Read Xitsonga Judges 10 Bible Online

Judges 10 - Xitsonga bible

Judges 10

¹Endzhaku ka Abimeleke, ku humelela Tola n'wana Puwa, n'wana Dodo, wanuna wa Isakara, a lamulela Israele, a akile eXamiri, entshaveni ya Efrayimi.

²A avanyisela Israele hi malembe ya 23, kutani a fa, a lahliwa eXamiri.

³Endzhaku ka yena, ku humelela Yayiro, Mugiliyadi; yena a avanyisela Israele hi malembe ya 22.

⁴A a ri ni vana va 30, lava khandziyaka timbhongolo ta 30, a va ri ni miti ya 30 etikweni ra Giliyadi, leyi nga thyiwa vito ra miti ya Yayiro, ni namuntlha.

⁵Kutani Yayiro a fa, a lahliwa eKamona.

⁶Kutani vana va Israele va engeta va endla leswo biha emahlweni ka Yehovha, va tirhela Baali na Astarte, ni swikwembu swa Siriya, ni swikwembu swa Sidoni, ni swikwembu swa Mowabu, ni swikwembu swa vana va Amoni, ni swikwembu swa Vafilista; va fularhela Yehovha, va tshika ku n'wi tirhela.

⁷Kutani ku kariha ka Yehovha ku pfurhela va Israele; a va nyiketa emavokweni ya Vafilista, ni le mavokweni ya vana va Amoni.

⁸Hi lembe rero, va xanisa ni ku karhata vana va Israele ngopfu, kambe va xanisa vana va Israele hinkwavo lava ngi va ri hase ka nambu wa Yordani, etikweni ra Vaamori, ku nga Giliyadi, hi malembe ya 18.

⁹Vana va Amoni va pela Yordani ku ya lwa na Yuda na Benjamini, ni nyimba ya Efrayimi; vana va Israele va ri enhlomulweni lowukulu.

¹⁰Kutani vana va Israele va huwelela eka Yehovha, va ku: “Hi ku dyohele, hikuva hi fularhele Xikwembu xa hina, hi tirhela Baali.”

¹¹Yehovha a ku eka vana va Israele: “Xana a ndzi mi lamulelangi emavokweni ya va Egipta, ni le ya Vaamori, ni le ya vana Vaamoni, ni le ya Vafilista xana?

¹²Ni siku mi xanisiwaka hi Vasidoni, ni Vaamaleke, ni Vamidiyani, mi huwelele ka mina, kutani ndzi mi lamulela emavokweni ya vona.

¹³Hambiswiritano, mi ndzi fularhele, mi tirhele swikwembu swimbe, hikwalaho, a ndzi nga ha mi lamuleli.

¹⁴Fambani, mi ya huwelela eka swikwembu leswi mi tihlawuleleke swona, a swi mi lamulele enkarhini lowu wa khombo ra n'wina.”

¹⁵Vana va Israele va ku eka Yehovha: “Hi dyohile; endla ha hina hinkwako hi laha u swi rhandzaka hakona, ntsena u hi lamulela namuntlha!”

¹⁶Kwalaho, va tshika swikwembu swa matiko leswi ngi swi ri exikarhi ka vona, va tirhela Yehovha; Yehovha a tsetselela Vaisraele hikwalaho ka khombo ra vona.

¹⁷Kutani vana Vaamoni va hlengeletana, va ya gova eGiliyadi, na vona vana va Israele va hlengeletana, va ta gova eMispa.

¹⁸Kutani vanhu ni vakulukumba va Giliyadi, va vutisana, va ku: “I mani la nga ta sungula ku lwa ni vana va Amoni xana? La nga ta sungula, u ta va yena hosi ya hinkwavo lava akeke eGiliyadi.”