Read Xitsonga Judges 5 Bible Online

Judges 5 - Xitsonga bible

Judges 5

¹Hi siku rero, Debora na Baraka n'wana Abinowama, va yimbelela, va ku:

²“Khensani Yehovha! Hikuva varihiseri va Vaisraele va rhangile emahlweni, Na rona tiko ri titisile kona hi ku swi rhandza.

³Yingisani, n'wina tihosi, mi rhiya tindleve, n'wina tihosana! Hi mina, hi mina, ndzi ta yimbelela Yehovha, Ndzi ta yimbelela Yehovha, Xikwembu xa Israele!

⁴Oho! Yehovha, kuteloko u suke eSeyira, Loko u huma etikweni ra Edomu, Misava yi tsekatseka, matilo ma n'oka, Ni mapapa ma tshona mati.

⁵“Tintshava ti suka emahlweni ka Yehovha, Na yena Sinayi, emahlweni ka Yehovha, Xikwembu xa Israele.

⁶“Emikarhini ya Xamgari, n'wana Anati, Ni le mikarhini ya Yaele, tindlela a ti nga fambeki, vaendzi a va hambukela etindleleni leto homboloka.

⁷Vafambisi a va pfumaleka, a va pfumaleka eIsraeleni, Ku fika loko ndzi humelela, mina Debora, Ndzi yima kukota mana wa Israele.

⁸Kakuloko Vaisraele va hlawula swikwembu leswintshwa, Nyimpi yi humelela etinyangweni. Xana xitlhangu, kumbe tlhari a ri kumiwa Eka Vaisraele va 40 000 xana?

⁹Mbilu ya mina yi ni vafumi va Israele, Yi ni va tiko lava humeke hi ku rhandza ka vona. Khensani Yehovha!

¹⁰N'wina lava khandziyaka timbhongolo leto basa, N'wina lava tshamaka emasangwini, Na n'wina lava fambaka hi tindlela! Yimbelelani!

¹¹Exikarhi ka swihlovo swa mati, lava copaka miseve A va dzunise mitirho yo lulama ya Yehovha, Mitirho yo lulama ya vafambisi va Israele! “Kutani tiko ra Yehovha ri xikela etinyangweni.

¹²Pfuka, pfuka, Debora! Pfuka, pfuka, u vula risimu! Pfuka Baraka, u fambisa lava u va khomeke, n'wana Abinowama!

¹³Hi nkarhi wolowo lava seleke va tiko va hlule tinhenha, Yena Yehovha a ndzi hlurisa vamatimba.

¹⁴Van'wana a va ri va Efrayimi, lava sukeke eAmaleke. Endzhaku ka wena ku huma Benjamini, exikarhi ka vanhu va wena; Ku humelela ni vafambisi va Makiri, Ni va Zebuloni lava tamelaka peni ya mutsari.

¹⁵Tihosana ta Isakara ti ta na Debora, va Isakara na Baraka va n'wi landza enkoveni. Eswinambyaneni swa Rhuveni, Ku endliwile makungu lamakulu ya timbilu.

¹⁶Xana a u tshamisela yini emadyelweni? Xana a ku ri ku yingisela swirilo swa mitlhambi? Eswinambyaneni swa Rhuveni, A ku endliwa makungu lamakulu ya timbilu!

¹⁷Giliyadi a titshamele ekaya ehase ka Yordani! Xana Dani u tshamela yini emabyatsweni? Asere a titshamele eribuwini ra lwandle, A titshamele emahlalukweni ya yena.

¹⁸Zebuloni i tiko leri nga chaviki rifu, Na yena Neftali swi va tano Eswitsungeni swa le nhoveni.

¹⁹“Tihosi ti fika ti lwa; Ku lwa tihosi ta Kanana, Ekusuhi na Taanaka, ematini yi Megido; Kambe a va kumanga nchumu, hambi yi ri mali.

²⁰Tinyeleti ta le matilweni ti lwa, Ti lwa na Sisera loko ti hundza hi tindlela ta tona.

²¹Nambu wa Kixoni wu va kukurile, Nambu wa khale, nambu wa Kixoni. Oho! Moya wanga, u kandziyela va matimba ehansi.

²²Enkarhini lowu masondzo ya tihanci ma vandza ehansi Hi ku tsutsuma, hi ku tsutsuma ka tinhenha ta vona.

²³“Rhuketelani Merozo, ku vula ntsumi ya Yehovha, Rhuketelani, rhuketelani lava akeke kona; Hikuva a va tangi ku ta pfuna Yehovha, Ku ta pfuna Yehovha kun'we ni lava matimba.

²⁴“A ku dzunisiwe Yaele, exikarhi ka vavasati, Nsati wa Hebere, Mukeni! A a dzunisiwe exikarhi ka vavasati lava akeke emitsongeni.

²⁵Sisera a a kombele mati, a n'wi nyika ntswamba, A n'wi tisela mafurha ya wona hi nkambana wa tihosi.

²⁶A teka mhingu hi voko ra yena, Hi lera xinene, a tamela nyundzu ya vafuri; A bela Sisera, a n'wi bela enhlokweni, Loko a n'wi tlhavile, a n'wi boxa xihlaya.

²⁷A korhama emilengeni ya yena, a wa, a lo lulululu, A korhama emilengeni ya yena, a wa, Laha a korhameke kona, hi kona a weleke ehansi, a fa.

²⁸“Mana wa Sisera a languta hi fasitere, Emavonini ya fasitere a huwelela: ‘Golonyi ya yena yi hlwele ha yini ku fika xana? Tigolonyi ta yena ti famba khwatsi ha yini-ke?’

²⁹Vavasati va vutlhari va rikwavo, va n'wi hlamula, Na yena a tihlamula, a ku:

³⁰‘A va kumanga nchumu xana? A va avelananga leswi phangiweke? Wanuna un'wana ni un'wana a teka nhwanyana kumbe vambirhi. Tinguvu ta mavala leti phangiweke, i ta Sisera! Tinguvu ta mavala leti lukiweke leti phangiweke, Tinguvu timbirhi ta mavala leti lukiweke, Ta ku bombisa nhamu ya muhluri.’

³¹“Oho! Yehovha! Valala hinkwavo va wena a va lovisiwe sweswo! Loko, va ri lava ku rhandzaka, va ta fana ni dyambu, Loko ri tsuvuka ematimbeni ya rona.” Kutani tiko ri etlela hi malembe ya mune wa makume.