Read Xitsonga Judges 8 Bible Online

Judges 8 - Xitsonga bible

Judges 8

¹Kambe vavanuna va Efrayimi va ku eka Gidiyoni: “U hi endlisele yini sweswo loko u nga hi rhambangi loko u ya lwa ni Vamidiyani,” va n'wi tengisa ngopfu.

²Kutani a ku eka vona: “Xana ndzi endlile ntirho wihi lowu nga xaxametiwaka ni wa n'wina xana? Xana ku kunhula ka va Efrayimi a ku tluri ku tshovela ka vhinya ya Abiezere xana?

³Xikwembu xi nyiketile emavokweni ya n'wina, tihosi timbirhi ta Vamidiyani. Orebe na Zeba, kutani mina ndzi endlile ntirho wihi lowu nga xaxametiwaka ni wa n'wina xana?” Kuteloko a vulavurile na vona sweswo, va rheleta ku kariha ka vona.

⁴Kutani Gidiyoni, loko a fika eYordani, a pela ni vavanuna va madzana manharhu lava ingi a ri na vona, va karhele, kambe va ri karhi va hlongorisa Vamidiyani.

⁵Kutani a ku eka vanhu va Sukoti: “Nyikani vuswa eka vavanuna lava ndzi nga na vona, hikuva va karhele, ndzi ta hlongorisa Zeba na Salmuna, tihosi ta Midiyani.”

⁶Vakulukumba va Sukoti va ku: “Xana swandla swa Zeba na Salmuna swi le mavokweni ya wena, leswi u nge hi nyika mavandla ya wena vuswa-ke?”

⁷Gidiyoni a ku: “Loko swi ri tano siku Yehovha a nyiketaka Zeba na Salmuna emavokweni ya mina, ndzi ta handzula tinyama ta n'wina hi mitwa ya le mananga ni mahlwehlwe.”

⁸Loko a suka kona a fika ePenuwele, a vulavula kona hi mukhuva wu ri wun'we, vanhu va Penuwele va n'wi hlamula hilaha vanhu va Sukoti va n'wi hlamuleke hakona.

⁹Kutani a vulavula ni vanhu va Penuwele, a ku: “Loko ndzi tlhela hi ku rhula, ndzi ta mbundzuxa khokholo rolero.”

¹⁰Loko a ri Zeba na Salmuna a va fikile eKarikoro ni mavandla ya vona; hinkwavo lava nga sala va mavandla hinkwawo ya vana va le vuxeni, va ri vanhu va 15 000; ku dlayiwile va 120 000 lava hlomuleke tlhari.

¹¹Kutani Gidiyoni a tlhandluka hi ndlela ya lava akeke ematendeni hitlhelo ra vuxa ka Noba na Yogibeha, a hangalasa mavandla hinkwawo, loko ma ha titsakele.

¹²Kutani Zeba na Salmuna va baleka, kambe Gidiyoni a va hlongorisa, a khoma tihosi teto timbirhi ta Midiyani, Zeba na Salmuna, kutani a hangalasa mavandla hinkwawo.

¹³Kutani Gidiyoni, n'wana Yowasi, a tlhela enyimpini hi ntsunga wa Heresi.

¹⁴Kutani a khoma jaha ra va Sukoti, a n'wi vutisa; yeloyi a n'wi nyika papila ra mavito ya tihosana ni ya vakulukumba va Sukoti, va nga vanhu va 77.

¹⁵Kutani a fika eka vanhu va Sukoti, a ku eka vona: “Zeba na Salmuna, hi vona lava mi ndzi holoveleke hikwalaho ka vona mi ku: ‘Xana swandla swa Zeba ni swa Salmuna swi le vokweni ra wena, loko u ku, hi nyika vavanuna va wena lava karheleke vuswa xana?’ ”

¹⁶Kwalaho a teka vakulukumba va muti, a teka ni mitwa ya le mananga ni mahlwehlwe, kutani a ba va Sukoti ha swona.

¹⁷A mbundzuxa ni khokholo ra Penuwele, a dlaya vavanuna va muti.

¹⁸A byela Zeba na Salmuna a ku: “Vavanuna lava mi va dlayeke eTaboro a va ri lavo yini xana?” Va ku: “A va fana na wena; un'wana ni un'wana a fana ni n'wana wa hosi.”

¹⁹A ku: “A va ri vamakwerhu, vana va manana. Ha Yehovha la hanyaka! Loko a mi va hanyisile, a ndzi nga ta mi dlaya na mina.”

²⁰Kavaloko a byela Yetere, n'wana wa yena wa mativula, a ku: “Yima, u va dlaya.” Kambe jaha a ri hlomulanga tlhari ra rona hi ku chava, hikuva a ra ha ri jahanyana.

²¹Kutani Zeba na Salmuna va ku eka yena: “Yima wena u hi dlaya, hikuva munhu hilaha a nga hakona, matimba ya yena na wona ma tano.” Kutani Gidiyoni a yima, a dlaya Zeba na Salmuna, a teka ni swibombiso leswi ngi swi ri etinhan'wini ta tikamela ta vona.

²²Kutani vana va Israele va ku eka Gidiyoni: “U hi fuma u ri wena, ni n'wana wa wena, ni ntukulu wa wena, hikuva u hi lamulerile emavokweni ya Vamidiyani.”

²³Gidiyoni a ku eka vona: “Loko ndzi ri mina, ndzi nga ka ndzi nga mi fumi, na yena n'wana wa mina, a nga ka a nga mi fumi. Yehovha, hi yena la nga ta mi fuma.”

²⁴Gidiyoni a engeta a ku eka vona: “Ndzi kombela xilo xin'we eka n'wina, ndzi ri: Ndzi nyikeni un'wana ni un'wana swingwavila swa nsuku leswi mi swi phangeke.” Hikuva Vamidiyani a va ri ni swingwavila swa nsuku, hikuva a va ri Vaiximaele.

²⁵Va ku: “Hi ta ku nyika swona hi ku tsaka,” kutani va andlala nguvu; hinkwavo, va hoxa kona swingwavila leswi va swi phangeke.

²⁶Kutani ku tika ka swingwavila leswi a nga swi kombela, ti va tixikele ta nsuku ta 1 700; ku nga hlayiwi swibombiso, hambi swi ri swingwavila swa tindleve, hambi ti ri tinguvu ta xivunguvungu leti ngi ti ambariwile hi tihosi ta Midiyani, hambi ti ri tintlhama leti ngi ti ri etinhan'wini ta tikamela ta vona.

²⁷Kutani Gidiyoni a endla efodi ha swona, a yi veka eOfira, emutini wa varikwavo; kambe Vaisraele hinkwavo va endla vuoswi ha yona, wu va ntlhamu eka Gidiyoni ni ka hinkwavo, va yindlu ya yena.

²⁸Vamidiyani va tsongahatiwa sweswo emahlweni ka vana Vaisraele, a va ha tshamangi va tlakusa tinhloko ta vona, kutani tiko ri etlela hi malembe ya mune wa makume emikarhini ya Gidiyoni.

²⁹Kutani Yerubaali, n'wana Yowasi, a ya tshama endlwini ya yena.

³⁰Gidiyoni a va ni vana va vavanuna va 70, lava tswariweke hi yena, hikuva a a tekile vasati lavo tala.

³¹Kutani xigangu xa yena lexi akeke eXikeme, na xona xi n'wi velekela wandzisanyana, xi n'wi thya vito ra Abimeleke.

³²Kutani Gidiyoni, n'wana Yowasi, a fa a dyuhele ngopfu, a lahliwa esirheni ra Yowasi, tata wa yena, eOfira wa va Abiezere.

³³Kuteloko Gidiyoni a file, vana Vaisraele va engeta va tinyiketa vuoswi ni va Baali, va tivekela Baala-Beriti xi va xikwembu xa vona.

³⁴Kutani vana va Israele va nga ha tsundzukanga Yehovha, Xikwembu xa vona, loyi a va lamuleleke emavokweni ya valala hinkwavo, va vona lava va rhendzeleke.

³⁵Kambe a va endlelanga yindlu ya Yerubaali, a nga Gidiyoni, ku khensa loku ringaneke ni swilo hinkwaswo leswinene leswi a swi endleleke Israele.