Read Xitsonga Judges 17 Bible Online

Judges 17 - Xitsonga bible

Judges 17

¹A ku ri ni wanuna entshaveni ya Efrayimi, vito ra yena a a ri Mika.

²A ku eka mana wa yena: “Tixikele ta silivhere ta 1 100 leti yiviweke eka wena, leti u nga vulavula hi ku kariha hikwalaho ka tona ndzi ri kona, vona, mali yoleyo yi le ka mina; hi mina loyi ndzi yi tekeke.” Mana wa yena a ku eka yena: “N'wananga a a katekisiwe hi Yehovha!”

³Kuteloko a tlherisile tixikele teto ta 1 100, mana wa yena a ku: “Ndzi hlawulele Yehovha mali yoleyo, leswaku ku ta endleriwa n'wananga ha yona xifaniso lexi vatliweke ni xifaniso lexi chuluriweke, kutani sweswi, ndzi ti tlherisela eka wena.”

⁴Kavaloko Mika a tlherisa mali yoleyo eka mana wa yena, kutani mana wa yena a teka tixikele ta 200, a ti nyika muchuluri, a endla xifaniso lexi vatliweke ni xifaniso lexi chuluriweke, swi vekiwa endlwini ya Mika.

⁵Hi mukhuva wolowo, wanuna yeloyi, Mika, a a ri ni yindlu ya swikwembu; a tiendlela ni efodi, ni titerafi, kutani a hlawula un'wana wa vana va yena, a n'wi endla muprista wa yena.

⁶Emikarhini yoleyo, a ku nga ri na hosi eIsraeleni, un'wana ni un'wana a a endla hilaha a tirhandzelaka hakona.

⁷A ku ri ni jaha ra Betlehema-Yuda, wa nyimba ya Yuda, a a ri Mulevhi, a akile kona.

⁸Kutani wanuna yeloyi a rhurha emutini wa Betlehema-Yuda ku ya luvela laha a nga ta kuma xivandla kona. A ko a ha famba, a fika eka Mika entshaveni ya Efrayimi.

⁹Mika a ku eka yena: “U huma kwihi?” A ku eka yena: “Ndzi Mulevhi wa Betlehema-Yuda, ndzi ya luvela laha ndzi nga ta kuma xivandla kona.”

¹⁰Mika a ku eka yena: “Tshama eka mina, u va tatana ni muprista wa mina ndzi ta ku nyika tixikele ta khume hi lembe rin'wana ni rin'wana; ni tinguvu ta wena ni swakudya swa wena.”

¹¹Kutani Mulevhi a nghena kona. Mulevhi a pfumela ku tshama ni wanuna yeloyi Kutani jaha leri ri va eka yena kukotisa un'wana wa vana va yena.

¹²Kutani Mika a hlawula Mulevhi, a veka jaha leri muprista wa yena, kutani a tshama eka Mika.

¹³Mika a ku: “Sweswi, ndza swi tiva leswaku Yehovha u ta ndzi katekisa hikuva ndzi ni muprista wa Mulevhi.”