamisa miri hinkwawo, ri va ri tshivelela ndlela hinkwayo ya ku hanya ka munhu; kutani na rona ri kondleteriwile hi ndzilo wa tihele.

⁷Kasi tinxaka hinkwato ta swivandzana ni tinyanyana hambi swi ri swikokovi, ni tinhlampfi, swi nga hluriwa, swi va swi hluriwile hi rixaka ra vanhu;

⁸kambe loko ri ri ririmi, a ku na munhu la ri kotaka; i ku biha loku nga hluriwiki, ri tele vuxungu lebyi dlayaka.

⁹Ha rona hi khensa Xikwembu Tatana, ha rona kambe, hi rhukana vanhu, lava endliweke hi xifaniso xa Xikwembu.

¹⁰Enon'wini wu ri wun'we, ku huma ku khensa ni ku rhukana. A swi faneli, vamakwerhu, leswaku timhaka ti va tano.

¹¹Xana xihlovo xi nga pfelela hi nseledyana wu ri wun'we, mati yo nandziha ni ya ku bava xana?

¹²Vamakwerhu, xana murhi wa nkuwa wu nga swi kota ku veleka mihandzu ya mutlhwari xana? Kumbe vhinya wu nga veleka makuwa xana? Na swona, mati yo dzunga a ma swi koti ku endla mati yo nandziha.

¹³I mani la nga ni ku tlhariha ni ku tiva exikarhi ka n'wina xana? A a kombise mitirho ya yena hi mikhuva yo saseka leyi nga ni vutlhari lebyinene.

¹⁴Kambe loko mi chivirikela ku biha, kutani ku tengisana ku ri kona etimbilwini ta n'wina, mi nga tshuki mi tidzunisa, ni ku hemba hi ku dyohela leswinene.

¹⁵A hi byona vutlhari lebyi xikaka hi le henhla, kambe i bya misava, i bya vumunhu, ni bya mademona.

¹⁶Hikuva laha ku chivirika loko biha ni ku tengisana ku nga kona, na kona, ku va ni madzolonga, ni timhaka hinkwato leta tingana.

¹⁷Kambe vutlhari lebyi pfaka ehenhla, ku sungula ka byona i ku tenga, byi engeta byi va ni ku rhula, ni ku olova, ni ku yingisela, byi tele tintswalo, ni mihandzu leyinene, a byi tsekatseki, a byi kanganyisi.

¹⁸Kutani mihandzu ya ku lulama yi byariwa eku rhuleni, eka lava endlaka mitirho ya ku rhula.