Read Xitsonga 2 Peter 3 Bible Online

2 Peter 3 - Xitsonga bible

2 Peter 3

¹Varhandziwa, epistola leyi i ya vumbirhi leyi ndzi mi tsalelaka yona, kutani ha tona letimbirhi, ndzi pfuxa ku twisisa ka n'wina loku tengeke ndzi ri karhi ndzi mi anakanyisa,

²leswaku mi ta anakanya timhaka leti nga bvumbhiwa hi vaprofeta lava hlawuriweke, ni milawu ya vaapostola va n'wina, leyi nga ya Hosi ni Mulondzovoti:

³mi va mi rhanga hi ku tiva mhaka leyi, leswaku hi mikarhi ya makumu, vasori va ta ta hi ku vungunya, va famba hi ku navela ka vona,

⁴kutani va ta ku: “Ku kwihi ku tshembisa ka ku vuya ka yena? Hikuva mpfhuka ku fa vakokwana, hinkwaswo swa ha tiyile, swa ha kota eku sunguleni loko ku vumbiwile hinkwaswo.”

⁵Hikuva va endla ha vomu loko va nga tivi leswaku matilo a ma ri kona khale ni misava leyi nga humesiwa ematini, yi va yi hanya exikarhi ka mati, hi rito ra Xikwembu;

⁶swoleswo, misava ya nkarhi lowuya, yi nga lovisiwa ha swona, yi mbundzuxiwa hi mati.

⁷Kambe matilo ni misava ya sweswi, swi hlayiseriwa ndzilo hi rito rolero, swi londzovotiwa ku ya fika siku ra ku avanyisa, ni ra ku lova ka vanhu lava nga chaviki Xikwembu.

⁸Ntsena varhandziwa, ku va ni mhaka yin'we leyi mi nga tshukeni mi yi rivala, hileswaku siku rin'we eka Hosi, ri fana ni malembe ya khume ra madzana, kutani malembe ya khume ra madzana ma kotisa siku rin'we.

⁹Hosi a yi hlweri ku endla leswi yi nga tshembisa swona, kukotisa loko van'wana va ehleketa leswaku ku hlwela ku kona, kambe wa ha lehisa mbilu hikwalaho ka n'wina, hikuva a nga rhandzi leswaku ku lova ni un'we, kambe u rhandza leswaku hinkwavo va ta eku hundzukeni.

¹⁰Kambe siku ra Hosi ri ta ta kukotisa khamba; kutani ha rona matilo ma ta hundza hi ku pfuma loku chavisaka, masungulo ya hinkwaswo ma ta hela hi ku tshwa, kutani misava ni mitirho leyi nga ka yona yi ta tshwa.

¹¹Kutani leswi hinkwaswo swi nga ta hela, swa mi fanela ngopfungopfu ku hanya hi mukhuva wa ku tenga, ni ku chava Xikwembu;

¹²mi ri karhi mi langutela ni ku hatlisisa ku ta ka siku ra Xikwembu, leri matilo ma nga ta tshwa ha rona ma hela, kutani masungulo ya hinkwaswo ma ta nyuka hi ku tshwa.

¹³Kambe hi langutela hi ku tshembisa ka yena matilo lamantshwa ni misava leyintshwa, laha ku lulama ku akeke kona.

¹⁴Hikwalaho, varhandziwa, loko mi langutela leswo, chivirikani leswaku mi ta kumiwa hi yena eku rhuleni, mi nga ri na xivati ni xisandzu.

¹⁵Kutani mi ringanisa leswaku Hosi ya hina, loko yi lehisa mbilu, i ku mi hlayisa, kukotisa loko Pawulo, makwerhu la rhandziwaka, a mi tsaleleke na yena, hi vutlhari lebyi a byi nyikiweke,

¹⁶hilaha a swi endlaka tiepistoleni ta yena hinkwato, loko a vula timhaka leti; exikarhi ka tona, ku nga ni tin'wana leto nonon'hwa ku twisisa, leti, lava nga dyondzangiki, ni lava tsekatsekaka va ti hombolokisaka, kukotisa Matsalwa man'wana eku lahlekeni ka vona.

¹⁷Hikwalaho, loko mi ri n'wina, varhandziwa, leswi mi swi tivaka swi nga si humelela, tilanguteleni, mi nga ti kokiwa ni van'wana hi ku kanganyisa ka lavo homboloka, mi ta lahlekeleriwa hi ku tiya ka n'wina.

¹⁸Kambe kulani etintswalweni, ni le ku tiveni ka Yesu Kriste, Hosi ni Muhlayisi wa hina. Ku kwetsima a ku ve eka yena sweswi, ni ku ya fika siku leri nga taka ri nga heri. Amen!