Read Xitsonga Judges 4 Bible Online

Judges 4 - Xitsonga bible

Judges 4

¹Kuteloko Ehudi a file, vana va Israele va engeta va endla swo biha emahlweni ka Yehovha.

²Kutani Yehovha a va nyiketa emavokweni ya Yabini, hosi ya Kanana, la nga fuma Hasoro; mufambisi wa mavandla ya yena a a ri Sisera, a akile eHaroxete-Goyimi.

³Kutani vana va Israele va huwelela eka Yehovha hikwalaho ka tigolonyi ta nsimbhi ta Sisera ta 900; kambe vana va Israele va xanisiwa hi yena hi malembe ya makume mambirhi.

⁴Enkarhini wolowo, Debora, muprofeta wa wansati, nsati wa Lapidoto, a avanyisela Israele.

⁵A a tshamisa ehansi ka ncindzu wa Debora, emaaveni ya Rhama na Betele, entshaveni ya Efrayimi. Kutani vana va Israele a va tlhandlukela eka yena ku ta avanyiseriwa kona.

⁶Kutani Debora a rhuma a vitana Baraka n'wana Abinowama, wa Kadexe-Neftali, a ku eka yena: “Xana Yehovha, Xikwembu xa Israele a nga lerisangi mhaka leyi xana? Yana u khandziya ntshava ya Taboro u ri ni vavanuna va 10 000 va vana va Neftali ni vana va Zebuloni.

⁷Ndzi ta kokela eka wena, enambyeni wa Kixoni, Sisera, mufambisi wa mavandla ya Yabini, ni tigolonyi ta yena, ni tiko ra yena ndzi ta va nyiketa emavokweni ya wena.”

⁸Kutani Baraka a ku eka yena: “Loko hi famba kun'we ndzi ta famba, loko hi nga fambi kun'we ndzi nga ka ndzi nga fambi.”

⁹Debora a ku: “Ku ya, ndzi ta ya na wena, kambe u nga ka u nga voni ku dzunisiwa endleleni leyi u nga ta famba ha yona, hikuva Yehovha u ta nyiketa Sisera emavokweni ya wansati.”

¹⁰Debora a suka a ya eKedexe a ri na Baraka. Kutani Baraka a vitanela eKedexe va Zebuloni ni va Neftali, a tlhandluka a ri ni vanhu va 10 000, na yena. Debora a tlhandluka na yena.

¹¹(Loko a ri Hebere, Mukeni, a a hambene ni Vakeni, vana va Hobabu, mukon'wana wa Muxe, a a akile ntsonga wa yena ekusuhi ni nkuhlu wa Saanayimi, ekusuhi na Kedexe.)

¹²Kutani Sisera a tivisiwa leswaku Baraka, n'wana Abinowama, u tlhandluke entshaveni ya Taboro.

¹³Kutani Sisera a hlengeleta tigolonyi ta yena hinkwato ti nga tigolonyi ta nsimbhi ta 900, ni tiko ra yena hinkwaro ku sukela eHaroxete-Goyimi ku ya fika enambyeni wa Kixoni.

¹⁴Kutani Debora a ku eka Baraka: “Tlhandluka, hikuva hi rona siku leri Yehovha a nga ta nyiketa Sisera emavokweni ya wena! Xana Yehovha a nga ku rhangelangi emahlweni xana?” Hikwalaho Baraka a rhelela entshaveni ya Taboro, a landzeriwa endzhaku hi vanhu va 10 000.

¹⁵Kutani Yehovha a hangalasa Sisera ni tigolonyi ta yena hinkwato, ni mavandla ya yena hinkwawo hi ku kariha ka fumu, emahlweni ka Baraka; Sisera a xika egolonyini ya yena, a baleka hi milenge.

¹⁶Kutani Baraka a hlongorisa tigolonyi ni mavandla ku ya fika eHaroxete-Goyimi, mavandla hinkwawo ya Sisera ma dlawa hi ku kariha ka fumu, ku nga poni munhu.

¹⁷Kutani Sisera a baleka hi milenge endlwini ya Yaele, nsati wa Hebere, Mukeni; hikuva ku rhula a ku ri kona exikarhi ra Yabini, hosi ya Hasoro, ni yindlu ya Hebere Mukeni.

¹⁸Kutani Yaele a huma a ya hlangana na Sisera, a ku eka yena: “Hambuka, n'wini wanga, hambukela eka mina, u nga chavi!” Kutani Sisera a hambukela endlwini ya yena, Yaele a n'wi funengeta hi nguvu.

¹⁹Kutani Sisera a ku eka yena: “Wa nga ndzi ha matinyana ndzi nwa, hikuva ndzi ni torha.” A pfula xikutsu xa ntswamba, a n'wi nwisa, a va a n'wi funengeta.

²⁰Sisera a engeta kambe, a ku eka yena: “Yima enyangweni ya yindlu kutakuloko ku ta munhu, a vutisa a ku: ‘Xana munhu u kona kwalaho?’ u ta ku: ‘A ku na munhu.’ ”

²¹Kutani Yaele, nsati wa Hebere, a hlumula mhingu ya yindlu, a tamele nyundzu hi voko, kutani a tshinela ekusuhi na Sisera hi ku nyanimela a n'wi bela exihlayeni hi mhingu yi huma ni le hansi, loko a ri karhi a etlele ngopfu, a karhele, kutani a fa.

²²Kutani Baraka a fika, a ri karhi a hlongorisa Sisera; kutani Yaele a huma a ya hlangana na yena, a ku eka yena: “Tana, ndzi ku kombisa munhu loyi u n'wi lavaka.” Kutani Baraka a nghena endlwini ya yena a vona Sisera a etlele a file, mhingu yi ri exihlayeni xa yena.

²³Hi siku rero Xikwembu xi tsongahata Yabini, hosi ya Kanana, emahlweni ka vana va Israele.

²⁴Kutani vana va Israele va tshama va lwa na Yabini, hosi ya Kanana, va ko va herisa Yabini hosi ya Kanana.